Jump to content

Wb/nia/Filemo/1

Add links
From Wikimedia Incubator
< Wb | nia | Filemo
Wb > nia > Filemo > 1

Fangowai

[edit | edit source]

I. 1 Faulo, nikuru andrö khö Keriso Yesu, zanura da'e, ba Timoteo, talifusö andrö, khö Wilemo andrö, ni'omasi'ö, awöma, ba halöŵö andrö,[1] 2 ba khö Gafia, talifusö alawe andrö, ba khö Garikhifo, awöma andrö, ba wasöndrata, ba ba mbanua andrö, yomo khöu.[2] 3 Yafalukha ami wa'ebua dödö ba fa'ohahau dödö, khö Namada Lowalangi, ba khö Yesu Keriso, So'aya ya'ita![3]

Fa'omuso dödö ba wamati Wilemo

[edit | edit source]

II. 4 Lö mamalö-malö wangandrögu saoha gölö khö Lowalangigu, na itörö tödögu ndra'ugö, na mangandrö ndra'o,[4] 5 börö me urongo wa'omasiu andrö, ba famati andrö khöu, khö Zo'aya, Yesu, ba ba ni'amoni'ö andrö, fefu;[5] 6 ena'ö abölö wa'awösa andrö ba wamatimö, ba wamotokhi ba dödöu fefu hadia ia zi sökhi, ba khöda, khö Keriso.[6] 7 Noa sa abölö wa'omuso dödögu, ba fondrara dödögu, ba wa'omasiu andrö, me no te'okafui dödö ni'amoni'ö andrö, ba khömö, ya'ugö talifusö.

Fangandrö ena'ö ihalö Gonesimo Filemo

[edit | edit source]

III. 8 Andrö, he ŵa'ae tola manö, ba khö Keriso, ube'e goroisa khöu, ba zi nangea andrö, ba edönado zui mangandrö khöu, börö wa'omasi andrö: Ya'odo andre, 9 Faulo satua andre, ba nikuru göi iada'e, khö Keriso Yesu,[7] 10 u'andrö khöu, ba khö nonogu andrö, nisöndragu onogu, ba gurunga andre, Onesimo "soguna" andrö,[8] 11 si no si lö guna khöu föna, ba soguna iada'e, he khöu, ba he khögu.

12 Ufatenge ia mangawuli; tödögu nifatengegu. 13 Utaha ia mena'ö khögu, ena'ö ngoni-ngonigu ia, salahiu, ba gurunga andre, ba duria somuso dödö andrö.

14 Ba lö'ö sa edönado ulau hadia ia, na lö niteheu, fa böi hulö zabua ölö ndra'ugö, ba dolo-tolomö andrö, ena'ö saoha gölö.

15 Ma andrö aefa ia khöu ma'ifu, ena'ö lö'ö sa'ae tebulö ia khöu, 16 tenga sa'ae sawuyu, si töra moroi ba zawuyu, no talifusö ni'omasi'ö, oföna khögu, ba mendrua manö na i khöu, he botonia, ba he ba khö Zo'aya.[9] 17 Ba na belau ndra'odo, öŵa'ö, ba tema ia, hulö na ya'o mena'ö. 18 Ba na no te'ala ndra'ugö, ibe'e mege, ba ma na so gömönia khöu, ba be'e ömögu.

19 Ya'o, Faulo, zanura da'e, tangagu: Ya'o zamu'a; fa lö uŵa'ö khöu, ömöu khögu ndra'ugö andrö göi.[10] 20 Si ndruhu, ya'ugö ga'a, ena'ö mohare ndra'o khöu, ba khö Zo'aya! Okafui dödögu andre, ba khö Keriso![11]

Fango'ozui sura

[edit | edit source]

IV. 21 Me no udöna-döna wolo'ömö, andrö usura khöu da'ö, me no u'ila, tenga ha niŵa'ögu andrö ö'o'ö, otöraigö na i. 22 Ba endrongagö göi wamaigi naha khögu; udöna-döna sa, tebe'e buala ndra'o khömi, börö wangandrömi andrö.[12]

23 I'owai ndra'ugö Efafera, awögu nikuru andrö, ba khö Keriso Yesu,[13] 24 ba Mareko ba Arisaro ba Dema ba Luka, awögu ba halöŵö andrö.[14]

25 Yafalukha dödömi wa'ebua dödö Zo'aya, Yesu Keriso.[15]

Famotokhi ba gahe

[edit | edit source]
  1. ↑ Efes 3:1; 4:1; KorII 1:1
  2. ↑ Kol 4:15–17
  3. ↑ Kol 1:2
  4. ↑ Rom 1:8
  5. ↑ Kol 1:4
  6. ↑ Gal 5:6
  7. ↑ TimII 1:8
  8. ↑ KorI 4:15; Kol 4:9
  9. ↑ TimI 6:1–2; Efes 6:5
  10. ↑ TesII 3:17
  11. ↑ Ayati 10:11
  12. ↑ Heb 13:19
  13. ↑ Kol 1:7
  14. ↑ Kol 4:10–14
  15. ↑ TimII 4:22

Fabaliŵa lala

[edit source]

Olayama Zura Filemo: 1

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Filemo/1&oldid=6229849"