Wn/shn/ၼႂ်းၶၢဝ်းတၢင်းမိူင်းၶႄႇ ၽွင်းလူင်ၵၢၼ်ၼွၵ်ႈမိူင်း ၵၢၼ်ႇ လႅပ်ႈတေဢုပ်ႇပႃးလွင်ႈ မျၢၼ်ႇမႃႇ

Add links
From Wikimedia Incubator
< Wn‎ | shn
Wn > shn > ၼႂ်းၶၢဝ်းတၢင်းမိူင်းၶႄႇ ၽွင်းလူင်ၵၢၼ်ၼွၵ်ႈမိူင်း ၵၢၼ်ႇ လႅပ်ႈတေဢုပ်ႇပႃးလွင်ႈ မျၢၼ်ႇမႃႇ

ဝၼ်းဢႃးတိတ်ႉ၊ ဢေႇပရႄႇ 21၊ 2024

လိၵ်ႈႁွမ်တွမ် ၸိူဝ်းၵဵဝ်ႇၵပ်း
ဢွင်ႈတီႈ မိူင်းႁူမ်ႈတုမ် ဢမႄႇရိၵ
ႁူမ်ႈသၢင်ႈ!
Wn/shn/မိူင်းႁူမ်ႈတုမ် ဢမႄႇရိၵ
Wn/shn/မိူင်းႁူမ်ႈတုမ် ဢမႄႇရိၵ
ၽွင်းလူင်ၵၢၼ်ၼွၵ်ႈမိူင်း ဢမႄႇရိၵၢၼ်ႇ ဢၼ်ထူဝ်ႇၼီႇ ပလိၼ်ႇၵႅၼ်ႇ

ၽူႈမီးပုၼ်ႈၽွင်း လူင်ပွင်ၸိုင်ႈဢမႄႇရိၵၢၼ်ႇ လၢတ်ႈၸူး ႁွင်ႈၵၢၼ်ၶၢဝ်ႇရၢႆႉတႃႇဝႃး ၼႂ်းၵႃႈၶၢဝ်းတၢင်းမိူင်းၶႄႇ ၽွင်းလူင်ၵၢၼ်ၼွၵ်ႈမိူင်း ဢမႄႇရိၵၢၼ်ႇ ဢၼ်ႇထူဝ်ႇၼီႇ ပလိၼ်ႇၵႅၼ်ႇ ဢၼ်တေ ၵႂႃႇၼႂ်းဝူင်ႈၼႃႈမႃးၼၼ်ႉ မီးတႃႇဢုပ်ႇဢူဝ်း လွင်ႈလိူင်ႈၵမ်ႇၽႃႇ လႄႈ ဢိၵ်ႇတင်း လိူင်ႈမျၢၼ်ႇမႃႇ ဝႃႈၼႆယဝ်ႉ။

ၽွင်းလူင်ၵၢၼ်ၼွၵ်ႈမိူင်း ဢမႄႇရိၵၢၼ်ႇ ဢၼ်ထူဝ်ႇၼီႇ ပလိၼ်ႇၵႅၼ်ႇ ၼႆႉ မၼ်းလႆႈၶပ်းၶိုင်ဝႆႉၶၢဝ်းတၢင်းၶႄႇ ဢၼ်ပဵၼ်ပွၵ်ႈၵမ်းသွင် တႄႇဢဝ် ဢေႇပရႄႇ 24 တေႃႇ 26 သေ မီးတႃႇႁူပ်ႉထူပ်းဢုပ်ႇဢူဝ်းၵၼ်တင်း ၽူႈမၼ်းၸၼ်ႉ ထၢၼ်ႈယႂ်ႇ ၶႄႇ ၵႃႈတီႈ ဝဵင်းပႄႇၸိင်း လႄႈ သျင်ႇႁၢႆး ၼၼ်ႉယဝ်ႉ။ ၼႆႉၵေႃႈ မၼ်းပဵၼ် ၽွင်းတၢင်မိူင်းၸၼ်ႉသုင် ဢမႄႇရိၵၢၼ်ႇ တေၵႂႃႇမိူင်းၶႄႇ ၽွင်းမိူဝ်ႈ တီႈလႅၼ်လိၼ် မိူင်းမၢၼ်ႈ မိူင်းၶႄႇ ဢိၵ်ႇတင်း လႅၼ်လိၼ် ဢၼ်ဢိူမ်ႈၵၼ်တင်း မိူင်းႁိမ်းႁွမ်းၼၼ်ႉ လႆႈမီးပၢင်တိုၵ်းႁၢဝ်ႈႁႅင်း ၼႂ်းၵႄႈ ၶွင်ႇသီႇသိုၵ်းမၢၼ်ႈ လႄႈ ႁႅင်းလုၵ်ႉၽိုၼ်ႉ ၸုမ်းၸၢဝ်းၶိူဝ်းၶဝ်ၼၼ်ႉယူႇယဝ်ႉ။

ၼႆႉၵေႃႈမၼ်းမႅၼ်ႈ ၽွင်း ထၢၼ်ၽွင်းလူင်ၵၢၼ်ၼွၵ်ႈမိူင်း လၢတ်ႈ တီႈပၢင်ၵုမ်ၶွင်ႇသီႇပၢႆးႁူမ်ႇလူမ်ႈ ၸၢတ်ႈၸိုင်ႈလုမ်ႈၾႃႉ ဢၼ်ၸတ်းႁဵတ်း မိူဝ်ႈတွၼ်ႈၸဝ်ႉၼႆႉဝႃႈ သၢႆငၢႆ မိူင်းမၢၼ်ႈ ဢၼ်ပဵၼ်ယူႇယၢမ်းလဵဝ်ၼႆႉ မၼ်းမီးလွင်ႈလွၵ်ႇငိူတ်ႈၼိူဝ် ပၢႆးႁူမ်ႇလူမ်ႈ ပိုၼ်ႉတီႈ လႄႈ မိူင်းယူႇႁိမ်းၵိၼ်ၸမ်ၵၼ်ယူႇ ဢၼ်ဝႃႈၼၼ်ႉယဝ်ႉ။

ၼႂ်းၶၢဝ်းတၢင်းၼႆႉ မီးတႃႇဢုပ်ႇဢူဝ်း လွင်ႈယၢပ်ႇယဵၼ်း ပွတ်းဢွၵ်ႇတွၼ်ႈၵၢင်၊ တွၼ်ႈတႃႇ ယႃႇႁႂ်ႈၶႄႇ ၵမ်ႉထႅမ်ပၼ် ရတ်ႈသျႃး ဢၼ်ပဵၼ်ပၢင်တိုၵ်းၵၼ်တင်း ယူႇၶရဵၼ်း၊ လွင်ႈၶႄႇ ပၢၼ်းတႃႉ တီႈၼႂ်းပၢင်ႇလၢႆႇၸၢၼ်းၶႄႇ လႄႈ လွင်ႈၵၢဝ်းလီႁွင်ႇၶဝ် ဢမ်ႇဝူၼ်ႉဢမ်ႇသွၼ်ႇသင် ႁဵတ်းသၢင်ႈ လွၵ်ႈငိူတ်ႈယူႇ ၸိူဝ်းၼႆႉယဝ်ႉ။

ၶၢဝ်းတၢင်း ၽွင်းလူင်ပလိၼ်ၵႅၼ်ႇၼႆႉ လႆႈမီးမႃး ၽွင်းမိူဝ်ႈ ဢမႄႇရိၵၢၼ်ႇၶဝ် ပၼ်ၽၢင်ႉၶႄႇဝႃႈ ယႃႇဢဝ် ၶိူင်ႈမဵဝ်းတေ ၸၢင်ႈၸႂ်ႉတီႈ ပၢင်တိုၵ်းယူႇၶရဵၼ်းၼၼ်ႉ ၵမ်ႉထႅမ်ပၼ် ရတ်ႈသျႃး ဢၼ်ဝႃႈၼၼ်ႉယဝ်ႉ။ ၽၢႆႇဢမႄႇရိၵၢၼ်ႇၶဝ် လႆႈပၼ်ၽၢင်ႉယူႇဝႃး ႁူင်းၵၢၼ်ၶႄႇၶဝ် လႆႈဢဝ် ၶိူင်ႈလမ်ႇလွင်ႈ ဢၼ်ၸၢင်ႈၸႂ်ႉတီႈ ၵၢၼ်ငၢၼ်းပၢႆးၸၢၵ်ႈလွင်ႈၵႅတ်ႇၵင်ႈ ရတ်ႈသျႃး ၼၼ်ႉ ၵမ်ႉထႅမ်ပၼ် ရတ်ႈသျႃးၵမ်းသိုဝ်ႈယူႇ ဝႃႈၼႆယဝ်ႉ။

ယွၼ်ႉပိူဝ်ႈဝႃႈ ၽူႈမီးၸၼ်ႉထၢၼ်ႈယႂ်ႇဢမႄႇရိၵၢၼ်ႇ ၵေႃႉၼိုင်ႈ လႆႈမွၵ်ႇလၢတ်ႈ ၽူႈဢဝ်ၶၢဝ်ႇၶဝ်ဝႃႈ ဢမႄႇရိၵၢၼ်ႇ မီးလွင်ႈတႃႇဢဝ်လိူင်ႈၼိူဝ် ႁူင်းၵၢၼ်ၶႄႇ ၸိူဝ်းၼၼ်ႉၼႆလႄႈ ၼႂ်းၶၢဝ်းတၢင်း ပလိၼ်ႇၵႅၼ်ႇၵမ်းၼႆႉၵေႃႈ လွင်ႈတၢင်းဢၼ်ၼႆႉ လႅပ်ႈတေပဵၼ် လွင်ႈပိူင်လူင် ဢၼ်တႃႇဢုပ်ႇဢူဝ်းၵၼ်ၵႂႃႇၼၼ်ႉယူႇ။

ၼႂ်းၵႃႈလွင်ႈတၢင်း တႃႇဢုပ်ႇဢူဝ်းတၢင်ႇၸိူဝ်းၼႆႉ တေ ၶဝ်ႈပႃး လွင်ႈတႃႇတိုၵ်းတေႃးယႃႈမဝ်းၵမ်၊ တႃႇလွင်ႈၵပ်းသိုပ်ႇ ၵဵဝ်ႇၵပ်းၵၢၼ်သိုၵ်း မိူင်းသွင်မိူင်း ႁႂ်ႈႁႅင်းယႂ်ႇမႃး၊ တႃႇၸတ်းႁဵတ်းလႆႈ ပၢင်ဢုပ်ႇဢူဝ်း ဢၼ်ၵဵဝ်ႇၵပ်း လွင်ႈလွတ်ႈၽေး ပၢႆးၸၢင်ႈ ဢွၵ်းပွမ် လႄႈ လွင်ႈတႃႇၶူၼ်ႉႁႃ လွၵ်းလၢႆး တႃႇႁႂ်ႈလွင်ႈၵပ်းသိုပ်ႇ ၵူၼ်းမိူင်းၼင်ႇၵၼ် တင်းသွင်ပႃႈသွင်ၽၢႆႇ ႁႂ်ႈတိူဝ်းမၼ်ႈၵႅၼ်ႇလီမႃး ၼႆယဝ်ႉ။

ၼႂ်းၵႃႈ ၽူႈမီးၸၼ်ႉထၢၼ်ႈယႂ်ႇ တီႈ ထၢၼ်ႈၽွင်းလူင် ၵၢၼ်ၼွၵ်ႈမိူင်း ဢမႄႇရိၵၢၼ်ႇ ဢၼ်တေ ပႃးၵႂႃႇၸွမ်း ပလိၼ်ႇၵႅၼ်ႇၼၼ်ႉ ၶဝ်ႈပႃး Todd Robinson ဢၼ်ပဵၼ် ၽူႈမီးၸၼ်ႉ ၽၢႆႇၵုမ်းထိင်းယႃႈမဝ်းၵမ် လႄႈ လႆႈမုင်းမွင်းဝႆႉ တႃႇဢုပ်ႇဢူဝ်း လွင်ႈတႃႇႁႄႉၵင်ႈလႆႈ ယႃႈမဝ်းၵမ် ၾႅၼ်းတၼႄးလ် (Fentanyl) ဢၼ်မီးၽေးၶဵၼ်လူင် တေႃႇ ဢသၢၵ်ႈၵူၼ်း ဢၼ်လုၵ်ႉတီႈ မိူင်းၶႄႇ လႆၶဝ်ႈၸူး ဢမႄႇရိၵၢၼ်ႇၼၼ်ႉယူႇ ၼႆယဝ်ႉ။

ၽူႈမီးၸၼ်ႉ ထၢၼ်ႈယႂ်ႇ ထၢၼ်ၽွင်းလူင် ၵၢၼ်ၵႅတ်ႇၵင်ႈ လၢတ်ႈတီႈ ပၢင်ၸႅင်ႈၶၢဝ်ႇ မိူဝ်ႈဝၼ်းသုၵ်းၼၼ်ႉဝႃႈ “မိူင်းႁူမ်ႈတုမ် ဢမႄႇရိၵၢၼ်ႇ ၼႆႉ ၵဵဝ်ႇၵပ်းလူၺ်ႈ လွင်ႈတၢင်း ၸိူဝ်းဢၼ်တေ ဢုပ်ႇဢူဝ်းၵၼ်ၼၼ်ႉသေ ၵဵဝ်ႇၵပ်းလူၺ်ႈ သၢႆငၢႆ လွင်ႈဢၼ်တေ ၸၢင်ႈဢွင်ႇမၢၼ်ၼၼ်ႉ လႆႈမုင်ႈႁၼ်ဝႆႉ ၸႅင်ႈလႅင်းလီယဝ်ႉ“ ဝႃႈၼႆ။ ၵူၺ်းၵႃႈဝႃႈ ၽူႈလဵပ်ႈႁဵၼ်းၵမ်ႈၽွင်ႈ လၢတ်ႈဝႃႈတႄႉ ပႆႇမုင်ႈမွင်းလႆႈ ၽွၼ်းၶိုပ်ႈၼႃႈယႂ်ႇယႂ်ႇလူင်လူင် တီႈပၢင်ဢုပ်ႇဢူဝ်း ၼၼ်ႉ ဝႃႈၼႆယဝ်ႉ။


ငိူၼ်ႈငဝ်ႈတိုၼ်း[edit | edit source]

Retrieved from "https://incubator.wikimedia.org/w/index.php?title=Wn/shn/ၼႂ်းၶၢဝ်းတၢင်းမိူင်းၶႄႇ_ၽွင်းလူင်ၵၢၼ်ၼွၵ်ႈမိူင်း_ၵၢၼ်ႇ_လႅပ်ႈတေဢုပ်ႇပႃးလွင်ႈ_မျၢၼ်ႇမႃႇ&oldid=6273845"