Wn/shn/ပၢႆႇတႅၼ်ႇလၢတ်ႈဝႃႈ ဢီႇရၢၼ်းၶဝ် လႅပ်ႈတေၸဵဝ်း တွပ်ႇတႅၼ်း ဢိတ်ႇသရေး
ဝၼ်းသဝ်၊ ဢေႇပရႄႇ 13၊ 2024
ၸဝ်ႈၸွမ်ၸိုင်ႈ မိူင်းႁူမ်ႈတုမ် ဢမႄႇရိၵၢၼ်ႇ ၵျူဝ်းပၢႆႇတႅၼ်ႇ လႆႈမွၵ်ႇလၢတ်ႈ မိူဝ်ႈ ဢေႇပရႄႇ 12 ၼၼ်ႉဝႃႈ ဢီႇရၢၼ်းၶဝ်ၼႆႉ ၶဝ်တေဢမ်ႇၸၼ်ၶၢဝ်းယၢမ်းသေ ၶဝ်တေလႅပ်ႈ တွပ်ႇတႅၼ်းတိုၵ်းတေႃး ဢိတ်ႇသရေး ဝႃႈၼႆသေ လႆႈပၼ်ၽၢင်ႉဢီႇရၢၼ်းဝႃႈ ယႃႇပေႁႂ်ႈႁဵတ်းၸိူင်ႉၼၼ် ဝႃႈၼႆ။
ၽူႈဢဝ်ၶၢဝ်ႇၶဝ် တွင်ႈထၢမ်ဝႃႈ တေၶႂ်ႈၽၢၵ်ႇၵႂၢမ်း ဢီႇရၢၼ်းသင် ၼႆ ပၢႆႇတႅၼ်ႇတွပ်ႇၶိုၼ်း ပွတ်းပွတ်းဝႃႈ "ယႃႇႁဵတ်း" ဝႃႈၼႆယဝ်ႉ။ မၼ်းသိုပ်ႇလၢတ်ႈၼၵ်းၼၵ်းၼႃၼႃ လွင်ႈဢၼ်ၵဵဝ်ႇၵပ်းလူၺ်ႈ ၵႂၢမ်းမၼ်ႈဢမႄႇရိၵၢၼ်ႇ ဢၼ်ဝႃႈ တေၵႅတ်ႇၵင်ႈပၼ် ဢိတ်ႇသရေး ဢၼ်ဝႃႈၼၼ်ႉယဝ်ႉ။
ပၢႆႇတႅၼ်ႇ မွၵ်ႇလၢတ်ႈ ၽူႈဢဝ်ၶၢဝ်ႇၶဝ် တီႈႁိူၼ်းၵႅဝ်ႈၶၢဝ်ဝႃႈ "ႁဝ်းၶႃႈ ဝႆႉလွင်ႈၼၵ်းၼႃၼိူဝ် တွၼ်ႈတႃႇ ၵႅတ်ႇၵင်ႈပၼ်ဢိတ်ႇသရေးသေ ႁဝ်းၶႃႈ တေၵမ်ႉထႅမ်ပၼ် ဢိတ်ႇသရေးၵႂႃႇယူႇ။ ယွၼ်ႉပိူဝ်ႈဝႃႈ ႁဝ်းၶႃႈ တေပၼ်တၢင်းၸွႆႈထႅမ် လွင်ႈၵႅတ်ႇၵင်ႈ ဢိတ်ႇသရေးလႄႈ ဢီႇရၢၼ်းၶဝ် တေဢမ်ႇဢွင်ႇမၢၼ်လႆႈ" ဝႃႈၼႆ။
မိူင်ႈဝူင်ႈဝၢင်ႈပူၼ်ႉၼၼ်ႉ လုမ်းၽွင်းတၢင်ဢွၼ်ႇ ဢီႇရၢၼ်း ဢၼ်မီးတီႈ ဝဵင်းလူင် တမၢသ်ႉၵၢသ်ႉ တီႈ မိူင်းသီးရီးယႃးၼၼ်ႉ လႆႈထုၵ်ႇတိုၵ်းတေႃးသေ ၵူၼ်ႈၽွၼ်းတပ်ႉထၢၼ်ႈယႂ်ႇ တပ်ႉၸုမ်းၵႂၢတ်ႉ ဢၼ်ပၵ်းၼွၵ်ႈမိူင်း ဢၼ်ပဵၼ် တပ်ႉလုၵ်ႉၽိုၼ်ႉဢီႇရၢၼ်း လႄႈ ၽူႈမီးၸၼ်ႉတၢင်ႇၸိူဝ်း ႁူၵ်းၵေႃႉ လႆႈတၢႆၵႂၢႇလႄႈ လႆႈမီးလွင်ႈပၼ်ၽၢင်ႉဝႃႈ ဢီႇရၢၼ်းၶဝ် ၸၢင်ႈၶိုၼ်းတွပ်ႇတႅၼ်းတိုၵ်းတေႃးၼႆလႄႈ ဢိတ်ႇသရေးၶဝ် လႆႈႁၢင်ႈႁႅၼ်း ၽေးၶဵၼ် ဢၼ် ဢီႇရၢၼ်း ဢမ်ႇၼၼ် ဢၼ်ပဵၼ် ၸုမ်းဢၼ်ၵဵဝ်ႇၵပ်းဢီႇရၢၼ်းၶဝ် တေတိုၵ်းတေႃးမႃးၼၼ်ႉယူႇ ဝႃႈၼႆ။
ဢိတ်ႇသရေးၶဝ်တႄႉ လွင်ႈတိုၵ်းတေႃး ဢၼ်ပဵၼ်ၵႂႃႇမိူဝ်ႈ ဢေႇပရႄႇ 1 ၼၼ်ႉ ၶဝ်ဢမ်ႇလႆႈ ထူၵ်းလၢတ်ႈဢွၵ်ႇဝႃႈ ပဵၼ်ႁွႆးမိုဝ်းၶဝ်ၼႆသေတႃႉ ဢၼ်ပဵၼ် ၸဝ်ႈၵႂၼ်းပၢႆး သႃႇသၼႃႇဢီႇရၢၼ်း ဢယႃႇတူဝ်ႇလႃႇဢလီၶႃမေၼီ လၢတ်ႈဝႃႈ လူဝ်ႇလႆႈပၼ်တၢမ်ႇ ဢိတ်ႇသရေး လႄႈ တေမီးလွင်ႈႁၢင်ႈၵၢၼ်သိုၵ်း ဢၼ်မိူၼ်ၼင်ႇ လႆႈထုၵ်ႇတိုၵ်းတီႈ လိၼ်ဢီႇရၢၼ်း ဝႃႈၼႆယဝ်ႉ။
ဢမႄႇရိၵၢၼ်ႇၶဝ်တႄႉ တွၼ်ႈတႃႇ ၵႅတ်ႇၵင်ႈ ဢိတ်ႇသရေးလႄႈ ၵူၼ်းသိုၵ်းဢမႄႇရိၵၢၼ်ႇ ၸိူဝ်းမီးတီႈ ပိုၼ်ႉတီႈၼၼ်ႉၼႆသေ လႆႈၽႄႈဝၢင်း ႁိူဝ်းသၢင်းၽေႃးသိုၵ်းၶဝ်ဝႆႉ ၽႂ်းၽႂ်းသေ ပဵၼ်တွၼ်ႈတႃႇ ႁႄႉႁၢမ်ႇလႆႈ လွင်ႈဢီႇရၢၼ်း တေတိုၵ်းတေႃး ဢိတ်ႇသရေး ဢၼ်လႅပ်ႈတေပဵၼ်မႃး တီႈ ဢေႇပရႄႇ 12 ဢမ်ႇၼၼ် 13 ၼၼ်ႉ ၼႆ တီႈၵျႃႇၼႄႇလ်ဝေႃးလ်သထရိ လႆႈတႅမ်ႈဝႆႉ မိူဝ်ႈ ဢေႇပရႄႇ 12 ၼၼ်ႉယူႇ။
ၵူၺ်းၵႃႈဝႃႈ တီႈ ၵျႃႇၼႄႇလ် ဝေႃးလ်သထရိ မွၵ်ႇလၢတ်ႈဝႃႈတႄႉ ၽူႈဢၼ်ၸမ်ၵၼ်တင်း ၽူႈဢွၼ်ႁူဝ်ဢီႇရၢၼ်းလၢတ်ႈဝႃႈ ၶဝ်တိုၵ်ႉဢုပ်ႇဢူဝ်း ၶပ်ႉမၢႆတႃႇတေတိုၵ်းတေႃးသေတႃႉ ပႆႇပႃႈလႆႈတႅပ်းတႅတ်းသင် ဝႃႈၼႆ။
ၸိူဝ်းပဵၼ် မိူင်းဢိၼ်းတီးယႃး၊ ပူဝ်ႇလႅၼ်ႇ လႄႈ ရတ်ႈသျႃး လႄႈ မိူင်းၵမ်ႇၽွင်ႈတႄႉ လႆႈပၼ်ၽၢင်ႉၵူၼ်းမိူင်းမၼ်း ယႃႇပေႁႂ်ႈဢွၵ်ႇၶၢဝ်းတၢင်းၸူး ၼႂ်းပိုၼ်ႉတီႈ ဢၼ်မီးလွင်ႈၶဵင်ႈၶႅင် ဢၼ်ၵဵဝ်ႇၵပ်းလူၺ်ႈ ပၢင်သိုၵ်းၵႃႇၸႃႇၼၼ်ႉ ၼႆယဝ်ႉ။ မိူင်းၵျႃႇမၼီႇၵေႃႈ လႆႈတိုၵ်းသူၼ်းၵူၼ်းမိူင်းမၼ်း ၸိူဝ်းဢၼ်မီးယူႇတီႈ ဢီႇရၢၼ်းၼၼ်ႉ ႁႂ်ႈဢွၵ်ႇတီႈၼႂ်းမိူင်းၼၼ်ႉ ဝႃႈၼႆယဝ်ႉ။
ငိူၼ်ႈငဝ်ႈတိုၼ်း
- Natasha Bertrand, MJ Lee, Kevin Liptak လႄႈ Samantha Waldenberg. "US expects Iran to carry out direct attack on Israel, sources say, as Biden warns ‘don’t’" — CNN, April 12, 2024
- Kathryn Armstrong & Hugo Bachega, Middle East correspondent. "Joe Biden expects Iran to attack Israel 'sooner than later'" — BBC, April 12, 2024
- Peter Beaumont, Julian Borger လႄႈ Patrick Wintour. "Iranian attack on Israel expected ‘sooner rather than later’, says Joe Biden" — The Guardian, April 13, 2024
- The New York Times. "Biden’s Message to Iran Over Impending Attack: ‘Don’t’" — The New York Times, April 12, 2024
