Wn/shn/ၵၢၼ်ႇ ပိုၼ်ၽၢဝ်ႇပၼ်ငိုၼ်းတေႃႇလႃႇ 500 လၢၼ်ႉ တႃႇၸွႆႈထႅမ် လွင်ႈႁူမ်ႇလူမ်ႈ ၾီလိပ်ႈပိၼ်း

ဝၼ်းပုတ်ႉ၊ ၸူႇလၢႆႇ 31၊ 2024 

ဢႅၼ်ႇတူဝ်ႇၼီႇ ပလိၼ်ႇၵႅၼ်ႇ ၽွင်းလူင်ၽၢႆႇၼွၵ်ႈမိူင်း ဢမႄႇရိၵၢၼ်ႇ၊ ၸွမ်ပွင်ၸိုင်ႈၾီလိပ်ႈပိၼ်း ၾႃႇတီႇၼႅၼ်ႇ မႃႇၶူဝ်ႉၵျူႇၼီႇယႃႇ လႄႈ ၽွင်းလူင်ၽၢႆႇၵႅတ်ႇၵင်ႈ လွႆႉဢေႃးသတိၼ်ႇ ႁူပ်ႉထူပ်းၵၼ် တီႈႁေႃၸွမ်ၸိုင်ႈ ဝဵင်းမၼီႇလႃႇ (2024 ၸူႇလၢႆႇ 30)

ၶုၼ်ၽွင်းၼွၵ်ႈမိူင်း မိူင်းဢမႄႇရိၵၢၼ်ႇ ဢႅၼ်ႇတူဝ်ႇၼီႇ ပလိၼ်ႇၵႅၼ်ႇ လႄႈ ၶုၼ်ၽွင်းလူင် ၽၢႆႇၵႅတ်ႇၵင်ႈ လွႆႉဢေႃးသတိၼ်ႇ ႁူပ်ႉထူပ်း ၽူႈဢွၼ်ႁူဝ် မိူင်းၾီလိပ်ႈပိၼ်း တီႈဝဵင်းမၼီႇလႃႇ မိူင်းၾီလိပ်ႈပိၼ်း။ မိူဝ်ႈၼႆႉ လႆႈပိုၼ်ၽၢဝ်ႇဝႃႈ တေၸွႆႈထႅမ် ငိုၼ်းတေႃႇလႃႇဢမႄႇရိၵၢၼ်ႇ 500 လၢၼ်ႉ ပၼ် မိူင်းၾီလိပ်ႈပိၼ်း တႃႇႁႂ်ႈလွင်ႈႁူမ်ႈမိုဝ်းၵၼ် မီးလွင်ႈၶိုၼ်ႈယႂ်ႇမႂ်ႇသုင် ၵဵဝ်ႇၵပ်းလွင်ႈႁူမ်ႇလူမ်ႈ ၼိူဝ်ဢွၼ်ႇလၢႆး လႄႈ သုၼ်ႇတႃႇၵႂႃႇမႃး လွတ်ႈလွတ်ႈလႅဝ်းလႅဝ်း ၼႆယဝ်ႉ။

မိူဝ်ႈႁူပ်ႉထူပ်း ၸွမ်ပွင်ၸိုင်ႈ ၾီလိပ်ႈပိၼ်း ၾႃႇတီႇၼႅၼ်ႇ မႃႇၶူဝ်ႉသ် ၵျူႇၼီႇယႃႇၼၼ်ႉ ၽွင်းလူင် ပလိၼ်ႇၵႅၼ်ႇ လၢတ်ႈၼႄ လွင်ႈဢၼ် ၸိုင်ႈမိူင်း ၼႂ်းပိုၼ်ႉတီႈ မႆႈၸႂ်ၸွမ်း လွင်ႈၶႄႇ တူင်ႉၼိုင် ၼႂ်းပၢင်ႇလၢႆႇၶႄႇပွတ်းၸၢၼ်း လႄႈ ပွတ်းဢွၵ်ႇ ၼမ်မႃးၼၼ်ႉသေ လွင်ႈဢၼ် ၾီလိပ်ႈပိၼ်း လႄႈ ဢမႄႇရိၵၢၼ်ႇ ႁူမ်ႈမိုဝ်းၵၼ်ၼၼ်ႉ လမ်ႇလွင်ႈတေႉတေႉ။

ၽွင်းလူင် ပလိၼ်ႇၵႅၼ်ႇ လၢတ်ႈဝႃႈ "ၵၢၼ်ႁႂ်ႈမီးလွင်ႈမၼ်ႈၵိုမ်း လွင်ႈႁူမ်ႈမိုဝ်းၵၼ် ၸၼ်ႉသုင် ၼႂ်းၵႄႈ 2 မိူင်းၼႆႉ တေႁူမ်ႇငမ်းလႆႈၵူႈလွင်ႈလွင်ႈ" ၼႆယဝ်ႉ။ ႁဝ်းၶႃႈတေလႆႈႁၼ်ဝႃႈ လွင်ႈႁူမ်ႈမိုဝ်းၵၼ်ၼႆႉ ဢမ်ႇၸႂ်ႈဝႃႈ တႃႇလွင်ႈႁူမ်ႇလူမ်ႈၵွၺ်း မၼ်းပဵၼ်တႃႇ သုၼ်ႇလႆႈၵၢၼ်ပၢႆးမၢၵ်ႈမီး ၼႆယဝ်ႉ။”

ၸွမ်ပွင်ၸိုင်ႈ ၾီလိပ်ႈပိၼ်း လၢတ်ႈဝႃႈ လွင်ႈဢၼ် ဢမႄႇရိၵၢၼ်ႇ မီးယူႇၼၼ်ႉ လမ်ႇလွင်ႈတႃႇ လွင်ႈႁူမ်ႇလူမ်ႈ လႄႈ လွင်ႈၼိမ်သဝ်း ၼႂ်းပိုၼ်ႉတီႈ ၼႆယဝ်ႉ။ ၶုၼ်ၽွင်းလူင်ၽၢႆႇၵႅတ်ႇၵင်ႈ ဢမႄႇရိၵၢၼ်ႇ လွႆႉဢေႃးသတိၼ်ႇ လႄႈ ၽွင်းလူင်ၽၢႆႇၵႅတ်ႇၵင်ႈ မိူင်းၾီလိပ်ႈပိၼ်း ႁူပ်ႉထူပ်းဢုပ်ႇဢူဝ်းၵၼ် တႃႇၸွႆႈထႅမ် ႁႂ်ႈတပ်ႉသိုၵ်းၾီလိပ်ႈပိၼ်း ၶိုတ်းၵၢပ်ႈၶိုတ်းပၢၼ် ၼႆယဝ်ႉ။

ၽွင်းလူင်ၽၢႆႇၵႅတ်ႇၵင်ႈ မိူင်းၾီလိပ်ႈပိၼ်း ၵိလ်ႊပႃႇတူဝ်ႇ တီႇဢူဝ်ႇတူဝ်ႇရူဝ်ႇ ၵျူႇၼီႇယႃႇ ၵေႃႈလၢတ်ႈဝႃႈ လိူဝ်ၼၼ်ႉ ၼင်ႇႁိုဝ် တေလႆႈ ၼႃႈတီႈၵႅတ်ႇၵင်ႈ ဢၼ်ယုမ်ႇယမ်လႆႈ တႃႇဝၢၼ်ႈမိူင်းလႄႈ တေႁႄႉၵင်ႈလႆႈ လွင်ႈပူၼ်ႉပႅၼ် ဢၼ်ဢမ်ႇထုၵ်ႇမီး လႄႈ ဢမ်ႇၸွမ်းမၢႆမီႈၼၼ်ႉ တေတိူဝ်းလူင်းတိုၼ်း ၽၢႆႇသိုၵ်း ၼႆယဝ်ႉ။

ၽူႈၶၢၼ်ပၢၵ်ႇ ထၢၼ်ၵၢၼ်ၼွၵ်ႈမိူင်း မိူင်းဢမႄႇရိၵၢၼ်ႇ Matthew Miller ၵေႃႈ လၢတ်ႈဝႃႈ ၸွမ်းၼင်ႇ လိၵ်ႈႁူမ်ႈမၢႆ ၵၢၼ်ၵႅတ်ႇၵင်ႈ မိူင်းၾီလိပ်ႈပိၼ်းၼၼ်ႉ ဢမႄႇရိၵၢၼ်ႇ မီးၶေႃႈမၼ်ႈၵႅၼ်ႇဝႆႉ ၼႆယဝ်ႉ။

ငိူၼ်ႈငဝ်ႈၶၢဝ်ႇ

• VOA News. "US announces $500 million in military financing for Philippines" — VOA News, July 30, 2024
• Kyodo News. "U.S. to provide $500 million defense support to Philippines" — Kyodo News, July 30, 2024
• JIM GOMEZ Associated Press and MATTHEW LEE Associated Press. "US boosts alliance with the Philippines with $500 million funding and pact amid concern over China" — ABC News, July 30, 2024
• Al Jazeera. "US hands $500m military aid boost to Philippines amid China tensions" — Al Jazeera, July 30, 2024