Wn/shn/ၸွမ်ၸိုင်ႈရတ်ႈသျႃး ပၼ်ၽၢင်ႉ ယႃႇႁႂ်ႈပွႆႇတပ်ႉမိူင်းဝၼ်းတူၵ်း မႃးတီႈ ယူႇၶရဵၼ်း

ဝၼ်းသုၵ်း၊ မၢတ်ႉၶျ် 1၊ 2024 

ၸွမ်ၸိုင်ႈရတ်ႈသျႃး ဝလႃႇၻီႇမီႇလ် ပူႇထိၼ်ႇ

တီႈမိူင်းရတ်ႈသျႃးၼႆႉ မီးဝႆႉၶိူင်ႈလၢၵ်ႈၼၢၵ်ႈ ဢၼ်ယိူင်းပိုတ်းယိုဝ်းလႆႈၸူးထိုင် မိူင်းဝၼ်းတူၵ်းသေ သင်ၸိူဝ်ႉဝႃႈ တေပွႆႇတပ်ႉမိူင်းဝၼ်းတူၵ်းမႃးတီႈ ယူႇၶရဵၼ်းၼႆ မီးၽေးၶဵၼ်း တႃႇတေတႄႇ ပၢင်တိုၵ်းၼိဝ်ႇၵလီးယႃးၼႆ ၸွမ်ၸိုင်ႈ ရတ်ႈသျႃး ဝလႃႇၻီႇမီႇလ် ပူႇထိၼ်ႇ လႆႈပၼ်ၽၢင်ႉၵႂႃႇယူႇယဝ်ႉ။

လိူဝ်သေၼၼ်ႉဢမ်ႇၵႃး တီႈလွင်ႈသုၵ်ႉယုင်ႈၵၢၼ်သိုၵ်း ဢၼ်ပဵၼ်ယူႇယၢမ်းလဵဝ်ၼႆႉ မၼ်းမီးဝႆႉၽေးၶဵၼ်ၶေ ဢၼ်တေၸၢင်ႈၸႂ်ႉ ၶိူင်ႈၼိဝ်ႇၵလီးယႃးသေ တိုၵ်းလႄႈ မၼ်းတေၸၢင်ႈႁႂ်ႈ တူင်ႇဝူင်းၵူၼ်းလႆႈလူႉလႅဝ်ၵႂႃႇၼႆ ၸိူဝ်းပဵၼ် မိူင်းဝၼ်းတူၵ်းၶဝ် လီလႆႈပွင်ႇၸႂ်ဝႆႉၼႆ ၸွမ်ၸိုင်ႈရတ်ႈသျႃး လႆႈသႂ်ႇမွၵ်ႇလၢတ်ႈၵႂႃႇ တီႈၼႂ်း ၶေႃႈမွၵ်ႇလၢတ်ႈၶွပ်ႈၶူပ်ႇ လၵ်းၵၢၼ်ၸိုင်ႈမိူင်းမၼ်းၼၼ်ႉယဝ်ႉ။ ႁူမ်ႈဝႃႈ ၸွမ်ၸိုင်ႈရတ်ႈသျႃး လၢတ်ႈၸိူင်ႉၼႆယူႇသေတႃႉ မိူင်းဝၼ်းတူၵ်းၶဝ်ၼႆႉ တႄႇဢဝ် ရတ်ႈသျႃး ၶဝ်တိုၵ်း ၸဵမ်မိူဝ်ႈ ပီ 2022 ၼၼ်ႉယဝ်ႉသေ ၶဝ်လႆႈဢဝ်ၶိူင်ႈလၢၵ်ႈၼၢၵ်ႈ သူင်ႇပၼ်ၸူး ယူႇၶရဵဵၼ်းတင်းၼမ်သေတႃႉ တႃႇ တေသူင်ႇၵူၼ်းသိုၵ်း တပ်ႉသိုၵ်းၸူးယူႇၶရဵၼ်း တႃႇႁူမ်ႈမိုဝ်းၵၼ်တိုၵ်း ရတ်ႈသျႃးၶိုၼ်း ဢၼ်ဝႃႈၼၼ်ႉ ဢမ်ႇႁၼ် မိူင်းလႂ်လၢတ်ႈမႃးၼင်ႇၵဝ်ႇ။

ၸွမ်ၸိုင်ႈ ၾရၢင်ႇသဵတ်ႈ Emmanuel Macron လၢတ်ႈမိူဝ်ႈ ဝူင်ႈဝၢင်ႈပူၼ်ႉမႃးၼၼ်ႉဝႃႈတႄႉ ႁူမ်ႈဝႃႈ ဢမ်ႇမီးၶပ်ႉမၢႆ တႃႇဢဝ်တပ်ႉမိူင်းဝၼ်းတူၵ်း သူင်ႇၸူး တီႈယူႇၶရဵၼ်းသေတႃႉ မၼ်းၵေႃႈ တိုၵ်ႉၸၢင်ႈပဵၼ်လႆႈယူႇ ဝႃႈၼႆယဝ်ႉ။ ယူႇၶရဵၼ်းၼႆႉ မၼ်းပႆႇၸႂ်ႈ လုၵ်ႈၸုမ်း NATO ဢၼ်ပဵၼ် ၸုမ်းဢူၺ်းလီၵၢၼ်သိုၵ်း မိူင်းဝၼ်းတူၵ်းၼၼ်ႉလႄႈ တွၼ်ႈတႃႇ ၵႅတ်ႇၵင်ႈပၼ် ယူႇၶရဵၼ်းၼၼ်ႉ ၸိူဝ်းပဵၼ် မိူင်းဝၼ်းတူၵ်းၶဝ် ဢမ်ႇပႆႇႁဵတ်းသၢင်ႈပၼ်သင်တႄႉတႄႉဝႃႈဝႃႈ။

ၸွမ်ၸိုင်ႈရတ်ႈသျႃး ဝလႃႇၻီႇမီႇလ် ပူႇထိၼ်ႇ မွၵ်ႇလၢတ်ႈတီႈၼႂ်း ၶေႃႈမွၵ်ႇလၢတ်ႈမၼ်းဝႃႈတႄႉ တပ်ႉၼိဝ်ႇၵလီးယႃး ရတ်ႈသျႃးၼႆႉ ပဵၼ်ဢၼ်တူဝ်ႈတၼ်းဝႆႉလီငၢမ်းယဝ်ႉ ဝႃႈၼႆ။

မိူဝ်ႈဝၼ်းပုတ်ႉၼၼ်ႉ ၸွမ်ၸိုင်ႈ ၸႄႇလႅၼ်ႇသၵီး လႆႈယွင်ႈယေႃး ပႄႇၵျီႇယႅမ်ႇ တွၼ်ႈတႃႇ လွင်ႈပၼ်ၵႂၢမ်းမၼ်ႈ တႃႇၸွႆႈထႅမ်ပၼ် ၶိူင်ႈလၢၵ်ႈၼၢၵ်ႈ ဢၼ်ၵူၼ်းသိုၵ်းယူႇၶရဵဵၼ်းၶဝ်လူဝ်ႇယူႇ ဢၼ်ပဵၼ် ၶပ်ႉမၢႆ မိူင်းၶျႅႅၵ်ႈၶဝ်ဢွၼ်ႁူဝ် ၶပ်ႉၶိုင်ယူႇၼၼ်ႉယဝ်ႉ။ ၸွမ်ၽွင်းလူင် ပႄႇၵျီႇယႅမ်ႇ Alexander De Croo မွၵ်ႇလၢတ်ႈဝႃႈ ပႄႇၵျီႇယႅမ်ႇၼႆႉ တေၵမ်ႉထႅမ်ပၼ်ငိုၼ်း တႃႇ $216 လၢၼ်ႉ တွၼ်ႈတႃႇ လွင်ႈၶတ်းၸႂ်သႂ်ႇႁႅင်းၶဝ် ဝႃႈၼႆယဝ်ႉ။

တီႈ ယူႇဢႅတ်ႉသ်ၵေႃႈ သီးၼဵတ်ႉၶဝ် လႆႈယိုၼ်ယၼ်ပၼ် တၢင်းၸွႆႈထႅမ်မႂ်ႇ တႃႇယူႇၶရဵၼ်း တႃႇ $60 ႁဵင်လၢၼ်ႉ၊ ၵူၺ်းၵႃႈဝႃႈ ၽူႈသၢင်ႈၵူတ်းမၢႆ ၽၢႆႇရီႇပတ်ႇပရီႇၵၼ်ႇၶဝ် တိုၵ်းသၢၼ်ၶတ်းလွင်ႈၼၼ်ႉဝႆႉယူႇ။ ၽူႈၼမ်းသၽႃး Mike Johnson ပႆႇႁွင်ႉတႃႇဢဝ် ၶႅပ်းၵၢင်ၸႂ်သေတႅပ်းတတ်း၊ ၵူၺ်းၵႃႈဝႃႈ လႅပ်ႈတေ ၽွမ်ႉပၼ်ယူႇ။

ငိူၼ်ႈငဝ်ႈတိုၼ်း

• VOA News. "Putin Warns of Nuclear War if West Sends Troops to Ukraine" — VOA News, February 29, 2024
• VOA News. "ယူကရိန်းကို အနောက်နိုင်ငံတပ်တွေမလွှတ်ဖို့ ရုရှားသမ္မတသတိပေး" — VOA News, March 1, 2024