Wp/wls/Alikisio Fisi'ipeau

Ne’e tupu Alikisio Fisi'ipeau i Santo i Vanuatu i te ta’u 1957 pea ne’e tau mai ki Niu Kaletonia nei ite ta’u 1980. Ne’e mole ako Alikisio i he fale ‘ako fai pena pea ne’e mole he tahi ne’e ina muli’i ia lolotoga te ‘u ta’u ne’e fai pena ai i Niumea. Ne’e lahi te’u kaupa o te kolo o Niumea ne’e pena e Alikisio he ne’e ko he gaue ne’e faka'ui ki ai e te pilo e gaue tafito ki te ‘u faiva mo koloa fakafenua o te kolo.

Ne’e fia fakahā mo fakamatala e Alikisio i tana fai pena te atu koga o te ma’uli faka’oseania, tafito pe foki te ‘aga’ifenua o ‘Uvea, mai te to’oto’oga o te kava, te ‘u me’e fakafenua ki te maletile o Sagato Petelo Sanele mo te tui kakala.

Ko Alikisio ne’e ko he tagata ‘uvea ne’e tupu i Vila kae ne’e he’eki ma’u he faigamalie ke mamata tonu ki totatou motu ko ‘Uvea. I Niu Kaletonia, ne’e toe pena e Alikisio te ma’uli fakafenua o te kau Kanak, tanatou ‘u fale fakafenua pea mo tanatou ‘aga’ifenua.

Ne’e mole gata pe te faiva a Alikisio ki te fai pena, he ne’e toe poto foki ite gaue’i e ia te akau, te ‘ukame’a mo te palasitike o ina fa’u aki ihi koloa fakahāhā, ko tana manatu ke mahino te kaiga ki te ma’uhiga o te puipui o totatou ‘ulufenua mo te gaue a te takitokotahi ki te kaha’u o te ‘u taiake e muli mai. Ne’e kau Alikisio ki ‘ihi fakahāhā fai pena ne’e fakahoko i Niumea mai te ta’u 2006 ki te ta’u 2009 pea ne’e hū ki te kautahi o te haha’i faiva ote Pasifika ko te SIAPO ite ta’u 2009.

Ne'e ko Alikisio Fisi’ipeau ne’e ko he tagata faiva ne’e ma’uli faitaliha mo ‘aga fakamalalo. Ne’e mavae mo tatou ia Alikisio ite mahina o Tesepeli 2013 i Niumea.