Wn/shn/ယူႇၶရဵၼ်း ထတ်းသၢင်တွပ်ႇၶိုၼ်း လွင်ႈမုၼ်ၸဝ်ႈၽူပ်ႉ တိုၵ်းသူၼ်း တႃႇငူပ်ႉငိတင်း ရတ်ႈသျႃး
ဝၼ်းၸၼ်၊ မၢတ်ႉၶျ် 11၊ 2024
ၵပ်းၵၢႆႇလူၺ်ႈ လွင်ႈဢၼ်မုၼ်ၸဝ်ႈၽူပ်ႉ ၾရၼ်ႇသိသ်ႉ မၼ်းၵႂၢမ်းမၢႆဝႃႈ ယူႇၶရဵၼ်ႈၶဝ် “လူဝ်ႇလႆႈႁတ်းႁၢၼ် တႃႇၼႄၸွမ်ပိဝ်ၶၢဝ်“ ဢၼ်ဝႃႈၼၼ်ႉသေ ၽၢႆႇယူႇၶရဵၼ်းၶဝ် လႆႈထတ်းသၢင်တွပ်ႇၶိုၼ်းယူႇယဝ်ႉ။
ၽွင်းလူင် ၵၢၼ်ၼွၵ်ႈမိူင်းယူႇၶရဵၼ်း Dmytro Kuleba တႅမ်ႈတွပ်ႇဝႆႉ တီႈၼိူဝ် သိုဝ်ႇသၢၼ်တူင်ႇၵူၼ်းဝႃႈ “ၸွမ်ပိဝ်ယူႇၶရဵၼ်းၼႆႉ မၼ်းပဵၼ် သီလိူင် လႄႈ သီသွမ်ႇၵူၺ်း၊ တေဢဝ် ၸွမ်ပိဝ်ၼႆႉသေ သိုပ်ႇသၢႆၸႂ်ၵႂႃႇ၊ တၢႆၵႂႃႇ၊ တေဢဝ် လွင်ႈဢွင်ႇပႄႉၵႂႃႇ၊ တီႈယူႇၶရဵၼ်းၼႆႉ ဢမ်ႇမီးဝၼ်းတႃႇပူၵ်းတင်ႈ ၸွမ်ပိဝ်တၢင်ႇဢၼ်“ ဝႃႈၼႆသေ လႆႈဝႃႈ မၼ်းၶၼ်ပၢၵ်ႇ “ဢမ်ႇမီးဝၼ်း တေဝၢင်းၶိူင်ႈ“ ၼႆယဝ်ႉ။ မုၼ်ၸဝ်ႈၽူပ်ႉၵေႃႈ ၸုၵ်းယၼ်ၽၢႆႇၶႅမ်ႉလႅပ်ႈသေ ယႃႇပေၵႂႃႇၸုၵ်း တီႈၽၢႆႇပုၼ်ႉ လွင်ႈငူပ်ႉငိၼၼ်ႉၼႆၵေႃႈ ၽွင်းလူင်ၵၢၼ်ၼွၵ်ႈမိူင်း လႆႈတိုၵ်းသူၼ်း တႅမ်ႈဝႆႉၼင်ႇၼၼ်ယဝ်ႉ။
မၼ်းလၢတ်ႈဝႃႈ “ယွၼ်ႉပိူဝ်ႈ ယွၼ်းသူးပၼ် လွင်ႈငမ်းယဵၼ် ဢမ်ႇထၢတ်ႇဢမ်ႇဝၢႆးၼၼ်ႉၵေႃႈ ယိၼ်းၸူမ်းယူႇသေ လႆႈမုင်ႈမွင်းဝႆႉ တႃႇ မုၼ်ၸဝ်ႈၽူပ်ႉ မႃးဢႅဝ်ႇႇလႄ တီႈယူႇၶရဵၼ်းယူႇ“ ဝႃႈၼႆ။ ၽူႈမီးသုၼ်ႇလၢတ်ႈ ၽၢႆႇဝႃႇတီႇၵၼ်ႇ ၶိုၼ်းသၢင်းလၢင်းဝႃႈတႄႉ “လွင်ႈဢၼ်မုၼ်ၸဝ်ႈၽူပ်ႉ လၢတ်ႈၵႂႃႇၼၼ်ႉ မၼ်းဢမ်ႇၸႂ်ႈ တွၼ်ႈတႃႇႁႂ်ႈ ယူႇၶရဵၼ်းၶဝ် ဝၢင်းၶိူင်ႈ၊ မၼ်းပဵၼ် လွင်ႈတိုၵ်းသုၼ်း တႃႇႁႂ်ႈၵိုတ်းလွင်ႈပႅင်းၸင်းႁဵတ်းၶဵၼ်ၵၼ်သေ ႁႂ်ႈမီးတၢင်းႁတ်းႁၢၼ် ငူပ်ႉငိၵၼ်“ ဝႃႈၼႆ။ ၼၼ်ႉမၼ်းလုၵ်ႉတီႈ ႁွင်ႈၵၢၼ်ၶၢဝ်ႇ တီႈ သဝိတ်ႉၸႃႇလႅၼ်ႇ ဢၼ်ၼိုင်ႈ လႆႈတွင်ႉထၢမ် မုၼ်ၸဝ်ႈၽူပ်ႉသေ မၼ်းယိူင်းၸူး လွင်ႈငူပ်ႉငိၵၢၼ်ငမ်းယဵၼ် ဢၼ်ယူႇၶရဵၼ်းၶဝ်ႁဵတ်းၼၼ်ႉသေ မၼ်းလႆႈၸႂ်ႉ ၶေႃႈၵႂၢမ်း ၸွမ်ပိဝ်ၶၢဝ်ဝႆႉလႄႈ မုၼ်ၸဝ်ႈၽူပ်ႉၵေႃႈ လႆႈထတ်းသၢင်ပၼ်ၵႂၢမ်းမၢႆမႃးၼႆ ၽၢႆႇဝႃႇတီႇၵၼ်ႇၶဝ်တႄႉ သပ်းလႅင်းဝႆႉၼင်ႇၼၼ်ယဝ်ႉ။
Zelenskyy လၢတ်ႈမႃးတႄႉ ႁူမ်ႈဝႃႈ ၶႂ်ႈလႆႈ လွင်ႈငမ်းယဵၼ်ယူႇသေတႃႉ တႃႇတေလႆႈပွႆႈသုမ်းလႅၼ်လိၼ်တႄႉ ဢမ်ႇပဵၼ်လႆႈ ဝႃႈၼႆ။ ၽၢႆႇႁေႃၶမ်း ၵရႅမ်ႇလိၼ်ၵေႃႈဝႃႈ ပေႃးတေပဵၼ် ပၢင်ဢုပ်ႇဢူဝ်းလွင်ႈငမ်းယဵၼ် ဢၼ်ၸွမ်းၼင်ႇ ပၵ်းပိူင်ၵိပ်ႉ ၼၼ်ႉတႄႉ ၶဝ်ၵေႃႈ တေဢမ်ႇၶဝ်ႈပႃးလႆႈ လွင်ႈငူပ်ႉငိၵၢၼ်ငမ်းယဵၼ် ဝႃႈၼႆ။
ငိူၼ်ႈငဝ်ႈတိုၼ်း
- VOA News. "Zelenskyy Dismisses Pope's 'Courage to Negotiate' Comments as 'Virtual Mediation'" — VOA News, March 10, 2024
- VOA News. "ရုရှားနဲ့စေ့စပ်ရေး ပုပ်ရဟန်းမင်းတိုက်တွန်းချက် ယူကရိန်းဝေဖန်တုံ့ပြန်" — VOA News, March 11, 2024
