Wp/srr/Yoonir
Yoonir, o xoor ole no Seereer we. Mbaldoo o fog ole.
Mexey simnaa o kiin o kiin no gon um fo no simanGol um to xeƌanan jam. Yaasam jam a adu, jam a reef, jam a rok a ndeer. Xane koy kaam bugo lay no kaa jofna no o xoor ole no Seereer we na xoyeel YOONIR. O xoor olene kaa jeg solo yaam o Seereer kaa wegoortan. Nene a garit u na betandax ake i nan na.
A keel ale kaa ñaaƈ bo a xij. Yaa ta fadiidna no joor ola, a geenwa. A ƌeet o njokoƃ onqe widuuna. A bug a ƃoof, to a xel a fi ke daan um a mbiogna yaaga bo fa ndiik. Ke a ƃoof ake ten a magin ina fop, o kiin waag ee muusaa fexey bo ga a den. Ndaa paafal ke may ata ndiiki bo ƌasnin a den xana refat tig ƌomu. O ten fa xooxum jaaxiƌ ee yaam a waag a fool a yet, ndaa xa Ƥiy axe ten ta yiifoogu. Nene, ta xeƭ a Roog ndax ta wootwin, to Roog a layin ta fiis o xoor.
In fop I anda ee a cek a bugangaa ƃoof, a naanga copaa o reex o deƃ to a fiisaa ke widuuna fop. Nene, ta fi we kaa jeg ke Roog a laluuna, a keel ale a fiisa fo o copir ole ten o xoor ola jegna a qoox a ƃetak to a yaaco yoornu na ñamaak. Ta gas a ndeer o xoor ole to a ƃoof maaga, a uup a ƃoof ake so a xeƭ a Roog ee:
- "Oxuu xaƃatna ba muƃ!
- Oxuu muƃna ba xaƃat!
- Oxuu retna ba gar!
- Oxuu garna ba ret!
- Oxuu nutna ba ga at!
- Oxuu ga na ba nut!
- Adna kitim kiriis!
- Mendeng meles!
- Wegooraam meles!
- Waageerna na Roog tig, ba waag na mi tig!"
Nene, oxuu and ina ref a ndeer o xoor olene, o leng waagke na ten tig. Nene, a keel ale Roog a jangin ina a qed alene, a reta a waas a ƃoof ake maaga. Muumeen ke fo paafal ke a ngara ndaa o leng waag ee suur bo a daaw a ƃoof ke. Yaa da mbadna mboƳtel, a keel saaƭe dakwiid to a Ƥis fo ngel fo ndeƃ ne kam o njoc onqe. Ndike ye ta woƳtaa, a jeg a o kaynaak oxaa fod ina koɗu to a ga fop. Ye a keel ale retna, a gara to a ga a o xoor ole. Ta and ee, no ndimle Roog, o xoor olene wootwogu a ƃoof ake keel ale. Kene taxu bo a nog ake, o Ƥiy den a nanga ñaaƈ kaa, na qeɗ den a naanga ne a a keel.
Ƭeetyo ne[edit | edit source]
Ta inoor na[edit | edit source]
- Gravrand, Henry, La Civilisation Sereer - Pangool, vol. 2. Les Nouvelles Editions Africaines du Senegal (1990), pp. 98–99, ISBN 2-7236-1055-1