Wn/cdo/福州語文學音樂劇《寶姨》臺灣桃園演出

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

【2018年7月12號訊】

昨暝（11號），福州語文學音樂劇《寶姨》敆臺灣桃園展演中心鐵玫瑰劇場演出，故事讓野価觀眾野感動，忍儥得去啼去。

前幾日卜做風颱，固加劇組8號乍敆馬祖南竿完整排練蜀過，演員都驚11號會儥無辦法演了。遘尾了固是按原計劃行，9號搭機遘桃園。昨暝早頭，風颱大做。10點21分，「文化馬祖」面書公共主頁講，暝晡脈過去伓敆風圈裏勢，會使按原定時間安心演。半暝6點無遘，已經有野価儂來遘展演中心。其中敆臺灣其馬祖儂，都是趁臺北、新北、桃園、新竹、臺中來其。

茲蜀回音樂劇，主辦將主視覺共節目梗概，印敆雕花扇骨其摺扇𡅏，送乞觀眾，儂儂都有。觀眾掏手𡅏客佻，或且䀹相，見覺野有味。音樂劇講了「寶姨剪裁旗袍，也剪裁自家跨越三代其傳奇人生」其故事，故此有頌旗袍看劇其女界，都會使得遘紀念禮物。

《寶姨》其原作者是劉宏文。伊以前共丈奶陳鈺瑛攀講其時候，講伊聽了寶姨其故事。之後劉宏文使華語共福州語寫出了茲蜀部作品，掏下了第5屆新北市文學獎黃金組首獎。評委看會意了原文其平話，固講會使䀹電影。茲蜀回《寶姨》其音樂劇，是由謝淑靖導演。

消息來源

原創報導
這報導有維基記者其第一手新聞。可以看討論頁了解詳情。