Wp/bzj/Koat a aamz a Bileez

Bileez mek ih koat a aamz (er nashanal konchri stamp) ofishal wen ih mi geh indipendans, ahn di prezent koat a aamz oanli lee bit difrant fahn how ih mi deh wen Bileez da-mi British kalani (di Yoonyan Jak geh tek aaf, ahn wahn brong Kriol riplays wan a di blak Afrikan). Di rong boada a di koat mek bai fifti leef. Eensaid a di sirkl da wahn mahagni chree, ahn fronta it da wahn 3-pees protekshan aama weh ton opsaid dong. Eensaid a dis aama da di toolz a wahn udkota eena di tap sekshan dehn ahn wahn ship eena di batam paat. Dehnya stan fi di impoatans a mahagni eena di 18t ahn 19t senchri Bileezyan ikonomi.[3] Too difrant kala man, brong ahn blak, sopoat di aama. Di wan pahn di lef di hoal wahn eks, ahn di wan pahn di rait di hoal wahn padl. Agen, di impoatans a di mahagni ahn how dehnya mi impoatant tu boat bildin da weh ih stan fa. Da batam da di nashanal moto: SUB UMBRA FLOREO ("Anda di shayd Ah bloom/praspa"). Di flag a Bileez ga di koat a aamz da ih senta.