Wp/bew/Sura

Sura (hurup Arap Gundul: شوراء) atawa Sura' (hurup Arap Gundul: شوراء) atawa Muharam (hurup Arap Gundul: محرم) atawa Silih Haji (hurup Arap Gundul: سيليه حج) atawa Siti Haji (hurup Arap Gundul: سيتى حج) ada atu bulan pertama dalem almenak Selam atawa almenak Hijrah. Ari bulan 1 Suranya diperingetin sebagé Tahon Baru Selam. Dalem basa Arap, ni bulan digero'nya bulan Muḥarram (basa Arap: محرّم) nyang artinya 'nyang dipantang; nyang diharamin bakal perang'. Mangka, ni bulan juga' ada masup atu deri empat bulan haram nyang empat di dalem almenak Selam.

Terdisi

Di ni bulan, juga' ada atu ari nyang dianggep ari gedé ama orang Selam, ya'entu ari ʿĀsyurāʾ (basa Arap: عاشوراء) nyang jatoh pas tanggal 10-nya. Mengrikut pèrkah Ahlusunah (Suni), ni ari dianggep gedé, sebab di dalem riwayat hadis disebutin kalo ni ari ièlah kutika Nabi Musa diselametin deri Pir'aun punya pengudagan. Mangkanya, orang Suni di ni ari pada puasa (biasanya juga' ama puasa ari sebelonnya, tanggal 9 nama Tāsūʿā, biar kaga' nyaru ama orang Yahudi punya puasa nama Yôm Kippûr). Adapun kalo orang Si'ah, sebab ni ari dulunya – ari kutika Sayidina Husén, Bagènda Nabi Muhammad punya cucu, wapat di Kerbala, mangka, tu orang Si'ah saban tanggal 10-nya pada ngratap di Kerbala sebagé bentuk mahabah ama Sayidina Husén. Mangka lantaran ari gedé di tanggal sepulu nama ʿĀsyurāʾ, di basa Betawi digeronya ni bulan – 'bulan Sura'.

Selaèn entu, dalem sebagèan laèn terdisi, tanggal 10 Sura juga' kadang digero' sebagé "Lebaran Anak Yatim" atawa basa Arapnya عيد اليتامى ʿīd al-yatāmā nyang mana di ni ari, sebagèan orang pada lomba-lomba bikin baè' ama anak-anak yatim.