Wn/shn/ၽွင်းလူင်ၵၢၼ်ၼွၵ်ႈမိူင်း ၵၢၼ်ႇ ႁွတ်ႈထိုင် မိူင်းၶႄႇ

ဝၼ်းၽတ်း၊ ဢေႇပရႄႇ 25၊ 2024 

ၽွင်းလူင် ၵၢၼ်ၼွၵ်ႈမိူင်း ဢမႄႇရိၵၢၼ်ႇ ပလိၼ်ႇၵႅၼ်ႇ

မိူဝ်ႈႁူဝ်ၶမ်ႈ ဝၼ်းမိူဝ်ႈၼႆႉ ဢၼ်ပဵၼ် ၽွင်းလူင်ၵၢၼ်ၼွၵ်ႈမိူင်း ဢမႄႇရိၵၢၼ်ႇ ဢၼ်ႇထူဝ်ႇၼီႇ ပလိၼ်ႇၵႅၼ်ႇ လႆႈႁွတ်ႈထိုင်ၵႂႃႇ တီႈ ဝဵင်းလူင်ပေႇၸိင်း၊ မိူင်းၶႄႇ သေ မိူဝ်ႈၽုၵ်ႈမႃး မီး တႃႇႁူပ်ႉထူပ်းၵၼ်တင်း ၽူႈဢွၼ်ႁူဝ်ၶႄႇယဝ်ႉ။ တွၼ်ႈၸဝ်ႉမိူဝ်ႈၼႆႉတႄႉ လႆႈႁူပ်ႉထူပ်း ၽူႈမီးပုၼ်ႈၽွၼ်း လူင်ပွင်ၸိုင်ႈပိုၼ်ႉတီႈ တီႈဝဵင်းသျင်ႇႁၢႆး ဢၼ်ပဵၼ်ဝဵင်းလမ်ႇလွင်ႈ တွၼ်ႈတႃႇ ၵၢၼ်ငိုၼ်းတွၼ်းၼၼ်ႉယဝ်ႉ။ မိူဝ်ႈႁူပ်ႉထူပ်းၵၼ်တင်း ၶျႅၼ်ႇၸၢင်း ဢၼ်ပဵၼ် ၽူႈၼမ်းၼႂ်း ပႃႇတီႇၶွမ်ႇမိဝ်ႇၼိတ်ႉၶႄႇ ၼၼ်ႉ မၼ်းလၢတ်ႈဝႃႈ လွင်ႈႁူမ်ႈႁွမ်းသိူၵ်ႈသမ်ႇ ၼႂ်းၵႄႈ မိူင်းသွင်မိူင်းၼႆႉ ပဵၼ်ဢၼ်လမ်ႇလွင်ႈ ဝႃႈၼႆယဝ်ႉ။

ၽွင်းလူင်ၵၢၼ်ၼွၵ်ႈမိူင်း ပလိၼ်ႇၵႅၼ်ႇလၢတ်ႈဝႃႈ “တွၼ်ႈတႃႇ ဢမႄႇရိၵၢၼ်ႇ လႄႈ ၵူၼ်းမိူင်းၶႄႇ ဢိၵ်ႇတင်း တွၼ်ႈတႃႇၵမ်ႇၽႃႇၼႆႉ တႃႇ ၼႂ်းၵႄႈ ဢမႄႇရိၵၢၼ်ႇ လႄႈ မိူင်းၶႄႇ မီးပုၼ်ႈၽွၼ်း တႃႇဝႆႉလွင်ႈၵပ်းသိုပ်ႇတိတ်းတေႃႇ ဢၼ်ႁူႉပုၼ်ႈၽွၼ်းသေ ၵပ်းၵၢႆႇလူၺ်ႈ ပုၼ်ႈၽွၼ်းၼႆႉသေ ၽၢႆႇဢမႄႇရိၵၢၼ်ႇၵေႃႈ လႆႈဝႆႉၼၵ်းၼႃယူႇ“ ဝႃႈၼႆယဝ်ႉ။

မိူဝ်ႈႁူပ်ႉထူပ်းၵၼ်တင်း ၶျႅၼ်ႇၸၢင်း ဢၼ်ပဵၼ် ၽူႈၼမ်းၼႂ်း ပႃႇတီႇၶွမ်ႇမိဝ်ႇၼိတ်ႉၶႄႇ ၼၼ်ႉ မၼ်းလၢတ်ႈဝႃႈ လူဝ်ႇပိုတ်ႇဝႆႉလႆႈ သဵၼ်ႈတၢင်းၵပ်းသိုပ်ႇ ၼႂ်းၵႄႈ မိူင်းသွင်မိူင်း၊ ပေႃးမီးမႃး တၢင်းႁၼ်ထိုင် ဢၼ်ဢမ်ႇမိူၼ်ၵၼ်ၼႆ ႁူပ်ႉထူပ်းတေႃႇၼႃႈၵၼ် ၵႄႈလိတ်ႈသေ ႁႂ်ႈမီးလွင်ႈႁူမ်ႈႁွမ်းႁဵတ်းသၢင်ႈၵႂႃႇ ဢၼ်ဝႃးၼၼ်ႉ ၸဝ်ႈၸွမ်ၸိုင်ႈ ဢမႄႇရိၵၢၼ်ႇ ၵျူဝ်း ပၢႆႇတႅၼ်ႇ ဢိၵ်ႇတင်း ၸဝ်ႈၸွမ်ၸိုင်ႈၶႄႇ သျီႇၶဝ် လႆႈဢွၼ်ၵၼ် ပႆၸွမ်းသဵၼ်ႈတၢင်းၼႆႉယူႇ ဝႃႈၼႆ။ ၽူႈမီးသုၼ်ႇလၢတ်ႈ ထၢၼ်ႈၵၢၼ်ၼွၵ်ႈမိူင်း မႅတ်ႉတိဝ်း မီႇလ်လႃႇ မွၵ်ႇလၢတ်ႈ ၽူႈဢဝ်ၶၢဝ်ႇၶဝ်ဝႃႈ ၽွင်းလူင် ပလိၼ်ႇၵႅၼ်ႇ မွၵ်ႇလၢတ်ႈ တီႈ ပၢင်ဢုပ်ႇဢူဝ်းဝႃႈ တီႈၼႂ်းၵႄႈ ၶႄႇ လႄႈ ဢမႄႇရိၵၢၼ်ႇၼႆႉ ၶႂ်ႈႁႂ်ႈမၼ်းမီးလွင်ႈၶႄႉၶဵင်ႇပၢႆးမၢၵ်ႈမီး ဢၼ် ၽဵင်ႇပဵင်းၵၼ်သေ ၵၢၼ်ငၢၼ်းပၢႆးမၢၵ်ႈမီးဢမႄႇရိၵၢၼ်ႇ ၸိူဝ်းမီးတီႈၼႂ်း မိူင်းၶႄႇၼၼ်ႉၵေႃႈ ႁႂ်ႈလႆႈမီးသၢႆငၢႆၽဵင်ႇၽဵင်ႇပဵင်းပဵင်း တွၼ်ႈတႃႇ ၶႄႉၶဵင်ႇၵၼ်တင်း ၵၢၼ်ငၢၼ်းၶႄႇ ၼၼ်ႉၵေႃႈ ပဵၼ်ဢၼ်လမ်ႇလွင်ႈဝႆႉ ဝႃႈၼႆႉယဝ်ႉ။

မိူဝ်ႈတွၼ်ႈၸဝ်ႉ ၵွၼ်ႇၼႃႈ ပၢင်ႁူပ်ႉထူပ်းၼၼ်ႉ ၽွင်းလူင် ပလိၼ်ႇၵႅၼ်ႇ လႆႈႁူပ်ႉထူပ်းဢုပ်ႇဢူဝ်းၵၼ်တင်း လုၵ်ႈႁဵၼ်း ဢမႄႇရိၵၢၼ်ႇ လႄႈ ၶႄႇ ၸိူဝ်းတိုၵ်ႉၶိုၼ်ႈႁဵၼ်းယူႇတီႈ ၸၼ်ႉၸွမ်ၼိဝ်းယွၵ်ႉ ဢၼ်ပိုတ်ႇဝႆႉတီႈ သျင်ႇႁၢႆးၼၼ်ႉယဝ်ႉ။ မိူဝ်ႈၽုၵ်ႈမႃးတႄႉ ၽွင်းလူင် ပလိၼ်ႇၵႅၼ်ႇၼႆႉ မီးတႃႇႁူပ်ႉထူပ်းၵၼ်တင်း ၽွင်းလူင် ၵၢၼ်ၼွၵ်ႈမိူင်းၶႄႇ ဝင်ယီႈသေ ပေႃးဝၢႆးဝၼ်း ဝၼ်းသုၵ်းမႃးၵေႃး မီးတႃႇႁူပ်ႉထူပ်းၵၼ်တင်း ၸဝ်ႈၸွမ်ၸိုင်ႈ သျီႇၸိင်းပိင်ႇ ဝႃႈၼႆယဝ်ႉ။

ငိူၼ်ႈငဝ်ႈတိုၼ်း

• Ana Swanson. "Blinken Tours China to Promote Some Ties, While the U.S. Severs Others" — The New York Times, April 25, 2024
• Julian Borger. "Antony Blinken arrives in China with warning for Beijing over support of Russia" — The Guardian, April 24, 2024
• Matthew Lee. "Blinken raises Chinese trade practices in meetings with officials in the financial hub of Shanghai" — Associated Press, April 25, 2024
• Simon Lewis. "In China, Blinken urges fair treatment of American companies" — Reuters, April 25, 2024