Wb/nia/Mama'anö Taromali Ero Luo Migu/Döfi C/Migu si-27
Famasao[edit | edit source]
Fatua lö mangandrö ba zi bongi, halö ginötö mato 10-15 menit ba wamondrondrongo Taromali. Andrö khö nösi nomo ena'ö lahalö ua wa'ahono, ena'ö böi moloi-loi dödöra.
Börötaigö faoma fangandrö sadogo-dogo ba wangandrö haga Geheha Ni'amoni'ö.
Aefa da'ö andrö khöra fefu ena'ö lahasugö ira mato sambua menit ba latöröi tödöra gofu hadia zi no latörö ba zi ma'ökhö andre bakha ba wa'omasi Zo'aya. Awena andrö samösa nösi nomo wombaso Taromali andre tou nihalö moroi ba Injil migu fönada.
Mombaso Taromali[edit | edit source]
Me möi Yesu ba Yudea, la'ondrasi ia ira farizai'o ba wanandraigö ya'ia. Lamane khö-Nia, "Hadia tola iröi ndrongania samösa niha." Imane khöra, "Hadia goroisa Moze sanandrösa ba da'ö?" Latema li-Nia, "Tola iröi ndrongania niha na no isöndra zura wamabali." Imane khöra Yesu, "Ibe'e khömi goroisa andrö Moze börö wa'abe'e dödömi. Sindruhunia no ifazökhi niha Lowalangi iramatua ba ira'alawe. Andrö iröi namania awö ninania niha, ena'ö tobali sambua boto ira ndrongania, tenga dombua sa'ae. Si no i'osambua'ö Lowalangi böi ya'ifabali niha."
Me larugi nomo, lasofu zui khönia da'a ira nifaha'ö.
Imane khöra, "Haniha zondröi ndrongania ira'alawe ba ihalö ndra'alawe bö'ö no ifalua horö. Simanö göi na iröi ndrongania iramatua samösa ira'alawe ba ihalö ndramatua bö'ö, no ifalua horö. (Mrk 10:2-12)
Mangerönusi[edit | edit source]
Be ginötö khö nösi nomomö ero zamösana ba wanutunö hadia wehede si tokana ba dödöra moroi ba Daromali andrö. Hadia so nitörö dödöra me larongo ia? Hadia so nisofu dödöra?
Moguna tetöngöni wa lö si sala ma sifaudu ba wo'erönusi Taromali andre. Ero zöndra ba no faudu, no da'ö nifatumbu'ö Geheha khöra. Börö da'ö böi ŵa'ö khö nono khöu ma khö wo'omou wa ambö fagöna niŵa'önia. Tema'ö manö gofu hadia ia nifa'ele'ö Geheha khöra ba be ba dödöu. Odödögö ena'ö böi alaŵö ira fahuhuo ba gofu hadia nifa'ele'ö Geheha khöra tola lafalua ia baero.
Na lö ba gotaluara zanofu, ba tola öfatumbu'ö ba dödöra, hadia molo'ö ya'ira geluaha "sambua boto" ba Daromali andrö mege? Heza tola ta'ila wa sambua boto niha si no mangowalu? Hadia oroma wa si sambua boto ira na lafatunö zi so ba dödöra? Hadia sambua boto ira ba wangomasi'ö iraono khöra? Hadia sambua boto ira ba wangetu'ö fefu hadia ia ba nomo? Hadia sambua boto ira ba wamalua halöŵö si ero ma'ökhö?
Mamatöfa[edit | edit source]
Na tabaso Daromali andre, hadia ya'ö zomasi Zo'aya tafalua? Hana wa ba migu andre ifasugi ba dödöda So'aya wa niha si no mangowalu andrö ha sambua boto? Heza tola ö'oroma'ö wa ha sambua boto ndra'ugö khö wo'omomö? Angeragö sambua zinangea öfalua migu andre ba wangoroma'ö wa ha sambua boto ndra'ugö khö wo'omomö.
Fangandrö[edit | edit source]
Duhö ginötö ni'amoni'ö andre faoma fangandrö sadogo-dogo. "He Yesu So'aya, no tobali ndra'ugö enoni zato me andrö gohitö dödö-Mö ba wamalua böwö si sökhi ba niha. Tolo ndra'o ba wolo'ö duma-duma andre, ena'ö omoma, banuama, stasima itugu ara itugu afönu lakhömiu. Amen."
Ma zui fangandrö ba zi bongi na mifalua ia ba zi bongi.
Nitöngöni[edit | edit source]
Lala wangerönusi andre no tehalö moroi ba wednesdayword.org nifa'anö namada P. Henry Wansbrough OSB ni'oguna'ö ba fefu zekola Katolik ba ba paroki ba Konferensi Wali Gereja Inggris ba Wales. P. Henry no samösa zama'anö sura ni'amoni'ö ba li Inggris sotöi New Jerusalem Bible faoma Revised New Jerusalem Bible ba te'oguna'ö ba Gereja-Gereja ba Inggris. Heŵa'ae simanö ha dane-dane zinura andre ia. No sa mufa'anö nisura ba da'e ena'ö faudu ba li khöda ba ba zi to'ölö khöda ba Danö Niha.
Taromali andre yaŵa no musura molo'ö lala wehededa ba li Niha ma'ökhö, ena'ö aoha ia khöda tobali börö wangerönusi, simane göi nifalua P. Henry ba wednesdayword.org ba li Inggris. Börö da'ö tola manö wa fabö'ö ngawua wehede ni'oguna'ö ba hiza lö sa fabö'ö geluahania. Nisura mangawuli ba li khöda moroi khö Sirus Laia, London, Inggris.