Wp/vmf/Mogâle

From Wikimedia Incubator
< Wp‎ | vmfWp > vmf > Mogâle
Jump to navigation Jump to search


Der ardigl is in Hâunlâuisch gschriiwn.


Mogâlâ uf dr waad
Noch â bôôr mogâlâ

 mogâle (['mogəle]), dii määrdsôôl is mogâlâ (['mogələ]), is â jungs fonârâ ghuâ. Majschdens dsiâd mâr diâ grends fom mogâle dsu dâ andrâ sôrdâ fon rindfiichâr ba ôôm jôôr. Driiwâr dausâ is dan â menlichs rindfiich ärschdâmôôl â jungschdiir, â wajblichs â ghalwâ. Wen â drächdiche ghuâ s'mogâle griâchd, dan sechd mr dâdsuâ, si ghalbd, si ghalbd ôô odâr si wirfd des mogâle.

hajdsâdôôch saufâ diâ glôônâ mogâlâ scho reechd bal nime ba dr muâdâr, fon därâ wil mâr ja d'milch fârghaafâ, sondârn wärâ mid so âm ins wasâr gschmisânâ un umgruâdldâ bulwâr ufdsâuchâ. sii schdään aa nime ba dr muâdâr miid im schdal, sondrn hen ân ajchânâ glôônâ undârschdand, däär siid dan aus wiâ â iiglu un is maaschdns aus bundâm blaschdich. Im sumâr schdeen dôôfâu als â gandse badârii for âm schdal fon dâ grôâsâ.

Wen dr bauâr awâr ghâ milchwirdschafd drajbd, sondârn diâ fiichâr wechâm flaasch held, dan lesdâr ofd d'mogâlâ ba dr miâdâr, sâu schbôôrd âr sich aa s'mälgâ, was ba denâ fiilâ schdig fiichâr, di â bauâr hajdsâdôôch majschdens had, un diâ im sumâr dan ofd aa noch wajd drausâ uf dâr waad schdäân, sâuwisâu â reechde ghuchlfuur wäär.

mogâlâ sin ôôsâ jung noch reechd dabsich, stagsich un hopfâdich, des mechd, das dii glôônâ fon uns mendschâ se reechd gäärâ hen un am liâbschdâ midânâ schbiilâ mechdâ, sowiâsâ se sään. Awâr schbäädâr meechâsâ se dan hald doch liâwâr in dr bfanâ.

Wäblinggs (dajdsch)[edit]