Wp/xmm/Manusia
Manusia tu mahluk hidop yang da maso dalang jenis Homo sapiens, yang depe arti 'orang bijak' dalang bahasa Latin. Manusia tu maso jenis primata dari golongan binatang manyusu. Simpanse, gorila, deng orangutang tu binatang-binatang yang paling dekat dong pe ciri-ciri deng manusia.
Manusia tu mahluk sosial, kong dorang biasa jaga tinggal sama-sama supaya dorang bisa baku tolong dan baku jaga kong beking satu masarakat. Dorang jaga baku kase rawat dong pe anak-anak.
Lantaran manusia pe ontak pe kompleks dan lebe basar dari primata laeng, dorang bole pake bahasa for beking pikiran dan kase tunjung prasaan. Manusia nyanda perlu pake tangan for jalang rupa primata laeng, dorang bisa badiri dan bajalang deng dua kaki. Lantaran dong pe tangan bebas dan dong pe ontak kompleks tu, dorang kwa dapa beking dan pake alat-alat for beking muda dong pe karja hari-hari.
Samua manusia pe asal dari Afrika, kong dorang pigi kaluar dari sana dan datang tinggal di setiap benua. Pa taung 2022, ada lebe dari 8 miliar manusia ada tinggal di Bumi ini.
Manusia pe Asal
[edit | edit source]Manusia tu da maso dalang golongan binatang manyusu, yang depe arti tu manusia parampuang jaga baranak kong kase toto pa depe anak. Manusia tu maso golongan primata, sama deng rupa orangutang, gorila, monyet, deng yaki. Tu binatang yang ada paling dekat deng manusia tu simpanse deng bonobo. Para ahli ada bateliti simpanse pe DNA kong dapa lia kalu 95% sampe 99% dong pe DNA tu mirip deng manusia pe DNA
Manusia modereng partama ada skitar 300.000 sampe 200.000 taung lalu di Afrika Timur. Kong dari situ kwa manusia ada pigi kaluar dan bapinda tinggal di setiap benua.
Manusia pe Sejara
[edit | edit source]- Lia lei: Sejara Manusia
Manusia pe Tampa Tinggal
[edit | edit source]Awal-awal manusia tu ada tinggal di tampa yang dekat deng aer dan sumber alam laeng. Kalu so dapa tampa bae, kong dong jaga tinggal di situ sampe jadi desa, kong lantaran manusia trus batamba banya tu desa tamba basar trus jadi kota. Kabanyakan dari manusia tu ada tinggal di benua Asia (61%), kong depe sisa ada tinggal di benua Amerika (14%), Afrika (14%), Eropa (11%), deng Oseania (0,5%)
Manusia pe Badang
[edit | edit source]- Lia lei: Badang Manusia
Manusia pe badang tu butul ada beda-beda depe ukurang, pasti ba iko pa depe turunan dan lingkungan skitar, mar rata-rata manusia dewasa pe tinggi tu skitar 172 cm for laki-laki dan 158 cm for parampuang. Rata-rata manusia dewasa pe berat tu 70-83 kg for laki-laki dan 54-64 kg for parampuang.
Pa manusia pe badang ada batumbu rambu di kapala, lengan, kaki, dan kele, dan di kamaluan lei for manusia dewasa. Manusia pe rambu tu bole beda-beda depe warna, ada yang itang, coklat, merah, ato pirang, mar tempo manusia so umur tua dang, dong pe rambu tu biasa barobah warna jadi rambu puti.
Manusia pe kulit lei beda-beda depe warna, dari mera muda trang sampe coklat glap. Ini tu lantaran dalang manusia pe kulit ada satu jat warna (depe nama melanin) yang beking warna kulit jadi glap kalu manusia jaga biasa kena sinar matahari, supaya dong pe kulit nyanda rusa dari sinar ultraungu. Ni sinar ultraungu ini bahaya lantaran kalu talalu banya maso kulit bole beking kanker kulit ada muncul. So itu di daera yang manusia biasa kena sinar matahari, dong pe kulit so pasti jadi lebe glap. Kong di daera yang manusia nyanda biasa kena sinar matahari, dong pe kulit jadi lebe trang lantaran tu warna lebe bae kalu mau baserap sinar matahari yang cuma sadiki dan beking vitamin D.
Manusia rata-rata musti tidor 7 sampe 8 jam satu hari, mar kalu anak-anak rata-rata musti tidor 9 sampe 10 jam satu hari. Orang yang tidor kurang musti jadi nyanda sehat depe badang kong jadi saki-saki.