Wn/shn/သၽႃးတႂ်ႈၵၢၼ်ႇ ယိုၼ်ယၼ် ပိူင်ယုၵ်းယၢင်ႇၸွႆႈထႅမ် ၼွၵ်ႈမိူင်း

Add links
From Wikimedia Incubator
< Wn‎ | shn
Wn > shn > သၽႃးတႂ်ႈၵၢၼ်ႇ ယိုၼ်ယၼ် ပိူင်ယုၵ်းယၢင်ႇၸွႆႈထႅမ် ၼွၵ်ႈမိူင်း

ဝၼ်းဢႃးတိတ်ႉ၊ ဢေႇပရႄႇ 21၊ 2024

လိၵ်ႈႁွမ်တွမ် ၸိူဝ်းၵဵဝ်ႇၵပ်း
ဢွင်ႈတီႈ မိူင်းႁူမ်ႈတုမ် ဢမႄႇရိၵ
ႁူမ်ႈသၢင်ႈ!
Wn/shn/မိူင်းႁူမ်ႈတုမ် ဢမႄႇရိၵ
Wn/shn/မိူင်းႁူမ်ႈတုမ် ဢမႄႇရိၵ
သၽႃး မိူင်းႁူမ်ႈတုမ် ဢမႄႇရိၵၢၼ်ႇ

မိူဝ်ႈဝၼ်းၸၼ်ၼၼ်ႉ တီႈသၽႃးတႂ်ႈ ဢမႄႇရိၵၢၼ်ႇ လႆႈၸႅၵ်ႇၶႅပ်းၵၢင်ၸႂ်သေ တႅပ်းတတ်း လၢႆးၵၢၼ် လွင်ႈၸွႆႈထႅမ် ယူႇၶရဵၼ်း၊ ဢိတ်ႇသရေး လႄႈ ၸိူဝ်းပဵၼ် မိူင်းဢူၺ်းလီ ဢမႄႇရိၵၢၼ်ႇ တၢင်းၸိုဝ်း တၢင်းၸွႆႈထႅမ် ဢၼ်ၵိုင်ႇငိုၼ်း တေႃႇလႃႇ 95 ႁဵင်လၢၼ်ႉ ၼၼ်ႉယဝ်ႉ။

ၽူႈၼမ်းသၽႃးၶဝ် လႆႈတိုၵ်းသူၼ်း ၸိူဝ်းပဵၼ် ၽၢႆႇသၢၼ်ၶတ်း မိုဝ်းၶႂႃ ဢၼ်ယိပ်းၵမ်ၽိင်ႈမိူဝ်ႈၵွၼ်ႇ ၶဝ် ႁႂ်ႈပေႃးၸၢင်ႈ ယိုၼ်ယၼ်မႃးၼၼ်ႉယဝ်ႉ။ ၽူႈၼမ်းသၽႃး မၢႆႉၵျွၼ်ႇသိၼ်ႇ ရီပတ်ႉပလီႇၵၢၼ်ႇ ၼႆႉ မၼ်းႁဵတ်းႁႂ်ႈ ၸႅၵ်ႇၶႅပ်းၵၢင်ၸႂ်သေ တႅပ်းတတ်းၵမ်းလဵဝ် မိူဝ်ႈဝၼ်းၸၼ်ၼၼ်ႉသေ မၼ်းလႆႈပိုင်ႈဢိင် ႁႅင်းၵမ်ႉထႅမ် ၸိူဝ်းပဵၼ် တီႇမူဝ်ႇၶရႅတ်ႉတိတ်ႉၶဝ်ၼၼ်ႉယဝ်ႉ။

ယွၼ်ႉၼၼ်လႄႈ ၸိူဝ်းပဵၼ် လၢႆးၵၢၼ် လွင်ႈတႃႇၸွႆႈထႅမ် ယူႇၶရဵၼ်း လႄႈ ဢိတ်ႇသရေး၊ ၸိူဝ်းပဵၼ် လွင်ႈတႃႇၸွႆႈထႅမ်ၵူၼ်းထူပ်းၽေး တီႈၵႃႇၸႃႇ ၸိူဝ်းၼၼ်ႉ ၸင်ႇၸၢင်ႈလႆႈယိုၼ်ယၼ်မႃးယဝ်ႉ။ လိူဝ်သေၼၼ်ႉဢမ်ႇၵႃး မိူဝ်ႈဝၼ်းၸၼ်ႉၼၼ်ႉ လႆႈမၵ်းမၼ်ႈပႃးလႆႈ ၵူတ်းမၢႆ သင်ၸိူဝ်ႉဝႃႈ တိၵ်ႉတွၵ်ႉ ဢၼ်ပဵၼ် သိုဝ်ႇသၢၼ်တူင်ႇၵူၼ်း ဢၼ်ပၵ်းယၼ်တီႈမိူင်းၶႄႇ ၼၼ်ႉ သင်ဝႃႈၼႂ်းၶၢဝ်းတၢင်းၼိုင်ႈပီ ၶဝ်ဢမ်ႇၶၢႆသျႄႇယႃႇၶဝ်ၼႆၸိုင် တေ ထုၵ်ႇႁႄႉႁၢမ်ႈတီႈ မိူင်းဢမႄႇရိၵၢၼ်ႇ ဢၼ်ဝႃႈၼၼ်ႉယဝ်ႉ။

ပိူင်ယုၵ်းယၢင်ႇ ဢၼ်ယိုၼ်ယၼ်တီႈ သၽႃးတႂ်ႈဝႆႉ ယၢမ်းလဵဝ်ၼၼ်ႉ သင်ဝႃႈ သၽႃးၼိူဝ် လႆႈၽွမ်ႉၸႂ် ၼႂ်းၵႃႈ ၶၢဝ်းတၢင်းလၢႆဝၼ်းတေ မႃးၼၼ်ႉၼႆၸိုင် လိုၼ်းသုတ်းမၼ်း တေၵိုတ်း တွၼ်ႈ ၸဝ်ႈၸွမ်ၸိုင်ႈ ၵျူဝ်း ပၢႆႇတႅၼ်ႇ လူဝ်ႇလူင်းလၢႆးမိုဝ်း ယိုၼ်ယၼ်ပၼ်ၵူၺ်းယဝ်ႉ။

ၼႂ်းပိူင်ယုၵ်းယၢင်ႇ ဢၼ်ယိုၼ်ယၼ်ယၢမ်းလဵဝ်ၼႆႉ ၶဝ်ႈပႃး လၢႆးၵၢၼ်တႃႇပၼ်တၢင်းၸွႆႈထႅမ် ဢူၺ်းလီယူႇၶရဵၼ်း ဢၼ်လႆႈၶၢမ်ႇတၢင်း ရတ်ႈသျႃႈၶဝ် တိုၵ်းတေႃးယူႇၼၼ်ႉ တႃႇ တေႃႇလႃႇ 61 ႁဵင်လၢၼ်ႉၼၼ်ႉယဝ်ႉ။ ၽွင်းမိူဝ်ႈယိုၼ်ယၼ်လွင်ႈဢၼ်ၼႆႉ တႅၼ်းၽွင်းၵမ်ႈၽွၼ်ႈ ယိပ်းၸွမ်ပိဝ်ယူႇၶရဵၼ်း ဢၼ်ပဵၼ် သီလိူင်သွမ်ႇလၢႆးၼၼ်ႉသေၵေႃႈ ၼႄ လွင်ႈၵမ်ႉထႅမ်ၸွမ်မႃးယူႇယဝ်ႉ။

ၼႂ်းၼၼ်ႉၶဝ်ႈပႃး တွၼ်ႈတႃႇ ၸွႆႈထႅမ် ၶိူင်ႈၶူဝ်းၽူတ်ႇၸွႆႈ ၵူၼ်းထူပ်းၽေး တီႈၵႃႇၸႃႇ လႄႈ ဢိတ်ႇသရေး တႃႇ တေႃႇလႃႇ 26 ႁဵင်လၢၼ်ႉၼၼ်ႉယဝ်ႉ။ လိူဝ်သေၼၼ်ႉဢမ်ႇၵႃး ၶဝ်ႈပႃး လၢႆးၵၢၼ် တႃႇၸွႆႈထႅမ် မိူင်းဢူၺ်းလီ တီႈ ဢိၼ်ႇတူဝ်ႇ-ပၸိၽိၵ်ႉ ၼၼ်ႉယူႇ။


ငိူၼ်ႈငဝ်ႈတိုၼ်း[edit | edit source]

Retrieved from "https://incubator.wikimedia.org/w/index.php?title=Wn/shn/သၽႃးတႂ်ႈၵၢၼ်ႇ_ယိုၼ်ယၼ်_ပိူင်ယုၵ်းယၢင်ႇၸွႆႈထႅမ်_ၼွၵ်ႈမိူင်း&oldid=6273824"