Wp/vmf/Schafkupf
Schafkupf is des Karddnschbill, des wou in Frangng dradidionell am massdn gschbilld wärd. A Schafkupfrundn bschdäid normolerweis aus vier Schbieler — es gäid obber a zu dridd. Gschbilld wärd miid an Deidschn Bladd (ohne Sechser). Wenn a Schbieler amol ausdredn mou, schbringd verdredungsweis a fimfder Mo ein, in Frangng wärd der Brunzkaddler gnennd.
Massdns wärd a „Langer“ gschbilld, des hassd, dass a jeder Schbieler acht Kaddn gräichd. In der Oberpfalz dageeng wärd a der „Korze“ bflechd, wou a jeder blouss sechs Kaddn gräichd. Beim Schafkubf schdichd däi häichere däi niedrichere Kaddn. Wenn anner an Schdiich gmachd hodd, mäin däi annern Farrm bekenna oder – wenn möchlich - däi Drumbffarrm bediena. Gwunna hodd däi Barrdei (wenn si zwa Schbieler zammdou ham) oder der Soloschbieler, wou mindesdns 61 Bunggde hodd. Däi Barrdei, wou ned gschbilld hodd, brauchd fiern Siech mindesdns 60 Bunggde.
Däi höggsdn Drümbf brim Schafkupf sin däi Ober in dera Reihenfolng: Achel, Gräi, Härrz, Schelln. Dann kumma däi Under. Wenn ka Solo gschbilld wärd, is immer Roud däi Drumbffarrm. Fier däi Ass ham däi Frangng ihre eichna Noma: Su hassd´s Achel-Ass „däi Alde“, ´s Härrz-Ass „däi Roude“, ´s Gräin-Ass „däi Blaue“ un´s Schelln-Ass „däi Runde“. Haifich werrn in fränggische Wärdshaiser a Durniere asgrichd, däi nennd ma „Schafkupfrenna“.