Rọṣia, mè ìre, Rọsia, mè ìre Rọshia (òrere Russia ubọk-ige-inu ebi uket-chieen̄, mè ire Российская Федерация me ubọk-ige-inu ebi Rọṣia, òkakana Rossiyskaya Federatsiya me inwenwene eririeen̄ ya itap me abichi Latin) ìre ido ge òkup me kọntinenti iba. Ìkup me Yurop agan̄ Mbum-ura mè me Esia agan̄ Inyọn̄.

Okwa-ido Rọṣia

Ìwele inan̄a me Okwaan̄ Baalitik me agan̄ ichep-ura isi ire lek Emen-awaji Pàsifik me agan̄ mbum-ura; mè iwele si inan̄a me Emen-awaji Atik me agan̄ inyọn̄ isi ire Okwaan̄ Ofifit mè Okwaan̄ Kasipian me agan̄ osiki. Okike ijọn̄ Rọṣia ìre 17,125,200 km² ikat ikana; ìkpulu irek ge me irek jeeta me lek otutuuk lek ijọn̄ ebi ene elukbe me linyọn̄. Îwele ichit agan̄-mgbọ akọp mè ge; ido akọp mè gweregwen etap ikana ọmọ. Mosikowu ore ama-ibot kan̄, mè ire si ama-ile òmimin ichit me ido yi. Ebi kè ofifi ama-ile ìsisibi isi me emen kan̄ ìre Saint Petersburg, Novosibirsk, Ekaterinborg, Kazan, Nizshny Novogorod, Chelyabinsk mè Samara.

Rọsia ore ido òmimin ichit me linyọn̄, mè ire òso onaan̄ge ene ewane ichit me emen me linyọn̄; mè ire si ido ene ewabe ichit me emen me Yurop. Ido yi ore ge me lek ebi kè ido ebi ene elukbe ida ibọkọ ichit me lek ebi ofifi ene [most sparsely populated] me linyọn̄; mè ire si ge me lek echi ìbebene igwuun̄ ichit [urbanized]. Ìkike-iba me lek ijọn̄ ido ya ìre akà oron; eya onenirọ inyi irek ini me irek go me lek ebi ìluk me ido ya eneluk me agan̄ ichep-ura, òrere agan̄ sọntiik me lek ido ya, sà agan̄ mbum-ura ke ebi ene ere ibot inen mè inen. Otu-ifuk ebi ìluluk me ido ya ìre efie 146.7 ene. Ama-ile agan̄ Mosikowu ore agan̄ ama-ile [metropolis] òmimin ichit me Yurop, mè ire si ge me lek echi ìmimiin̄ ichit me linyọn̄. Ebi ìluluk me emen agan̄ ama-ile Mosikowu mîwa iraka efie 20.

Nrọnnye[edit source]