Wn/shn/ၸဝ်ႈၸွမ်ၸိုင်ႈၵၢၼ်ႇ ပၼ်ၽၢင်ႉၶႄႇဝႃႈ ယႃႇၶဝ်ႈၵဝ်း ပၢင်လိူၵ်ႈတင်ႈ
ဝၼ်းပုတ်ႉ၊ ဢေႇပရႄႇ 3၊ 2024
မိူဝ်ႈဝၼ်းဢင်းၵၢၼ်းၼၼ်ႉ ၽူႈဢွၼ်ႁူဝ် ဢမႄႇရိၵၢၼ်ႇ-ၶႄ ၶဝ်သွင်ၵေႃႉ လႆႈၵပ်းၽူင်းလၢတ်ႈတေႃႇၵၼ်သေ ၸဝ်ႈၸွမ်ၸိုင်ႈ ၵျူဝ်းပၢႆႇတႅၼ်ႇ လႆႈလၢတ်ႈ ၸဝ်ႈၸွမ်ၸိုင်ႈၶႄႇ သျီၸိင်းပိင်ႇ ဝႃႈ ယႃႇႁႂ်ႈၶဝ်ႈၵဝ်း ပၢင်လိူၵ်ႈတင်ႈၸဝ်ႈၸွမ်ၸိုင်ႈဢမႄႇရိၵၢၼ်ႇ ၼႆယဝ်ႉ။ ႁိူဝ်းၵႅဝ်ႈၶၢဝ် မွၵ်ႇလၢတ်ႈဝႃႈတႄႉ လွင်ႈဢၼ် ၵပ်းၽူင်းလၢတ်ႈတေႃႇၵၼ်ၼႆႉ ပဵၼ်တွၼ်ႈတႃႇ ဝႄႈလႆႈ လွင်ႈသုၵ်ႉယုင်ႈ တီႈၼႂ်းၵႄႈ မိူင်းသွင်မိူင်း လႄႈ ဢမႄႇရိၵၢၼ်ႇၼႆႉ ထိင်းသိမ်းပၼ် ၶေႃႈမၼ်ႈၵႅၼ်ႇ ဢၼ်ဝႃႈ တႃႇပိုတ်ႇဝႆႉ သၢႆသဵၼ်ႈတၢင်းၵပ်းသိုပ်ႇ တႃႇၵႄႈလိတ်ႈ လွင်ႈတုမ်ႉတိူဝ်ႉၵၼ် ဢၼ်ဝႃႈၼၼ်ႉ ၼႆယဝ်ႉ။
မိူဝ်ႈဢွၼ်တၢင်းၵေႃႈ ၸဝ်ႈၸွမ်ၸိုင်ႈပၢႆႇတႅၼ်ႈ ယၢမ်ႈလၢတ်ႈၶႄႇမႃးဝႃႈ ယႃႇႁႂ်ႈၶဝ်ႈၵဝ်း ပၢင်လိူၵ်ႈတင်ႈၼႆသေ လူင်ပွင်ၸိုင်ႈၶႄႇၵေႃႈ ၶဝ်လႆႈလၢတ်ႈမႃးလၢႆလၢႆပွၵ်ႈဝႃႈ ၶဝ်ဢမ်ႇၶဝ်ႈၸႂ် တႃႇၶဝ်ႈၵဝ်း လွင်ႈၵၢၼ်ၼႂ်းမိူင်း ဢမႄႇရိၵၢၼ်ႇ ဝႃႈၼႆယဝ်ႉ။ Liu Pengyu ၽူႈမီးသုၼ်ႇလၢတ်ႈ လုမ်းၽွင်းတၢင်လူင် တီႈ ဝႃႇသျိၼ်ႇတၼ်ႇဝႃႈတႄႉ လွင်ႈဢၼ်ဝႃႈ ၶႄႇၶဝ်ႈၵဝ်း ပၢင်လိူၵ်ႈတင်ႈၸဝ်ႈၸွမ်ၸိုင်ႈ ဢမႄႇရိၵၢၼ်ႇဢၼ်ဝႃႈၼႆႉ မၼ်းပဵၼ် လွင်ႈလႃႈလီလၢတ်ႈၵူၺ်း ဝႃႈၼႆယဝ်ႉ။
ၸဝ်ႈၸွမ်ၸိုင်ႈသွင်ၵေႃႉ လႆႈၵပ်းၽူင်းၵၼ်မႃးၼၼ်ႉ လႆႈဢွၼ်ၵၼ် ထတ်းသၢင်ႈ လွင်ႈၸိူဝ်းဢၼ်လႆႈ ႁဵတ်းသၢင်ႈမႃး ၸိူဝ်းဢၼ်လႆႈဢုပ်ႇၵုမ်ၵၼ်မႃး မိူဝ်ႈဢွၼ်တၢင်းၼၼ်ႉသေ၊ ၵပ်းၵၢႆႇလူၺ်ႈ လွင်ႈတိုၵ်းတေႃးယႃႈမဝ်းၵမ်၊ လွင်ႈတပ်ႉသိုၵ်းၼင်ႇၵၼ် ၵပ်းသိုပ်ႇတိတ်းတေႃႇၵၼ်၊ လွင်ႈရႃႇသီႇဢုတု လႅၵ်ႈလၢႆႈ လႄႈ လွင်ႈႁူမ်ႈသၢင်ႈ တီႈၵူၼ်းမိူင်းၼင်ႇၵၼ် ၵပ်းသိုပ်ႇတိတ်းတေႃႇၵၼ် ၸိူဝ်းၼႆႉလႄႈ ဢိၵ်ႇတင်း လွင်ႈၸိူဝ်းဢၼ်လမ်ႇလွင်ႈတၢင်ႇၸိူဝ်းၼၼ်ႉၵေႃႈ လႆႈဢုပ်ႇၵုမ်ၵၼ်မႃး ၼႆယဝ်ႉ။
ငိူၼ်ႈငဝ်ႈတိုၼ်း
- Patsy Widakuswara. "Biden tells China's Xi to stay out of US elections" — VOA News, April 2, 2024
- VOA News. "ရွေးကောက်ပွဲဝင်မစွက်ဖို့ ကန်သမ္မတ တရုတ်ကိုသတိပေး" — VOA News, April 3�, 2024
