Wp/bew/Roah
Roah[1] (hurup Arap Gundul: روه) atawa Roa[2][3] (hurup Arap Gundul: رو[4] atawa روا) atawa Rewah[5] (hurup Arap Gundul: روه) atawa Sa'ban (hurup Arap Gundul: شعبان) ada bulan kelapan di almenak Selam atawa Hijriah. Ni bulan punya nama di basa Arapnya – Syaʿbān (basa Arap: شعبان), nyang asalnya deri kata شعب š-ʿ-b 'mencar'. Maksudnya, di jaman jahiliah, orang Arap pada mencar bakal nyari aèr. Di sebagèan wilayah dunia, umat Selam ada nyang ngeraya'in atu malem kusus di parohannya bulan Roah nyang kita sering gero' sebagé Malem Nispu (hurup Arap Gundul: مالم نصف; basa Arap: ليلة نصف شعبان laylat niṣf Syaʿbān 'Malem Separo Sa'ban'). Diyakinin, ni malem ada punya keutamaan.[6] Mangkanya, orang kita biasanya pada ke mesigit bakal ngaji Yā sīn tiga kali bareng-bareng. Selaèn entu, di kita punya terdisi juga' ada nyang namanya Roahan, ya'entu sedekah nyang dikususin di ni bulan.[3]
Ruju'an
- ↑ Grijns, C.D. (1991). Jakarta Malay. J. 2. KITLV Press. h. 119. Serènta juga' dengen macem pengocapan laènnya, kaya' Ruah, Ruwah, Roakh, Roèh, atawa Rowèh.
- ↑ Grijns, C.D. (1991). Jakarta Malay. J. 2. KITLV Press. h. 119. Serènta juga' dengen macem pengocapan laènnya, kaya' Ro'a, Rowa, atawa Roè.
- ↑ 3.0 3.1 Chaer, Abdul. (2009). Kamus Dialek Jakarta. K. Rép. Jakarta: Penerbit Masup Jakarta.
- ↑ von de Wall, H. (1880). Maleisch-Nederlandsch Woordenboek: Op het last van het Gouvernement van Nederlandsch-Indië. J. 2. Lansdrukkerij. h. 188.
- ↑ Grijns, C.D. (1991). Jakarta Malay. J. 2. KITLV Press. h. 119. Serènta juga' dengen macem pengocapan laènnya, kaya' Rawah, Rewèh, atawa Rèwè.
- ↑ Ṣaḥīḥ al-Jāmiʿ, no. 4268.