Wp/vmf/Glubb

Der Adigl is in Nämbercherisch gschriim.

Der Glubb oder 1. FC Nämberch (offiziell 1. Fußball-Club Nürnberg, Verein für Leibesübungen e. V.) is a dradidionsreicher Foußbollnverein.

Der Glubb is am 4. Mai 1900 in Nämberch gründed worrn un houd zirrga 14.000 Miidglieder. Däi Veraansfarrm sin roud un weiß, däi Farrm vo der Spillgleidung sin dradidionell roud (Hemadla) un schwazz (Huusn). Der Glubb is anner vo die erfolgreichsdn Foußbollnvereine in Deidschland und woar lange Zeid deidscher Regordmassder. Miid nain deidsche Massderdiddl hodd er am zwadmassden Massderschaffdn ieberhabds gwunna, die erschde 1920, die vuurerschd ledzde 1968. Der ledze grousse Diddl woar 2007 der insgsamd värrde Siech im DFB-Pogal.

Der Glubb is in seiner bewechdn Gschichdn a boar mol aus der erschdn Bundesliicha abgstieng, zum Beispill sogoar als amdiernder Daidscher Massder in der Saison 1968/69. In der ewichn Bundesliichadabelln lichd er afm värzehnden Bladz. Däi Spillschdäddn vom 1. FC Nämberch miid an Fassungsvermööng vo 50.000 Zuschauer hassd middlerweiln Max-Morlock-Stadion. Eigfleischde Glubbmiidglieder odder Ohänger nennd ma "Glubberer". Der Glubb hodd in die ledzn Joahrzehnde an Haffn schborrdliche un finanzielle Grisn durchmachn mäin un manchmol durch Sgandale af sich afmergsam gmachd. Der leidensfähiche Fan drüggd sei Zuneichung durch des gflieglde Worrd "Der Glubb is a Debb, obber ich mooch nern" aus.

Im Nedz