Jump to content

Wp/rmc/Demi Lovato

From Wikimedia Incubator
< Wp | rmc
Wp > rmc > Demi Lovato
Demi Lovato
{{{alt}}}
{{{title}}}
NavDemi Lovato
Aver navDemetria Devonne Lovato
Savoredženengere informaciji
UľipenAlbuquerque, Nevo Meksiko, USA
20. augustos 1992

E Demi Lovato, calo nav Demetria Devonne Lovato uľiľa ando 20. augustos 1992 ande Albuquerque, Nevo Meksiko[1]. La Demi hin duj pheňa jekh phureder e Dallas the jekh terneder e Madison[2]. E Demi ciknovartur rado giľavkerelas.

Karijera

[edit | edit source]

2007–2008: Camp Rock the Don't Forget

[edit | edit source]

Sar lake sas 8 berš chunďa te kerel buťi ande televizija pro programos O Barnis the o barati,odoj aver čhavorenca giľavkerelas. Sar lake sas 14 berš chunďa te kerel prekalo Disney Channel[3]. Ando berš 2008 kerďa mozi so pes vičinel Camp Rock[4]. La mozi sas bari bacht. Kala mozitar ačhija e Demi igen popolarňi,chunďa pes ando jilo butere manušenge pre caľi luma u avke dija avri peskero ejšejno albumos Don´t Forget[5]. Ode la sas hiti sar La La Land, Get back, Don´t forget.

2009–2010: Sonny with a Chance the Here We Go Again

[edit | edit source]

O albumos sas igen bachtalo u avke minďar ando berš 2009 dija avri peskero dujto albumos so pes vičinelas Here we go again. The kada albumos sas bachtalo. Arde la sas hiti sar Here we go again, Remember December, Got dynamite. Pal oda sar o Disney Channel dikhja savi bacht hin la Demi pal caľi luma dija peskero lav kaj mi keren dujto ďilos Camp Rock 2 u avke ando berš 2010 kerďa e Demi dujto ďilos so pes vičinelas Camp rock 2: The final jam. Kale ďilos sas mejk sa bareder bacht. La Demi pindžarenas ma buter manuša u avke hin o mozija Camp Rock 1 the Camp Rock 2 jekhfeder pro Disney Channel the jekbuter dikhne.

2011–2012: Unbroken

[edit | edit source]

Ma sar la Demike džalas sa mišto majinďa pes te džal te sasťarel ando centros prekalo pijaka the drogoša. E Demi pijinkerelas the kerkerelas drogi. Ejšejnovar olestar ňiko nadžanelas. La Demi sas anoreksija the bulimija nasvajiben. La Demi pre bazutňi sikhaďi mordinenas o čhaja so laha phirenes ande klasa. Hajinkerenas lake ando thule u avke jekhvar vičinďa la dake kaj mi aven vaš lake ande sikhaďi u avke avja vaš lake e daj u avke ole ďivesestar sikhľolas e Demi čak khejre. Sar geja andro centros prejkalo pijaki the drogoša o sasťarde phendle kaj la Demi hin travma so pregeľa cikňovrake u bijoda pes chunďa ando pijinšagos the andro drogi. Vaš oda kaj pes e Demi dochunďa ke ala veci šaj the oda kaj ma cikňovrake pes dochunďa andre televizija u but manušenge sas pro jakha ciknovartur. E Demi but cerpinelas the bijalo dad bo sas pijakos u avke pes paj rozgeja la Demike la daha. E Demi avja avri andalo centros ando berš 2011. Vakerelas sar la premukle kaj lake odoj ažutinde. Paloda septemberiste dija avri peskero trinto albumos so pes vičinelas Unbroken. E Demi kerelas buťi pre kada albumos mejk sar sas ando centros. Arde la sas hiti sar Give your heart a break vaj Skyscraper. Ala giľa pes dochunde pro anglune heji ando rebrički. Ando berš 2012 geja te bašavel turne pal caľi Amerika. E Demi pes dochunďa pale pro lačho hejos. Peskere vakeribnaha the giľenca ažutinďa butere manušege so majinen te predžal oda so pregeja ov.

2013–2014: Demi

[edit | edit source]

Ando berš 2013 dija avri peskero štarto albumos so pes vičinel DEMI. Pe ada albumos la sas hiti sar Neon lights, Really don´t care, Made in the usa, Heart attack u buter aver. Kale albumoha la sas igen bari bacht. O giľa pes dochundle pro anglune heji ando rebrički u kada albumos sas certifikimen sar somnakuno albumos. E Demi pal oda ando berš 2014 geja pre aver turne so pes vičinelas Neon lights Tour. La Demi sas igen lačho dživipen ande kala berša. Sa lake džalas avke sar kamelas. E Demi pes taj zathoďa ajse manušnca so ažutinenas manušenge oleha so ov pregeja,či oda sas bulmija,anoreksija the avke dureder.

2015–2016: Confident

[edit | edit source]

Pre aver berš ando 2015 e Demi the lakere manuša kamenas te kerel peskero nejvo albumos,aľe e Demi kamja kaj kada albumos mijel aver u bijoda lake ikerelas kada albumos buter te del avri. U avke e Demi dija kada albumos avri ča ando oktoberis 16 u vičinelas pes Confident. E Demi kala buťaha ande kada albumos kamja te phenel le manušnge kaj hiňi zoraji, kaj ma nane ajsi savi sas, kaj pes buter pačal. Pre kada albumos la sas hiti sar Confident, Cool for the summer, Stone cold. Le albumos sas bari bach. O albumos sas certifikimen duvar sar somnakuno albumos. Sas taj avri lilo po Grammy sar jekhfeder albumos ando berš 2015. La Demike džalas sa mištes so džal le giľavipnaha,aľe ando privatno dživipen lake oda nadžalas mištes. Rozgeľa pes le piraneha so les igen kamelas u ada la igen dukhanďa. Sas leha šov berš. La Demikero manažmentos pre late ispidelas kaj te džal pro turne, hijaba e Demi cerpinelas. Avke e Demi šunďa pre lende u aver berš ando 2016 geja pro turne so pes vičinelas Future Now. Pro turne geja le baratoha peske so leha bajinelas ando Camp Rock o Nick Jonas. Dudžane pregele but thema ando USA.

2017–2018: Tell Me You Love Me

[edit | edit source]

E Demi mejk maškar kada turne chunďa te ker nevo albumos. Minďa džanďa so kamel te phenel kale albumoha, u avke pal o turne ando berš 2017 dija avri peskero šovto albumos Tell me you love me. Kale albumoha kamja te phenel so ejzrinel ko pirano so pes leha rozgeja. Pre ada albumos la sas hiti sar Tell me you love, Sorry not sorry. O albumos pes ľikerelas mištes pal caľi luma.

Pregeľa frima čhona u pal oda ando berš 2018 e Demi dija avri nevi giľi so pes vičinel Sober arde giľavel pal oda kaj ma nane trešbi, kaj pale pijinkerel. Caľi luma delas duma pal e Demi so pes laha kerďol. Ando 24. julos 2018 jekhvara avľa avri ando magazini kaj e Demi pes predavkinďa le drogenca. Predavkinďa pes khejre kovkovri. Arakhľa la tosara lakeri solgaňi ando than. E Demi pes sar prelija arakhľa pes ande špitaľa. Lakeri fameľija sas paž late. E Demi pes sar preľija sas kori nadikhelas ča pal varesave ďivesa lake pale avja o dikhiben. E Demi pes andal kada sasťarelas but,aľe the avke pe late ada savoro mukľa džungaľipena. Sar lake sas feder chunďa pes pale ando bašaviben. Chunďa te kerel buťi pre peskero nevo albumos. Caji buťi pre kada albumos lake ikerelas trin berš. O manuša so la rado šunenas majindle te užarel but, aľe pal o trin berš pes doužardle.

2019–2021: Dancing with the Devil... the Art of Starting Over

[edit | edit source]

E Demi diňa avri džanaviben kaj ando 2. apriľis 2021 del avri peskero eftato albumos so pes vičinela: Dancing with the devil...The art of starting over. O albumos zachudel savoro so majinďa te predžal ciknovartur. Pre kada albumos la hin giľa sar: Anyone, Dancing with the devil, My girlfriends are my boyfriend,u the giľi so giľavel la Ariana Grandeha - Met him last night. E Demi ande kada albumos giľavel taj pal o nalačhe manuša so laha kerenas buťi. Giľavel taj pal oda sar pes predavkinďa andro berš 2018. E Demi paľis peskero Comeback kerďa po Grammy 2020 la giľaha Anyone. E Demi kisitinel nevo albumos akana. Buter informaciji mejk pal kada nevo albumos nane. Džanel pes ča oda kaj e Demi džal pale ko rokovo štilos.

Diskografija

[edit | edit source]
  • Don't Forget (2008)
  • Here We Go Again (2009)
  • Unbroken (2011)
  • Demi (2013)
  • Confident (2015)
  • Tell Me You Love Me (2017)
  • Dancing with the Devil... the Art of Starting Over (2021)

Filmografija

[edit | edit source]
  • Camp Rock (2008)
  • Jonas Brothers: The 3D Concert Experience (2009)
  • Princess Protection Program (2009)
  • Camp Rock 2: The Final Jam (2010)
  • Demi Lovato: Stay Strong (2012)
  • Smurfs: The Lost Village (2017)
  • Louder Together (2017)
  • Demi Lovato: Simply Complicated (2017)
  • Charming (2018)
  • Eurovision Song Contest: The Story of Fire Saga (2020)
  • Demi Lovato: Dancing with the Devil (2021)

Referenciji

[edit | edit source]
  1. ↑ Demi Lovato Biography – Facts, Birthday, Life Story
  2. ↑ Disney Demi-Goddess
  3. ↑ "About Demi Lovato". demilovatotour.com. Archived from the original on November 4, 2013. Retrieved September 13, 2013.
  4. ↑ Bryson, Carey. "Camp Rock (2008) – Movie Review for Parents". About.com. New York City: IAC. Archived from the original on April 21, 2013. Retrieved March 11, 2013.
  5. ↑ "Demi Lovato – Don't Forget". AbsolutePunk.net. Archived from the original on July 16, 2012. Retrieved August 26, 2015.

Retrieved from "https://incubator.wikimedia.org/w/index.php?title=Wp/rmc/Demi_Lovato&oldid=5618784"