Wn/shn/ၾီလိပ်ႈပိၼ်း တေႁႄႉႁၢမ်ႈ လွင်ႈၶႄႇႁဵတ်းၵုၼ် တီႈၼႂ်း ပၢင်ႇလၢႆႇၶႄႇၸၢၼ်း

ဝၼ်းဢင်းၵၢၼ်း၊ မေႇ 14၊ 2024 

ႁိူဝ်းသိုၵ်း ၾီလိပ်ႈပိၼ်း တီႈၼႂ်း ပၢင်ႇလၢႆႇၶႄႇၸၢၼ်း (ၶႅပ်းႁၢင်ႈၵဝ်ႇ)

တပ်ႉပႂ်ႉၽင်ႇၼမ်ႉ ၾီလိပ်ႈပိၼ်း မွၵ်ႇလၢတ်ႈၵႂႃႇ မိူဝ်ႈဝၼ်းၸၼ်ၼၼ်ႉဝႃႈၼင်ႇႁိုဝ် မိူင်းၶႄႇ တေဢမ်ႇႁဵတ်းလႆႈ ၵၢၼ်ၵေႃႇသၢင်ႈ တီႈၵုၼ် Sabina Shoal ဢၼ်ၶဝ်ႈပႃးၼႂ်း မူႇၵုၼ်ႇ ဢၼ်မီးလွင်ႈထဵင်မေႃးၵၼ်တီႈၼႂ်း ပၢင်ႇလၢႆႇၶႄႇၸၢၼ်း ၼၼ်ႉ ဝႃႈၼႆယဝ်ႉ။

တပ်ႉပႂ်ႉၽင်ႇၼမ်ႉ ၾီလိပ်ႈပိၼ်း မွၵ်ႇလၢတ်ႈ မိူဝ်ႈဝၼ်းသဝ်ၼၼ်ႉဝႃႈ ၶဝ်လႆႈဢဝ် ႁိူဝ်းတပ်ႉပႂ်ႉၽင်ႇၼမ်ႉသွင်လမ်းသေ ဢဝ်ဢွင်ႈတီႈယူႇ ပႂ်ႉတူၺ်း တီႈၵုၼ် Sabina Shoal ဢၼ်ၽၢႆႇၾီလိပ်ႈပိၼ်းၶဝ် မၢပ်ႇလၢတ်ႈဝႃႈ ၶႄႇ ႁဵတ်းၵုၼ်ပွမ်ဢၼ်ၼိုင်ႈယူႇ ၼၼ်ႉၼႆယဝ်ႉ။ တႄႇမိူဝ်ႈၵၢင်လိူၼ်ဢေႇပရႄႇ ၸဵမ်မိူဝ်ႈ ဢဝ် ႁိူဝ်းသွင်လမ်း မႃးဝႆႉတီႈ ၵုၼ်ၼၼ်ႉယဝ်ႉ တီႈႁၢတ်ႇသၢႆးၸိူဝ်းၼၼ်ႉ လႆႈႁၼ် ၵွင်ႁိၼ်ၵူႈသႅၼ်းသႅၼ်း ၸိူဝ်းဢၼ်ယႃႉဝႆႉ တႅၼ်ႈယဵၼ်းႁိၼ် ၼၼ်ႉ ဝႃႈၼႆယဝ်ႉ။

ၵုၼ် Sabina Shoal ဢၼ်မီးဝႆႉတီႈ ၶွပ်ႇဝူင်းပၢႆးမၢၵ်ႈမီးၶေႃၶေႃႈ ၶွင် ၾီလိပ်ႈပိၼ်းၼႆႉ မၼ်းပဵၼ် ဢွင်ႈတီႈႁိူဝ်း ၸိူဝ်းဢၼ်ႁတ်းၵၢၼ်တေႃႉသူင်ႇၸူး တပ်ႉၼိူဝ်လိၼ် ဢၼ်တမ်းဝႆႉတီႈ ႁိူဝ်းသိုၵ်းၵဝ်ႇ ၾီလိပ်ႈပိၼ်း ဢၼ်မီးတီႈ Second Thomas Shoal ၼၼ်ႉ မႃးၶွႆႈၵၼ်ၼၼ်ႉယဝ်ႉ။

ၼႂ်းၵႃႈ လိူၼ်ၸိူဝ်းၼႆႉ ၸိူဝ်းပဵၼ် ႁိူဝ်းတပ်ႉပႂ်ႉၽင်ႇၼမ်ႉ ၶႄႇ လႄႈ ၾီလိပ်ႈပိၼ်းၶဝ် ၵမ်းၵမ်း လႆႈတေႃႇသူႈႁူပ်ႉၺႃးၵၼ် တီႈၼႂ်း ပၢင်ႇလၢႆႇၶႄႇၸၢၼ်းသေ လွင်ႈဢၼ် ၽၢႆႇၶႄႇ ဢဝ်လွတ်ႇၼမ်ႉလူင်သေ သိတ်းၼမ်ႉသႂ်ႇ ႁိူဝ်းၾီလိပ်ႈပိၼ်းသေၵေႃႈ ႁႄႉႁၢမ်ႈမႃးၼၼ်ႉလႄႈ ၸင်ႇလႆႈမီး လွင်ႈၶဵင်ႈၶႅင်ဝႆႉယူႇ။

Jay Tarriela ၽူႈမီးသုၼ်ႇလၢတ်ႈ တပ်ႉပႂ်ႉၽင်ႇၼမ်ႉ မွၵ်ႇလၢတ်ႈ တီႈပၢင်ၸႅင်ႈၶၢဝ်ႇ မိူဝ်ႈဝၼ်းၸၼ်ၼၼ်ႉဝႃႈ ၶဝ်တေႁႄႉႁၢမ်ႈ လွင်ႈဢၼ် တပ်ႉပႂ်ႉၽင်ႇၼမ်ႉၶႄႇ မႃးၶတ်းၸႂ် တႃႇႁဵတ်းၵၢၼ်ၵေႃႇသၢင်ႈ တီႈ ၵုၼ် Sabina Shoal ၼၼ်ႉ ဝႃႈၼႆယဝ်ႉ။

ငိူၼ်ႈငဝ်ႈတိုၼ်း

• Reuters. "Philippines sends ships to disputed atoll where China building 'artificial island'" — Reuters, May 11, 2024
• Reuters. "Philippines sends ships to disputed atoll, says China building 'artificial island'" — VOA News, May 11, 2024