Wn/cdo/第三屆福州語歌曲大賽福州賽區總決賽結束
【2018年7月28號福州訊】
今旦（28號），第三屆福州語歌曲大賽福州賽區總決賽結束。比賽敆東二環路泰禾劇場舉行，分了少兒組共成人組。早頭是伲囝哥比並，下晝是大儂競技。
成人組其參賽歌手，出身其所在𣍐蜀樣，本底其職業也𣍐蜀色。總決賽之前，福州市區、閩侯、連江、福清都設了分賽區，優勝其選手乍會參加總決賽。茲蜀回總決賽，伊各儂其歌曲風格也𣍐蜀色——有通俗、民族美聲、講唱、摇滚，等等。部分選手有正字其意識，MV字幕盡量都使福州話其字，有其同時提供福州話共普通話其字幕。
成人組其比並共總有兩輪。頭蜀輪設了4芘章節——《閩都記憶》、《唐音風彩》、《溫情榕城》、《故園之戀》。每蜀章節有4組選手聯唱，蜀組選手聯唱蜀條歌。每隻選手唱45秒，蜀隻唱完蜀隻接下去唱。唱完蜀章節，7隻評委點評。評委有其來自閩劇院、歌劇團，有其儂是敆創作福州話歌曲其領域有名氣。
《閩都記憶》章節其歌是《福道彎彎》、《烏龍江畔》、《金厝邊銀鄉里》、《咔溜幫》（客佻幫），都是鄉土風情其歌。評委點評茲蜀輪其時候，建議有其歌手以後著注意咬字。《唐音風彩》章節，歌曲豪情萬丈，選手也頒𡅏喉嚨管唱歌。評委點評其時候，認爲部分歌手聲音無夠大，固對音準提出了要求。《溫情榕城》環節，宋開新反串獨唱，做閩劇新唱，讓有其觀眾見覺野新奇。評委共茲蜀輪其歌手提出了感情方面其建議，認爲著讓聽其儂體會遘對家鄉其熱愛。《故園之戀》選歌柔情。選手鞠連華唱了《水中間》，咬字盡去野清楚。
| 章节 | 歌曲 | 表演其儂 | |
|---|---|---|---|
| 原名 | 福州話漢字 | ||
| 閩都記憶 | 福道彎彎 | 小豬佩奇組合 | |
| 烏龍江畔 | 莫離組合 | ||
| 金厝邊銀鄉里 | 施靜 | ||
| 咔溜幫 | 客佻幫 | 劉向鷹 | |
| 唐音風彩 | 卜入省城 | 林侃 | |
| 酒歌 | 馬達組合 | ||
| 做風颱 | 兄弟組合 | ||
| 天暗出發 | 潘建旺 | ||
| 溫情榕城 | 恩恩愛愛 | 茉莉花組合 | |
| 我家住在洪塘邊 | 我厝住著洪塘邊 | 鄭筠 | |
| 梅花淚 | 宋開新 | ||
| 唱響福州歌 | 林旭 | ||
| 故園之戀 | 含笑花 | 鄭秋 | |
| 水中間 | 鞠連華 | ||
| 細細妹思故鄉 | 林莎朗 | ||
| 八月十五月光光 | 吳和新 | ||
每蜀隻選手表演之前，屏幕懸頂會放VCR。VCR都是選手自家錄其，內容是使福州話介紹自家。有蜀芘組合，號𡅏馬達組合，有兩隻儂。馬達組合介紹自家其時候，講伊儂蜀隻由馬來西亞來，蜀隻是福州其。茉莉花組合是由連江賽區來其，成員來自連江音樂家協會。固有蜀隻長樂儂，號𡅏劉向鷹，介紹時講自家是「長樂一哥」，讓舞臺下底其各儂大笑。VCR裏勢，有其儂福州話拉拉酥，聽起去就像平常稠稠講，嚽就讓自家共觀眾其距離近了仂囝。有其平話雖然無夠好，但是也努力講。
比賽之前，主辦方有敆微信請來100隻觀眾做「大眾評審」。野価選手其親戚都遘現場，做大眾評審，乞厝裏儂加油助威。評審其觀眾年齡層普遍比較大，也有後生囝十幾隻。有維基記者也做了大眾評審。比賽頭蜀輪其時候，每蜀章節評委點評完，大眾評審就可以投票，選出第一中意其選手。選手最後得遘其頭蜀輪分數是支持率其10%。
第二輪，16組選手自家唱歌。林莎朗是成人組第一嫩其選手，17歲。伊敆茲蜀輪固帶了三隻伲囝哥，共伊做陣跳舞。茲蜀輪，7隻評委聽完蜀條乞蜀回分數。除去最懸共最低其分數，長下來其分數取平均值。茲蜀輪評委會乞其滿分是100分。
所有儂唱完，大眾評審介選出中意其兩隻選手。觀眾投票之前，固有選手拉票其環節，每蜀隻儂或者組合有蜀分鐘表現自家。有蜀芘兩隻儂其組合，使beatbox拉票，嚽也讓部分觀眾見覺野新鮮。有蜀芘組合，蜀隻男界，蜀隻女界。兩隻儂也敆這辰候介紹講，伊儂蜀隻是浙江儂，蜀隻福州儂。選手由大眾評審夫塊得遘其分數，是支持率其10%。評委乞其分數，共大眾評審其相加，就是第二輪其成績了。
兩輪分數加起去，遘尾選出10隻儂。今旦共總選出17隻儂，其中少兒組7隻。贏其儂會敆蜀麇去馬祖，參加全球總決賽，共臺灣、馬來西亞其歌手比並。兹蜀回晉級其選手，固會有機會參與《2019世界福州十邑春晚》。
| 序號 | 選手 | 形式 | 性別 | 歌曲 | ||
|---|---|---|---|---|---|---|
| 原名 | 福州話漢字 | |||||
| 1 | 孫桐 | 組合 | 兄弟組合 | 男 | 兄弟講這 | 兄弟講嚽 |
| 蔣旭斌 | 男 | |||||
| 2 | 朱曉雯 | 組合 | 小豬佩奇組合 | 女 | 三落厝 | |
| 何珺潔 | 女 | |||||
| 3 | 劉向鷹 | 獨唱 | 男 | 齊齊走 | 齊齊行 | |
| 4 | 吳和新 | 獨唱 | 男 | 唱響福州歌 | ||
| 5 | 陳峰 | 組合 | 馬達組合 | 男 | 咔溜幫 | 客佻幫 |
| 陳宇達 | 男 | |||||
| 6 | 宋開新 | 獨唱 | 反串 | 男 | 三方七巷 | |
| 7 | 林侃 | 獨唱 | 男 | 地鐵風雲 | ||
| 8 | 鞠連華 | 獨唱 | 男 | 有蜀條歌 | ||
| 9 | 蘭明群 | 組合 | 茉莉花組合 | 女 | 茉莉情 | |
| 黃宗鍵 | 男 | |||||
| 10 | 林莎朗 | 獨唱 | 女 | 按耐不住 | ||
| 序號 | 選手 | 形式 | 性別 | 歌曲 | ||
|---|---|---|---|---|---|---|
| 原名 | 福州話漢字 | |||||
| 1 | 馮宇碩 | 獨唱 | 男 | 我會想念你 | 我會想念汝 | |
| 2 | 連夢緣 | 獨唱 | 女 | 福道彎彎 | ||
| 3 | 林欣鍇 | 獨唱 | 男 | 三落厝 | ||
| 4 | 林可佳 | 獨唱 | 女 | 三月三青麥蒜 | ||
| 5 | 邱瑤 | 組合 | 小丫鮮組合 | 女 | 鎮海樓 | |
| 鄭哲鑫 | 男 | |||||
| 陳思睿 | 女 | |||||
| 俞子萱 | 女 | |||||
| 倪梓僮 | 女 | |||||
| 魏子筠 | 女 | |||||
| 肖詩榆 | 女 | |||||
| 林展顏 | 女 | |||||
| 6 | 肖可鑫 | 獨唱 | 女 | 公主磨難 | ||
| 7 | 鄭雨軒 | 組合 | 丫樂組合 | 女 | 依爸疼依媽 | |
| 陳桂鍇 | 男 | |||||
採訪
[edit | edit source]3號選手施靜、5號選手林侃——也就是「茶童」，固有評委楊柳，都接受了採訪。
以下是對3號選手施靜其採訪。
誒汝好。請問呀，汝對茲蜀回比賽有什乇感想無？
- 施：感想吓？
噯。
- 施：就是對儂家自家福州話其歌曲，總款傳統其，（見覺）比較好仂囝。
汝對今旦自家其表現見覺怎其？
- 施：表現總體來講固野有好，但是固是需要更好其去學，有辦法讓自家其歌曲技術更好，更懸——更向懸仂囝。
會使。謝謝，謝謝。
- 施：無事計。
-
茶童第二輪唱其歌是《地鐵風雲》，嚽是伊做其第三篇福州話新聞rap -
唱歌時候其樣式 -
大眾評審環節其茶童
5號選手林侃（茶童）敆總決賽其名單裏勢，以下是對伊其採訪。
請問吓，汝對今旦自家表現見覺怎其？
- 茶：今旦表現就是，正態表現。
正常其𣍐？
- 茶：噯。
噲因爲野像我野稠看見講使福州話說唱其嘛，然後見覺汝野厲害。汝對以後儂家福州話新其形式，見覺會有什乇發展無？
- 茶：我見覺儂家福州話寫歌其話，一定著向這電子歌方面去發展。不但是這我唱其rap——講唱音樂，仱以後固著增加其他其元素。比如講，現在有雷鬼。雷鬼，仱固有像噲trap。trap，固有更多其總款元素加裏。
就是罔變罔行時，總款伓是？
- 茶：嗯嗯。
後生囝聽嚽也會使了哇。
- 茶：無綻。因爲儂家福州話若卜想發展其話，一定著依靠儂家這90後，甚至00後。
噲汝仱就馬上就去馬祖比賽了嘛。仱有無什乇話想，自家講嗄？
- 茶：茲蜀回去馬祖許邊表演，我著讓大家見覺儂家福州歌伓是都差不多。
噯。
- 茶：因爲野価儂都見覺我唱福州其講唱盡像都囉囉嗦，但是（笑），但是我希望兹蜀回敆馬祖比賽完以後，大家也見覺儂家福州話「也很有味，有無？」
會使。謝謝，謝謝。
- 茶：嗯。
以下是對評委楊柳其採訪。
先生汝好，請問汝對茲蜀回比賽有什乇感想無？
- 楊：我見覺呵，茲回比賽其各儂其水平野高喃，都唱其盡好。比這舊底其幾屆，可以講伊是上了蜀隻階座，上了蜀隻層次，罔來罔好，選手各儂其水平也罔變罔好。
噲茲蜀回汝對俤蜀隻選手印象最深哩？
- 楊：印象最深就是茲蜀回這頭蜀名，號𡅏兄弟哥組合。
兄弟哥。
- 楊：吓。兄弟哥組合唱其確實無呆。固有這福州話rap，吓這類別正是，蜀行出來，就乞儂蜀種全新其感覺。
謝謝，謝謝。
