Wn/shn/ၶႄႇႁၢင်ႈႁႅၼ်း တႃႇဢဝ် ႁူင်းၾႆးၾႃႉ ၼိဝ်ႇၵလီးယႃး ဝႆႉၼႂ်း ပၢင်ႇလၢႆႇၶႄႇၸၢၼ်း
ဝၼ်းသုၵ်း၊ မေႇ 17၊ 2024
မိူင်းဢမႄႇရိၵၢၼ်ႇ လႆႈပၼ်ၽၢင်ႉဝႃႈ မိူင်းၶႄႇၼႆႉ ၶဝ်ယိူင်းဢၢၼ်း တႃႇႁႂ်ႈ လွင်ႈထဵင်မေႃးလွင်ႈပိူင်ႇၼႃႈၼမ်ႉၼၼ်ႉ တိူဝ်းႁႅင်းယႂ်ႇမႃးသေ ၶဝ်တိုၵ်ႉသိုပ်ႇႁဵတ်းသၢင်ႈ တႃႇဢဝ် ႁူင်းၾႆးၾႃႉ ၼိဝ်ၵလီးယႃး ဢၼ်ဝႆႉၼိူဝ်ၼမ်ႉၼၼ်ႉ တေဢၢၼ်းဝႆႉၵႂႃႇတီႈၼႂ်း ပၢင်ႇလၢႆႇၶႄႇၸၢၼ်း ဝႃႈၼႆယဝ်ႉ။
ၽူႈလဵပ်ႈႁဵၼ်းၶဝ် လၢတ်ႈဝႃႈတႄႉ ယွၼ်ႉပိူဝ်ႈလၢႆးငၢၼ်း ဢၼ်တေၵေႃႇသၢင်ႈ ႁူင်းၾႆးၾႃႉၼိဝ်ႇၵလီးယႃး တီႈၼိူဝ် ႁိူဝ်းသၢင်းၽေႃးၼၼ်ႉသေ လွင်ႈသိူၵ်ႈသမ်ႇၵၼ်တင်း မိူင်းယူႇႁိမ်းၵိၼ်ၸမ်ၵၼ်ၵေႃႈ တေၸၢင်ႈမီး လွင်ႈၶဵင်ႈၶႅင်မႃးသေ တေမီးၽေး တွၼ်ႈတႃႇ သိင်ႇဝႅတ်ႉလွမ်ႉပႃးၵွၼ်ႇ ဝႃႈၼႆယဝ်ႉ။
သိုဝ်ႇၶၢဝ်ႇၶႄႇၶဝ် လၢတ်ႈဝႃႈတႄႉ ပဵၼ်ၼင်ႇတၢင်ႉႁႅင်းသၢႆၵၢၼ်ၼမ်ႉသေ လွင်ႈဢၼ်ဢဝ် ႁူင်းၾႆးၾႃႉၼိဝ်ႇၵလီးယႃး သႅၼ်းဢွၼ်ႇ ဝႆႉတီႈၼိူဝ်ႁိူဝ်းၼႆႉ မၼ်းတေပဵၼ် ယေးယွင်တၢင်ႉႁႅင်း ဢၼ်ၸၢင်ႈၶၢႆႉလႆႈဢွင်ႈတီႈ တွၼ်ႈတႃႇ တီးပၵ်းပၢင်သဝ်း လႄႈ တွၼ်ႈတႃႇ ႁိူဝ်းတၢင်ႇၸိူဝ်း ဝႃႈၼႆယဝ်ႉ။ တီးၶၢဝ်ႇ South China Morning Post လၢတ်ႈဝႃႈတႄႉ ၵဵဝ်ႇၵပ်းလူၺ်ႈ လွင်ႈႁူမ်ႇလူမ်ႈၽေးၶဵၼ် ႁူင်းၾႆးၾႃႉ၊ လွင်ႈယမ်မၼ်းၸိူဝ်းၼႆႉသေ လႆႈမီးလွင်ႈလႆႈမႆႈၸႂ်လႄႈ လူင်ပွင်ၸိုင်ႈၶႄႇ လႆႈယင်ႉၵိုတ်းဝႆႉ လၢႆးငၢၼ်း တႃႇႁဵတ်း ႁူင်းၾႆးၾႃႉၼိဝ်ႇၵလီးယႃး ဢၼ်ၶၢႆႉလႆႈဢွင်ႈတီႈ တီႈၼိူဝ်ၼမ်ႉၼၼ်ႉ ဝႃႈၼႆ။
တီႈလိၵ်ႈၽိုၼ်ၶၢဝ်ႇလူင် ဝႃႇသျိၼ်ႇတၼ်ႇၽူတ်ႉ လၢတ်ႈဝႃႈတႄႉ ၽူႈမီးၸၼ်ႉတီႈ ထၢၼ်ၽွင်းလူင် ၵၢၼ်ၼွၵ်ႈမိူင်း ဢမႄႇရိၵၢၼ်ႇ လႄႈ ငဝ်ႈငုၼ်းၵုမ်းၵၢၼ်သိုၵ်းၼႃႈလိၼ် ဢမႄႇရိၵၢၼ်ႇ-ဢိၼ်ႇတူဝ်ႇပၸိၽိၵ်ႉ ၼၼ်ႉ လႆႈမွၵ်ႇလၢတ်ႈဝႆႉ ၼႂ်းလိူၼ်ၼႆႉဝႃႈ တွၼ်ႈတႃႇပၼ်ႁႅင်းၾႆးၾႃႉ တီႈၵုၼ် ၸိူဝ်းမီးၼႂ်း ပၢင်ႇလၢႆႇၶႄႇၸၢၼ်း ဢၼ်မီးလွင်ႈထဵင်မေႃးၵၼ်ၼၼ်ႉၼႆသေ ၶႄႇၶဝ်ၼႆႉ တိုၵ်ႉသိုပ်ႇၵေႃႇသၢင်ႈ ႁူင်းၾႆးၾႃႉ ၼိဝ်ႇၵလီးယႃး တီႈၼိူဝ်ၼမ်ႉၼၼ်ႉယူႇ ဝႃႈၼႆယဝ်ႉ။