Wn/shn/ၸွမ်ၸိုင်ႈ ယူႇၶရဵၼ်း လႄႈ တိူဝ်ႇၵီႇ ငူပ်ႉငိၵၼ် တႃႇဢုပ်ႇၵုမ်လွင်ႈငမ်းယဵၼ်တင်း ရတ်ႈသျႃး

ဝၼ်းသဝ်၊ မၢတ်ႉၶျ် 9၊ 2024 

ၸွမ်ၸိုင်ႈ တိူဝ်ႇၵီႇ လႄႈ ၸွမ်ၸိုင်ႈ ယူႇၶရဵၼ်း

မိူဝ်ႈဝၼ်းသုၵ်းၼၼ်ႉ ၸွမ်ၸိုင်ႈယူႇၶရဵၼ်း Volodymyr Zelenskyy လႆႈၵႂႃႇ ဢိတ်ႇသ်တၼ်ႇပူႇလ် တႃႇႁူမ်ႉထူပ်းၵၼ်တင်း ၸွမ်ၸိုင်ႈ တိူဝ်ႇၵီႇ Recep Tayyip Erdogan ၼႆယဝ်ႉ။

ၽူႈဢွၼ်ႁူဝ်သွင်ၵေႃႉၼႆႉ တေဢုပ်ႇဢူဝ်းလွင်ႈ ပၢင်သိုၵ်း ယူႇၶရဵၼ်း-ရတ်ႈသျႃး၊ ၶေႃႈၽွမ်ႉၸႂ် တႃႇတၢင်ႇမၢၵ်ႇၶဝ်ႈတဝ်ႈၼမ်ႉ တီႈထုင်ႉပၢင်ႇလၢႆႇလမ် လႄႈ တေဢုပ်ႇပႃး လွင်ႈၶႃႈသိုၵ်းယူႇၶရဵၼ်း လႄႈ ၵူၼ်းတူၵ်းၶွၵ်ႈၵၢၼ်မိူင်း ဢၼ်ရတ်ႈသျႃးၶဝ် ၺွပ်းဝႆႉၼၼ်ႉၼႆ လုၵ်ႉတီႈလုမ်း ၸွမ်ၸိုင်ႈ Zelenskyy လႆႈပိုၼ်ၽၢဝ်ႇဝႆႉသေ တီႈၶၢဝ်ႇတိူဝ်ႇၵီႇၵေႃႈ တၢင်ႇဝႆႉၼင်ႇၼၼ်ယဝ်ႉ။

ၼႂ်းၵႃႈၶၢဝ်းတၢင်း သွင်ပီ ဢၼ်ပဵၼ် ပၢင်သိုၵ်း ယူႇၶရဵၼ်း-ရတ်ႈသျႃး ၼၼ်ႉ မိူင်းတိူဝ်ႇၵီႇ ဢၼ်ပဵၼ်လုၵ်ႈၸုမ်း NATO ၼႆႉ ယွၼ်ႉပိူဝ်ႈမီး လွင်ႈၵပ်းသိုပ်ႇလီၵၼ်တင်း သွင်ၽၢႆႇသွင်မိူင်းလႄႈ လႆႈဢွၼ်ၵၼ်မုင်ႈမွင်း တႃႇတိုၵ်းသူၼ်း ႁႂ်ႈပဵၼ်မႃး ၵၢၼ်ငူပ်ႉငိ လွင်ႈငမ်းယဵၼ် တီႈၼႂ်းၵႄႈ မိူင်းသွင်မိူင်းၼၼ်ႉယူႇ။ ၽွင်းလူင်ၵၢၼ်ၼွၵ်ႈမိူင်း Hakan Fidan ၵေႃႈ မိူဝ်ႈဝူင်ႈပူၼ်ႉၼၼ်ႉ လႆႈထူပ်းၵၼ်တင်း ၽွင်းလူင်ၵၢၼ်ၼွၵ်ႈမိူင်း ရတ်ႈသျႃး Sergey Lavrov သေ လႆႈတိုၵ်းသူၼ်း တႃႇႁဵတ်း ပၢင်ဢုပ်ႇဢူဝ်းတႃႇၵိုတ်းလွင်ႈတိုၵ်း တီႈၼႂ်းၵႄႈ ယူႇၶရဵၼ်ႈ လႄႈ ရတ်ႈသျႃးသေ လွင်ႈဢုပ်ႇဢူဝ်းဢၼ်ၼႆႉ ဢၼ်းဢမ်ႇႁႂ်ႈသွၼ်ႇဝႃႈပဵၼ် လွင်ႈမၵ်းမၼ်ႈ ဢၼ်ရတ်ႈသျႃးၶဝ် ပူၼ်ႉပႅၼ် ဝႃႈၼႆယဝ်ႉ။

ၶၢဝ်းတၢင်း တိူဝ်ႇၵီႇ ဢၼ် ၸွမ်ၸိုင်ႈယူႇၶရဵၼ်း Zelenskyy ၵႂႃႇၼႆႉ မၼ်းပဵၼ်ဢွၼ်တၢင်း ၶၢဝ်းတၢင်း ၸွမ်ၸိုင်ႈရတ်ႈသျႃး Vladimir Putin ဢၼ်တေမႃး ဝၢႆးလင် ႁဵတ်းပၢင်လိူၵ်ႈတင်ႈရတ်ႈသျႃးယဝ်ႉ ဢၼ်ပဵၼ်ဝၼ်းတီႈ လိူၼ်မၢတ်ႉၶ်ျ 15 တေႃႇ 17 ဝၼ်းၼၼ်ႉယဝ်ႉ။ တိူဝ်ႇၵီႇၼႆႉ မီးလႅၼ်ၼမ်ႉပၢင်ႇလၢႆလမ် ဢၼ်ဢိူမ်ႈၵၼ်ၼင်ႇ ယူႇၶရဵၼ်း-ရတ်ႈသျႃးသေ ၼင်ႇႁိုဝ် ယူႇၶရဵၼ်းၶဝ် တေတေႃႉသူင်ႇလႆႈ မၢၵ်ႇတဝ်ႈၶဝ်ႈၼမ်ႉ ၼႂ်းပၢင်ႇလၢႆႇလမ်ၼၼ်ႉ မိူဝ်းတိူဝ်ႇၵီႇ လႆႈၶဝ်ႈငူပ်ႉငိပၼ်တင်း ရတ်ႈသျႃးၼၼ်ႉယဝ်ႉ။

ငိူၼ်ႈငဝ်ႈတိုၼ်း

• VOA News. "Zelenskyy, Erdogan Discuss Peace Prospects Between Ukraine, Russia" — VOA News, March 8, 2024
• VOA News. "ရုရှားနဲ့ ငြိမ်းချမ်းရေးဆွေးနွေးဖို့ အလားအလာ ယူကရိန်း နဲ့ တူရကီသမ္မတ ညှိနှိုင်း" — VOA News, March 9, 2024