Wp/fit/Tietosanakirja

From Wikimedia Incubator
< Wp‎ | fitWp > fit > Tietosanakirja

Ensyklopeti eli tietosanakirja on kattava kokoelma tietoa hakusanasta. Tietosanakirja saattaa olla ylheinen ja sisältää tietoa useista eri aiheista, eli se voipi keskittyä johonkin tiethyyn aiheesheen, esimerkiks etymolookisia kuvauksia hakusanasta (esim. mitä merkittee kainulainen, Matarenki eli Tornio?), metisiinin tietoa, tekniikka etc. Pääosa osa tietosanakirjoista keskittyy tarjoamhaan tietoa tietystä kansalisesta näkökulmasta. Tietosanakirja saattaa olla kans uskonollinen hengeltään.

Tietosanakirja voipi olla järjestetty ottikon mukhaan joko puukstaavijärjestyksessä eli aiheittain. Puukstaavin järjestys on ylheisin varsinki yleistietosanakirjoissa. Tietosanakirja-artikkelitten pittuus saattaa vaihella teoksesta riippuen muutamasta lausheesta usean sivuitten mittaishiin esseishiin. Wikipeetia on esimerkki ylheisestä tietosanakirjasta joka on internetissä. Kirjottajat päättävät itte mikkä ainheet jokhainen kieliryhmä ottaa mukhaan ja samala saapi viitheen siihen hakusanhaan muissa kielissä ja helpola pystyy vertaamhaan tietosanakirjoja toishiin. Se toimii hyvin kun käyttää kieliä jokka kuvvaatvat valtion pyrkimyksiä. Valtiottomat ja valtioliset vähemistökielet saavat kuitekki erinlaisen, monimukkaiseman, vaativaman ja vaikeaman aseman missä artikkelitten kirjottajat häätyvä valita monesta vaihtoehtoista kuinka luokittellee hakusanoja.

Vähemistökielitten tieto- ja sanakirjat[edit | edit source]

Meänkielen Wikipeetia poikkeaa esimerkiks siinä mielessä valtiolisista kielistä koska se luokittellee vähemistökielen näkökulmasta. Samoin vähemistökielen sanakirja häätyy ottaa kantaa ja luokitella vähemistökielen hakusanat, käänöskielet ja käsitheet: levike, tavvausnormi, murtheitten essiintymä, normatiivisuus, käänöskielet etc. Kuinka sanakirjan luokitelhaan heijastavat siviiliyhteiskunnan asentheita vähemöstökielheen.