Wn/shn/သၽႃး တိူဝ်ႇၵီႇ ယိုၼ်ယၼ်ပၼ် တႃႇႁႂ်ႈ သုၺ်ႇတိၼ်ႇ ၶဝ်ႈပဵၼ် လုၵ်ႈၸုမ်း NATO

ဝၼ်းပုတ်ႉ၊ ၸၼ်ႇဝႃႇရီႇ 24၊ 2024 

သၽႃး တိူဝ်ႇၵီႇ (ၶႅပ်းႁၢင်ႈၵဝ်ႇ)

မိူဝ်ႈဝၼ်းဢင်းၵၢၼ်းၼၼ်ႉ သၽႃးတိူဝ်ႇၵီႇ လႆႈယိုၼ်ယၼ်ပၼ် လွင်ႈမိူင်းသုၺ်ႇတိၼ်ႇ လဝ်ႈတၢင်ႇ တႃႇပဵၼ် လုၵ်ႈၸုမ်းၼေႇတူဝ်းၼၼ်ႉသေ ၵပ်းၵၢႆႇလူၺ်ႈ လွင်ႈတႅပ်းတတ်းၼၼ်ႉၵေႃႈ ဢၼ်ပဵၼ် ၸွမ်ၽွင်းလူင်သုၺ်ႇတိၼ်ႇ လႆႈႁပ်ႉတွၼ်ႈၸွမ်းယူႇ။ တီႈသၽႃးတိူဝ်ႇၵီႇၼၼ်ႉ ဢဝ်တၢင်း ၶႅပ်းၵၢင်ၸႂ် 287 ၶႅပ်း၊ 55 ၶႅပ်း သေၵေႃႈ ယိုၼ်ယၼ်ပၼ်မႃးယဝ်ႉ။

တွၼ်ႈတႃႇၶဝ်ႈပဵၼ် လုၵ်ႈၸုမ်းၼေႇတူဝ်းၼႆႉ တေလူဝ်ႇလွင်ႈၽွမ်ႉၸႂ် ၸိူဝ်းပဵၼ် လုၵ်ႈၸုမ်းတင်းသဵင်ႈယဝ်ႉ။ ယွၼ်ႉပိူဝ်ႈဝႃႈ တိူဝ်ႇၵီႇ လႄႈ ႁၢင်ႇၵေႇရီႇၶဝ် ဢမ်ႇပႆႇပၼ် ၶေႃႈၽွမ်ႉၸႂ်ၼိူဝ် လွင်ႈသုၺ်ႇတိၼ်ႇ လဝ်ႈတၢင်ႇပဵၼ် လုၵ်ႈၸုမ်းၼၼ်ႉလႄႈ လႆႈၸိူင်ႉႁိုင်ဝႆႉ မီးမွၵ်ႈ ပီၼိုင်ယဝ်ႉ။ ၽၢႆႇတိူဝ်ႇၵီႇ ဢဝ်လွင်ႈတၢင်းဝႃႈ မိူင်းသုၺ်ႇတိၼ်ႇၼႆႉ ႁပ်ႉဝႆႉ ၸုမ်းၸိူဝ်းသၢၼ်ၶတ်း တိူဝ်ႇၵီႇ လႄႈ ၸင်ႇဝႃႈ တိူဝ်ႇၵီႇ ဢမ်ႇပႆႇပၼ် ၶေႃႈၽွမ်ႉၸႂ်မႃးယဝ်ႉ။ ယၢမ်းလဵဝ်တႄႉ တွၼ်ႈတႃႇ သုၺ်ႇတိၼ်ႇ တေၶဝ်ႈပဵၼ်လႆႈ လုၵ်ႈၸုမ်းၼေႇတူဝ်းၼၼ်ႉ ဢၼ်တႃႇပၼ် ၶေႃႈၽွမ်ႉၸႂ်ၼၼ်ႉ ၵိုတ်းမိူင်းႁၢင်ႇၵေႇရီႇ မိူင်းလဵဝ်ၵူၺ်းယဝ်ႉ။

ၼၼ်ႉၵေႃႈ ဢဝ်လွင်ႈတၢင်းဝႃႈ ယွၼ်ႉပိူဝ်ႈ သုၺ်ႇတိၼ်ႇ လႆႈထတ်းသၢင်ၼိူဝ် တီႇမူဝ်ႇၶရေႇၸီႇ မိူင်းႁၢင်ႇၵေႇရီႇ ဝႃႈၼႆသေ ၽၢႆႇႁၢင်ႇၵေႇရီႇၵေႃႈ ဢမ်ႇပႆႇပၼ် ၶေႃႈၽွမ်ႉၸႂ်ၼၼ်ႉယဝ်ႉ။ မိူဝ်ႈဝၼ်းဢင်းၵၢၼ်းၼၼ်ႉတႄႉ ၸွမ်ၽွင်းလူင် ႁၢင်ႇၵေႇရီႇ Viktor Orban လႆႈၽိတ်ႈမွၵ်ႇ ၸွမ်ၽွင်းလူင်သုၺ်ႇတိၼ်ႇ တႃႇဢုပ်ႇဢူဝ်းၵၼ်ၼႆယဝ်ႉ။ ၵူၺ်းၵႃႈဝႃႈ ၽွင်းလူင်ၵၢၼ်ၼွၵ်ႈမိူင်းသုၺ်ႇတိႇၼ်ႇ Tobias Billstrom မွၵ်ႇလၢတ်ႈဝႃႈတႄႉ ယၢမ်းလဵဝ်ၼႆႉ ပႆႇမီးလွင်ႈတၢင်းသင် တႃႇငူပ်ႉငိၵၼ်တင်း ႁၢင်ႇၵေႇရီႇ ဝႃႈၼႆယဝ်ႉ။ သုၺ်ႇတိၼ်ႇ လႄႈ ၾိၼ်ႇလႅၼ်ႇ ၶဝ်ၼႆႉ မိူဝ်ႈၽွင်း ၶၢဝ်းသိုၵ်းယဵၼ်ၼၼ်ႉ ဢမ်ႇၸွမ်းၽၢႆႇလႂ်မႃးသေတႃႉ ဝၢႆးသေ ရတ်ႈသျႃး လႄႈ ယူႇၶရဵၼ်း ပဵၼ်သိုၵ်းၵၼ်မႃးယဝ်ႉ ၸင်ႇလႆႈလဝ်ႈတၢင်ႇ တႃႇပဵၼ် လုၵ်ႈၸုမ်းၼေႇတူဝ်း ၼၼ်ႉယဝ်ႉ။

ငိူၼ်ႈငဝ်ႈတိုၼ်း

• VOA News. "ဆွီဒင်နိုင်ငံ NATO အဖွဲ့ဝင်ဖြစ်ရေး တူရကီလွှတ်တော်အတည်ပြု" — VOA News, January 24, 2024
• Huseyin Hayatsever လႄႈ Tuvan Gumrukcu. "Turkey approves Sweden's NATO membership bid after 20-month delay" — Reuters, January 24, 2024