Wp/rsk/Еуґен Кочиш
| Еуґен КОЧИШ | |
|---|---|
| Народзени | 25. фебруара 1922. |
| Умар | 12. децембра 1972. (50) |
| Державянство | югославянске |
| Универзитет | Академия подобових
уметносцох, Заґреб |
| Период твореня | 1949—1972. |
| Жанри | скулптури камень, бронза, ґипс |
| Поховани | у Зомборе |
| Припознаня | Октоберска награда Скупштини городу Зомбор 1968. року |
Еуґен Кочиш (*25. фебруар 1922—†12. децембер 1972) визначни югославянски и руски скулптор.
Биоґрафия
Еуґен (Йовґен) Кочиш ІІ народзени 25. фебруара 1922. року у Кули. Кочишово родичи ше 1924. року преселєли до Коцура. Оцец Йовґен І по занїманю бул каменьорезач. Основну школу Йовґен закончел у Коцуре, а по законченей школи оцец го пратал до каменьорезацкей роботи, так же Йовґен II, попри оцови виучел тото ремесло и почал робиц, вєдно з оцом, и дома и по теметовох. Бул свидоми свойого таланту, алє и того же без образованя на уметнїцкей академиї нє мож здобуц даяку афирмацию.
Велька часц його познєйшей уметносци була под уплївом його дожицох под час Другей шветовей войни, кед Войводина знова анектована ґу Мадярскей. Кочиш бул загарештовани 13. фебруара 1942. пре подозриву антивладову дїялносц. После длугей тортури вишлїдзованя, перше у Коцуре, потим у Вербаше и Новим Садзе (у Армиї), Йовґен II вєдно зоз пайташами, у ланцох послани до злогласного лаґру Чилаґ. Йовґена II виратовала коцурска апатикарка мадярскей националносци, барз блїзка фамелиї Кочиш. Медзитим, нєодлуг ушлїдзела примушуюца мобилизация и драга на гранїцу Словацкей. Док служел у войску на фронту у Словацкей, дезертовал, придружел ше ґу чехословацким партизаном (1944) и участвовал у борбох коло Кошицох и дзепоєдних других варошох, же би концом 1944. року зоз чехословацкима партизанами дочекал шлєбоду. На початку 1945. року сцигол до ошлєбодзеного Коцура.
1946. року бул поволани на одслуженє порядней воєней обовязки. Праве ту його талант бул замерковани. Єден з висших официрох, хтори и сам любел уметносц, видїйствовал у команди же би його талантовани вояк бул послати до Дому армиї до Загребу и же би на Академиї покладал примаци испит. Професоре Ваня Радауш и Антун Авґустинчич замерковали його талант и роботи оценєли зоз найвисшу оцену, та ше млади вояк нашол у ґрупи студентох. Повойнова худоба залапела и будущого академского скулптора та го його оцец, каменьорезач, далєй нє могол финансовац. Розчаровани Йовґен II врацел ше до Коцура. У медзичаше його супруга достала роботу у школи у Коцуре як учителька, та Йовґен II предлужел студиї. З успихом их закончел 1954. року.
Уметнїцка робота
Кочиш робел скулптури у каменю, бронзи, ґипсу а у стилу хтори мож наволац експресионизм представяня. Його малюнки з векшей часци реалистични портрети. Бул член Здруженя подобових уметнїкох Сербиї (УЛУС).
Єден час по законченю студийох бул шлєбодни уметнїк а од 1961. по 1972. рок бул управнїк Ґалериї Културного центра у Зомборе. Орґанизатор є прейґ 340 виставох наших еминентних малярох, скулпторох, ґрафичарох и нє лєм у Зомборе, алє и по околних местох.
Коло главней роботи, Кочиш творел и у своїм ателєу. Виробел бисти Милана Коньовича, маляра, Лази Костича, Й. Й. Змая, Петефи Шандора, Милета Виторовича, маляра, Яноша Герцеґа, писателя, Исидора Баїча, композитора, Душана Исакова, новинара, Данила Бошковича, Ґабра Коларича, Миколи М. Кочиша, Владимира Назора и други; релєфи Стевана Мокраньца, Петра Ризнича и други.
Самостойни вистави: Руски Керестур (1964), Кула, Зомбор, Баймок, Руски Керестур (1966), Беоґрад, Нови Сад, Вербас (1967), Панчево, Петроварадин (1968), Сизара (Италия, 1970 ), Парма (Италия, 1971 ). Постгумно Зомбор (1973), Руски Керестур (1974), Вербас (1975).
Колективни вистави: Заґреб (1949), Зомбор (1962), Суботица, Зомбор (1963), Нови Сад (1964), Зомбор, Плєвля, Никшич, Титоґрад, Приштина, Ниш, Заєчар, Зеница, Мостар (1965), Осиєк, Бечей, Зомбор, Нови Сад (1966), Бая (Мадярска), Нови Сад, Беоґрад, Бечей, Тузла (1967), Нови Сад, Шид, Зомбор (1968), Рума (1969), Беоґрад (1970), Сизара (Италия, 1971), Зомбор, Зренянин, Суботица, Вербас (1972), Зомбор, Суботица (1973).
Його скулптури ше находза у Краґуєвцу, Вербаше, Новим Садзе, Апатину, Суботици, Зомборе, Бечею, Бачким Добрим Полю, Коцуре, Руским Керестуре.
На повали шветочней сали жупаниї намальовал герб Скупштини општини Зомбор по ориґиналним документу Повелї царици Мариї Терезиї зоз 1749. року кед Зомбор достал статус шлєбодного кральовского городу.
Добитнїк є Октоберскей награди Скупштини городу Зомбор 1968. року.
Умар 12. децембра 1972. року у Зомборе.
Литература
- Библиоґрафия: Лепосава Кляїч, Евґен Кочиш: академски скулптор (Нови Сад, 1999).
- Ґрупа ауторох Подобова творчосц Руснацох, Дружтво за руски язик, литературу и културу, Клуб подобових уметнїкох, Нови Сад 2003. боки 65-66.