Wp/tun/Nahika

Taminahika halani

Nahika (Latini: Cornus spp.; Ingrasa: dogwood, arrowwood; Pilanchi: bois de chien, bois de flèche)

• Taminahika (Latini: Cornus foemina; Ingrasa: swamp dogwood, stiff dogwood; Pilanchi: cornouiller des marais)

Taminahika rihkutohku. Uhktahkishi washa. Uhktɛrashki amayisahkulehe, kɔrasha; hotushi, washa. Tɛnakɔla rɔwasinima asahku kɔlahksiti hayihta. Uhkelu tolu, ɔshta kunasha. Taminahika tami kichu raku, kata wishi arahch. Kata hahchu kashkutohku urahch, rawishtuku.

• Nahikakɔla (Latini: Cornus florida; Ingrasa: flowering dogwood; Pilanchi: cornouiller à fleurs d'Amérique)

Nahikakɔla rihkutohku. Uhktahkishi ɔmahkanahku. Uhktɛrashkipa amayisahkulehe, kɔrasha; hotushi washa. Uhktɛnakɔla hɛntohku. Ahomu manku na’ara. Uhktɛnakɔla milisha ahak’ihch rɔwa. Uhkelu tolu, likahta, mili ahak’ihch kayi. Tarku hotushi, hali lihcha kichu, nahikakɔla raku. Kata hahchu urahch, lapuya rawishtuk’ɔhɔ.

Nahikakɔla halani

Kuhpani onimahoni kashku namu nahika chu marikata. Uhktahkishi talu shurukata. Wɛhatahani uhktahkishi talu akuhpani ra shurukata. Nahika rihku chu maritahch, alatini mashukata. Tahumaku, nahika ɔshka kɔsa ahak’ihch uhktahkishi kɔsa pɔhtahkuta, hinyatihch, tawanani, ehkuna yash’ɛma lamaniwan, uhkkɔraku. Talibamaku, nahika tahkishi talu pɔhtahkuta, hinyatihch, tashkirupamili lamaniwan uhkkɔraku. Tachalakiku, oni tahkishi yasha uhkyatihch, nahika ɔshka kɔsahta lamahkuta. Oruhchohu yasha uhkyatihch, nahika tahkishi taluhta lamahkuta.