Wp/vmf/SpVgg Greudher Färrd

From Wikimedia Incubator
< Wp‎ | vmfWp > vmf > SpVgg Greudher Färrd
Jump to navigation Jump to search


Der Adigl is in Nämbercherisch gschriim.


Däi Spillvereinichung Greudher Färrd (offiziell: Spielvereinigung Greuther Fürth) is a Schborddverein, der vur allem durch sei Fußballabdeilung begannd is. Däi grässdn Erfolge in der Vereinsgschichd sin däi drei Deidschn Massderdiddl 1914, 1926 un 1929, damols nu als Schbillvereinchung (korz: SpVgg) SpVgg Färrd. Durchn Beidridd vo der Fussballabdeilung vom DSV Vesdnberchsgreudh (offiziell: TSV Vestenbergsgreuth) 1996 is aus der SpVgg Färrd däi SpVgg Greudher Färrd endschdandn. In der Saison 2012/13 hodd däi SpVgg erschdmols in der 1. Fußball-Bundesliicha gschbilld. Däi Vereinsfarm vo der SpVgg sin weiß-gräin, weecha ihrn Symbol im Vereinswabbn wärrds im Volgsmund „Kleebladd“ gnannd. Schbilln douds in der Drolli-Arena (offiziell: Trolli-Arena), in däi wou derzeid zirrga 18.000 Zouschauer neigenga.

Däi SpVgg Färrd is 1903 gründed worrn un hodd si in der Folchezeid zu an deidschn Schbidznverein endwiggld. 1920 woar der Schborrdbarg Ronhuuf des grässde Schborrdglände im Deidschn Reich. Die 1926er-Mannschafd, der wou als erschder deidschn Mannschafd a Siech beim groußen FC Barcelona glunga is, gülded bis heid als besde Färrder Mannschafd aller Zeidn. Zu dera Zeid is die deidsche Nadionolmannschafd grässdndeils aus Schbieler vo der SpVgg Färrd un vom benachbardn 1. FC Nämberch („Glubb“) bschdandn. In der Saison 1956/57 hodd die SpVgg vurerschd es ledzde Mol däi Möglichgeid ghabd, um däi Deidsche Massderschafd zu schbilln, is obber in der Qualifigadion gscheiderd.

Nach der Grindung der Fußball-Bundesliicha 1963, für däi si däi SpVgg ned qualifiziern hodd könna, hodds mehr un mehr ´n Oschluss an däi Schbidznvereine verluurn un bis 1983 zweidglassich gschbilld, erschd in der Regionalliicha, nachherd in der 2. Bundesliicha. Der Verein is immer mehr in finanzielle Nod gradn, 1983 is der Abschdiech in die Oberliicha erfolchd, vier Joahr schbäder sugoar der Abschdorz in däi värrdglassiche Landesliicha. Miid der Qualifigadion zur nei grindedn Regionalliicha 1994 un der Fusion miidn DSV Vesdnberchsgreudh is schborrdlich widder schdeil bergauf ganga. Nachm Aufschdiech 1996/1997 hodd däi SpVgg 15 Joahr lang der 2. Bundesliicha oghörd un woar a Zeidlang däi diensdäldesde Mannschafd vo dera Liicha. 2012 is dann sugoar der erschde Aufschdiech in die 1. Bundesliicha glunga, der davuur a boarmol blouß gnabb verbassd worrn is. Allerdings is der sofordiche Widderabschdiech erfolchd. Des „Frangng“-Dörbi gecha´n 1. FC Nämberch is ans vo däi äldesdn un des am haifigsdn ausdragne Fussballdörbi in Daidschland.

Im Nedz[edit]