Wn/shn/ၶၢဝ်းတၢင်းယူးရူပ်ႉ ၸဝ်ႈၸွမ်ၸိုင်ႈၶႄႇ လႅပ်ႈပဵၼ် တႃႇယွၼ်ႇယွမ်းလွင်ႈၶဵင်ႈၶႅင် ၵၢၼ်ၵႃႉၶၢႆ
ဝၼ်းဢင်းၵၢၼ်း၊ ဢေႇပရႄႇ 30၊ 2024
ၽူႈထတ်းသၢင်ၶဝ် ႁၼ်ထိုင်ဝႃႈ ၶၢဝ်းတၢင်းယူးရူပ်ႉ ၸဝ်ႈၸွမ်ၸိုင်ႈၶႄႇ သျီၸိၼ်းပိင်ႇ ၼႆႉ ပဵၼ်တႃႇၶတ်းၸႂ် ယွၼ်ႇယွမ်း လွင်ႈၶဵင်ႈၶႅင် တီႈ ၵၢၼ်ၵႃႉၶၢႆ ဢၼ်မီးတီႈၼႂ်းၶႄႇ မိူင်းၶႄႇ လႄႈ မိူင်းယူးရူပ်ႉ ဢီးယူႇ ၸိူဝ်းၼၼ်ႉဝႃးၼႆယဝ်ႉ။ ၸဝ်ႈၸွမ်ၸိုင်ႈၶႄႇ သျီႇၸိၼ်းပိင်ႇ ၼႆႉ ပေႃးတႄႇဢဝ် ပီ 2019 ၼၼ်ႉၼႆ ၼႆႉပဵၼ်ပွၵ်ႈဢွၼ်တၢင်းသုတ်း ဢၼ်ဢွၵ်ႇၶၢဝ်းတၢင်းၸူး ယူးရူပ်ႉသေ ၶၢဝ်းတၢင်း ဢၼ်တေ ႁိုင် 6 ဝၼ်းၼႆႉ လႆႈတႄႇမႃး မိူဝ်ႈဝၼ်းဢႃးတိတ်ႉၼၼ်ႉယဝ်ႉ။
ၽွင်းမိူဝ်ႈ တီႈၼႂ်းၵႄႈ ၸုမ်းၽွမ်ႉႁူမ်ႈမိူင်းယူးရူပ်ႉ လႄႈ မိူင်းၶႄႇၶဝ် လႆႈမီးလွင်ႈၶဵင်ႈၶႅင် တီႈၵၢၼ်ၵႃႉၶၢႆယူႇၼၼ်ႉလႄႈ ၽွင်းမိူဝ်ႈ ယူးရူပ်ႉၶဝ် တိုၵ်ႉမီးလွင်ႈမႆႈၸႂ်ၼိူဝ် ဢၼ်ၵဵဝ်ႇၵပ်းလူၺ်ႈ လွင်ႈၶႄႇ ၵမ်ႉထႅမ် ရတ်ႈသျႃးၼၼ်ႉသေ ၸင်ႇလႆႈမီး ၶၢဝ်းတၢင်းဢၼ်ၼႆႉမႃးသေ ၸဝ်ႈၸွမ်ၸိုင်ႈၶႄႇၼႆႉ မၼ်းတေ ၵႂႃႇ ၾရၢင်ႇသဵတ်ႈ၊ သႃးဝီးယႃး လႈ ႁၢင်ႇၵေႇရီႇ ၸိူဝ်းၼႆႉယဝ်ႉ။ ၽူႈလဵပ်ႈႁဵၼ်းၶဝ် ႁၼ်ထိုင်ဝႃႈ ၼႂ်းၶၢဝ်းတၢင်းၼႆႉ ၸဝ်ႈၸွမ်ၸိုင်ႈသျီႇၸိၼ်းပိင်ႇၼႆႉ တေ ၶတ်းၸႂ်ပဵၼ်ပွၵ်ႈဢွၼ်တၢင်းသုတ်း ဢၼ်ၵဵဝ်ႇၵပ်းလူၺ်ႈ တႃႇၵႄႈလိတ်ႈ လွင်ႈၶဵင်ႈၶႅင် တီးၵၢၼ်ၵႃႉၶၢႆ တင်း ယူးရူပ်ႉသေ လွင်ႈၸိူဝ်းပဵၼ် ပၢင်သိုၵ်း ယူႇၶရဵၼ်း-ရတ်ႈသျႃး လႄႈ လွင်ႈသုၵ်ႉယုင်ႈ ဢိတ်ႇသရေး-ႁႃးမၢတ်ႉသ် ၸိူဝ်းၼၼ်ႉၵေႃႈ ပဵၼ်ဢၼ်လမ်ႇလွင်ႈမႃးယူႇ ဝႃႈၼႆ။
Zsuzsa Anna Ferenczy ဢၼ်ပဵၼ် ၽူႈလူင်ႉလႅၼ်ႇ လွင်ႈသိူၵ်ႈသမ်ႇ ဢီးယူႇ-ၶႄႇ တီႈ ၸၼ်ႉၸွမ်ၸိုင်ႈမိူင်း Dong Hwa ထၢႆႇဝၢၼ်းၼၼ်ႉ လႆႈႁၼ်ထိုင်ဝႃႈ ၽွင်းမိူဝ်ႈ ၽၢႆႇယူးရူပ်ႉၶဝ်ႈဝႃႈ လူဝ်ႇလႆႈၵူတ်ႇထတ်း လွင်ႈၵႃႉၶၢႆၶႄႇ ဢၼ်ဢမ်ႇမီး လွင်ႈၽဵင်ႇပဵင်းဢၼ်ဝႃႈၼၼ်ႉ ၸင်ႇလႆႈမီးမႃး ၶၢဝ်းတၢင်း ၸဝ်ႈၸွမ်ၸိုင်ႈၶႄႇ ၼင်ႇၼႆသေ ၶၢဝ်းတၢင်း သျီႇၸိၼ်းပိင်ႇၼႆႉ မၼ်းႁဵတ်း တႃႇႁႂ်ႈလွင်ႈဢၼ် ဢီးယူႇၶဝ် တေ တမ်းဝၢင်း ပၵ်းပိူင်မၢႆမီႈႁၢဝ်ႈႁႅင်းၼိူဝ်ၶႄႇ ၼၼ်ႉ ႁႂ်ႈပေႃးၸိူင်ႉၵႂႃႇ ဝႃႈၼႆယဝ်ႉ။ Ferenaczy ႁၼ်ထိုင်ဝႃႈတႄႉ တီႈဢၼ်ပဵၼ် လွင်ႈႁူမ်ႈသၢင်ႈ ၼႂ်းၵႄႈ ၶႄႇ လႄႈ ယူးရူပ်ႉ ပွတ်းဢွၵ်ႇ ပွတ်းၵၢင်ၼၼ်ႉ မိူင်းၵမ်ႉၼမ် ဢွၼ်ၵၼ်ထွၼ်ဢွၵ်ႇယူႇသေ ပေႃးဝႃႈ တူၺ်းၶၢဝ်းတၢင်း ႁၢင်ႇၵေႇရီႇ လႄႈ သႃးဝီးယႃးၼၼ်ႉၼႆ သျီႇၸိၼ်းပိင်ႇ လႅပ်ႈမုင်ႈမွင်းဝႆႉဝႃႈ တႃႇတေ ၼႄဝႃႈ တီႈ ဢေးသျႃး ပွတ်းဢွၵ်ႇ လႄႈ ပွတ်းၵၢင်ၼၼ်ႉ ၶႄႇ တိုၵ်ႉႁူမ်ႇငမ်းဝႆႉယူႇ ဢၼ်ဝႃႈၼၼ်ႉယဝ်ႉ။
ငိူၼ်ႈငဝ်ႈတိုၼ်း
- William Yang. "China's Xi to Visit Europe as Trade Tensions Rise" — VOA News, April 29, 2024
- Reuters. "China's Xi to visit France, Serbia and Hungary, aims to boost EU ties" — Reuters, April 29, 2024
