Wp/xmm/Mata
Mata tu bagian badang yang depe guna for kita malia, kalu di manusia depe bentuk bundar, kalu di binatang depe rupa bisa beda-beda. Ampir samua binatang tu ada depe mata. Lantaran depe rupa deng guna beda-beda, ada binatang yang depe mata dapa lia cahaya yang torang nyanda bisa lia, dorang tu bisa lia Cahaya Ultraviolet ato Cahaya inframera. Lantaran tu juga dorang pe mata bisa lia lebe jlas ato lebe jele, dan warna yang dorang lia juga beda-beda, ada yang lebe banya ato lebe sadiki. Ada juga yang dapa lia bae di tampa glap, biasanya dorang tu binatang yang ada ja kaluar malang-malang for bacari makang.
Mata pe Babagian
[edit | edit source]Manusia pe mata pe ada banya depe bagian, mar ni babagian nyanda pasti ada lei di mata binatang laeng. Babagian mata tu ada:
- Kornea, tu mata pe bagian atau lapis taluar, dia ni nyanda ada depe warna ato bening, depe guna for kase lindong iris dan biji mata.
- Biji mata, tu lingkaran itang di tenga mata, di tu tampa cahaya maso.
- Iris, tu lingkaran bawarna di biji mata pe ron, bisa bawarna soklat, biru, ijo, dan laeng-laeng warna. Depe guna tu for mangator brapa banya cahaya yang bole maso ke dalang mata.
- Sklera, tu bagian mata yang bawarna puti, depe guna for kase jaga tu mata pe bentuk.
- Mata pe lensa, tu bagian mata yang depe guna sama deng kamera pe lensa, otot-otot dalang mata bisa beking depe bentuk mambasar atau basempit. Lantaran kena pangaru usia ato hal-hal laeng, ada orang dong pe lensa ni nyanda bisa lagi bae-bae bakarja, so dorang musti ada ja pake kacamata ato Wp/xmm/ biar dong pe mata bisa bakarja bae.
- Retina, tu sel yang beking tu cahaya yang maso baruba jadi impuls sarap, biar bisa dikase antar pa ontak.
- Mata pe sarap, tu sarap yang kase hubung mata deng ontak, biar apa yang mata ada lia tu ontak kase proses dan dia beking jadi gambar.