Wp/sjd/Анимэ
 | Тэдта элля воа̄лмаш лысст. То̄нн вуаяк кӣллт са̄мь Википедьяе ве̄кьхэ со̄н тӣвтхэмэнҍ. |
Анимэ (яп. アニメ, рӯшас аниме) лӣ японскэ анимация. Япониясьт соа̄нӭнҍ «анимэ» коадчетҍ пугк анимацъя ноа̄летҍ, ноа кӯдтъя э̄ллмантэсьт ныдтҍ коадчетҍ лышэ Японьясьт лыһкма анимацъя.
Мудта лэнӭнҍ лыһкма мультфильмэнҍ роа̄ткнэгэсьт, ко̄йт пукэ авьтмуссе па̄рнае гуэйкэ лыгкэтҍ, е̄нас анимэдтӭ лыһкъювв шаннҍтъе я е̄нноллмэе гуэйкэ, те̄мэтҍ сыйй пугк э̄ллмантэсьт популярнэ лӣ. Анимэ надта персонашшэ я фо̄нэ кырьйхэм ноа̄ленҍ роа̄тткъюввэв. Сыйй лӯшштъев гу телевизьённэ серьял я фӣльм. Тоа̄ййв анимэ моа̄ййнас тӯййшуввма ле̄в японскэ комиксэ альн, ко̄йт коадчетҍ ма̄нганҍ, вай графическэ новэлэ альн, ходтҍ е̄ннэ лӣ я анимэдтӭ ӣжедэсь надта сюжэтэгуэйм.
Анимэсьт моа̄ййнас вуэйев мэ̄нн-ля̄ннч ве̄рьт персонашшэ баяс моа̄йнсэ я югкеналшэм поа̄ҋкэнҍ я поа̄ленҍ мэ̄ннэ – ко̄ххт тэ̄йн, кӯгк ле̄в вай лӣйенҍ мӣн э̄ллмантэсьт, ныдтҍ э тэ̄йн, кӯгк лӣйенҍ о̄ммпан а̄втэр (вай а̄втрэ) фантазьясьт шэ̄ннтма.
Анимэ на̄ль
[edit | edit source]Ныдтҍшэ анимэсьт лӣ е̄ннэ югкеналшэм жа̄нрэдтӭ я стӣлле.
Кӣһчье агь мӣлльтэ
[edit | edit source]Е̄ннэ жа̄нрэдтӭ лыгкэтҍ надта ӣжесь аудиторья гуэйкэ:
- Кодомо (па̄рнае гуэйкэ)
- Сёнэн (12–18-ыгкса поа̄рьнэ гуэйкэ)
- Сёдзё (нӣйтэ гуэйкэ)
- Сэйнэн (нӯрр оалмэ (18 ыгке я пуаррса) гуэйкэ)
- Дзёсэй (нӯрр нызнэ (18 ыгке я пуаррса) гуэйкэ)
Моа̄ййнас на̄ль я мэ̄ннэм па̄ҋк мӣлльтэ
[edit | edit source]- Романтика (мӣллтэм баяс)
- Хоррор (эӈгельск са̄нӭсьт horror («пэӆтэсс») шэ̄ннтма) – кӣһчьетҍ пэ̄ллълаһтӭм я сӯрькхэм гуэйкэ лыһкма; тоа̄ййв мугка анимэсьт вуайй уйнсэ роа̄вкэтҍ, ча̄нэтҍ, кэ̄рас сценэтҍ мӯцнэмужэгуэйм я ныдтҍ эвтэс.
- Комедья
- Фэнтэзи – сӣнэнҍ лыһкъюввмуж вуэйев тӯййша э̄ллмантэнҍ мэ̄ннэ, а персонашшэнҍ тоа̄ййв ле̄в тыгквэннҍ ма̄һтҍмуж (ва̄лльтэ, нуэййтэм че̄песьвудт).
- Дра̄ма
- Трӣллер
- Slice of life (эӈгельск кӣлэсьт «я̄ллмуж выббл» вӯййкэсьт соа̄нӭ мӣлльтэ) – анимэ а̄рркъесь я̄ллмуж баяс.
- Приключенья – сӣнэнҍ я̄рролма воа̄ррдалл югкеналшэм поа̄ҋкэтҍ, вуэсстланнт мудта персонашшэтҍ я поабпхалл югкеналшэм лыһкъюввмужэтҍ.
- Историческэ анимэ
- Исекай – анимэ тэнн баяс, ко̄ххт я̄рролма е̄ресь э̄ллмантэсьт оччтадт.
- Меха – анимэ шӯрр ро̄ботэ баяс, ко̄йт а̄рркъенне пилот вӯййкъев, гу мӣн э̄ллмантэсьт та̄нкэтҍ вай туаррэм самлётэтҍ.
Анимэ на̄ль е̄ннолмэе гуэйкэ
[edit | edit source]- Хентай – анимэ эротическэ я порнографическэ поа̄ҋкэгуэйм, ко̄йн мугка сце̄нэ на̄ль вуэзхэллма ле̄в.
- Эччи – анимэ ке̄һпесь эротическэ подтекстэнҍ, ама ныдтҍ огкнаһтӭм сце̄наһта я а̄в порнографьяха, кӯгк хентаесьт уййнэ вуайй.
- Яой (кэскэсьт поа̄рьнэ шоабшэмуж баяс)
- Юри (кэскэсьт нӣйтэ шоабшэмуж баяс)
Уж
[edit | edit source]- Anime and Manga Studies (эӈгельскэ кӣлэсьт) – анимэ я ма̄нга баяс те̄дтӣдтӭй гоарренҍ