Wp/tzm/Tamaziɣt

From Wikimedia Incubator
< Wp‎ | tzmWp > tzm > Tamaziɣt
Jump to navigation Jump to search

Tutlayin timaziɣin neɣ d tamaziɣt, s tfinaɣ tamaynut ⵜⴰⵎⴰⵣⵉⵖⵜ, s tfinaɣ n imuhaɣ ⵜⵎⵣⵗⵜ, tga yan iẓli seg tutlayin tifrusyanin, tumeẓ yat tjumma taseknakalt tameqrant g Tefriqt n ugafa: Seg Tegzirin Tiknarayin g ugaraw n Waṭlas g utaram ar Taẓnagt n Isiwiyen, g utaram n Miẓra, g ugmuḍ, seg yill agrakal g ugafa ar tanezruft tameqrant (Tiniri) g unẓul.

Tsul tmaziɣt da tettusawal ar ass-a g kigan n tmura : Amerruk, Dzayer, Tunes, Libya, Miẓra, Mali (Aẓawad), Nnijer, Burkinafasu, Tcad, Ssudan d Muritanya tili tmaziɣt awed g tmura n uzwag zun d Fransa, Beljika, Hulanda... atg. Tekka-tt-nn tmaziɣt da tettusawal awed g Tegzirin tiknarayin maca dɣi tsul ɣas g tesmidegt.

Illa umzaray ger imesnilsen d ger imessiwlen n tmaziɣt ɣef wis tga tmaziɣt tutlayt igan yat neɣ d tga tagrumma n tutlayin: Glottolog s umedya, inna mas tella tmaziɣt ɣef 27 n tutlayin (g amunt itsent inna immuten).

Illa ɣur tmaziɣt unegraw-nnes n tirra ad t-igan d tifinaɣ nna mi kcaden itergiyen assemres-nnsent d nna mi tettusenṣeb yat temzarayt tamaynut g Umerruk g 2003. Maca kigan g imaziɣen da ttaran s usekkil alatini mi tturnan kra n isekkilen seg tegrikt, ilin winna tt-ittaran s usekkil aɛṛab lumaṛ ḍart ukeccum n usɣan ineslem; kigan n irafusen imaziɣen ayd aɣ-d-yuwḍen ttyaran s usekkil aɛṛab.

Ur llin kra n wuṭṭunen unṣiben aɣ-iskanen uṭṭun n imselmaziɣen g umaḍal, maca uṭṭun-nnsen da ittusitig s 20 ar 30 n imelyunen n imessiwlen.