Wp/lzz/ge/ჲილმაზ ავჯი

_{This article needs to be wikified.}

ჲილმაზ ავჯი (Yilmaz Avci) არ დიდო გოშოგორელი ფიგურა რენ ემ ლაზი ხაჩქაშ კოჩეფეში შქას, მიეფექ ნა 90-ონი წანაფეს ოთურქეს ლაზური ნენა დო ხაჩქა, ლაზობა ოშლეთინუ დო ოსქედინუშენი კულტურული ჯენგის გჲოჭკეს, ნამუ-თი-ნა ანდღათი იხვენენ დო ნამუში დოლოხეთი ჲილმაზ ავჯის დიდო აქტივური სვა ოქაჩუნ. ჲილმაზ ავჯი 1939 წანაში 6 მაროშინას დიბადუ ხოფაში ილჩეს ოფუტე აზლაღას, ოქორთუეშ სინორიშენ 10 კილომეტრო მენდრა. ხოფაში რეიონის გონფინერი ლაზური დიალექტი ჩქვა დიალექტეფეს მეწკომილერი ირიშენ კაი შინახერი რენ, ამუშენ ჲილმაზ ავჯიში ომჭარალონი ნენა დიდო გამიმწკვენ ჩქვაფეშენ, მარა ანთეფე თუდე ფთქვათმინონან. მჭარალექ გეჭკაფურონი ნწოფულაში მაართანი ჟურ კლასი მუში ოფუტეს, აზლაღას დონკილუ. ოკულე ოგურაფუ ნოღა რიზინის ნოგინძანუ დო ნწოფულათი ექ ქონოჩოდინუ. რიზინის ოკიდალე ხელუანობაში ინსტიტუტის ამახთუ. 1960 წანას ერზულუმიში ოკიდალე ტექნიკური ნწოფულა დოჩოდინუშკულე, თედარიგიში ოფიცერ-მამგურაფალეში რანგის ასკერიშა უჭანდეს. გელიბოლუს ჟურ წანას მამგურაფალური დულჲა ყუშკულე, იზმითის, “სეკა”ში ქარტალიში ფაბრიკაფეს ტექნიკოსოთ იჩალიშეფტუ. 1963 წანას მპოლის მაღალი ტექნიკური ნწოფულას ოკიდალე ინჟინერიაში ფაკულტეტის ამახთუ. 1968 წანას ჩქუმალა დოჩოდინუში XV ორკინაგზალე რეიონიში თიგემჩანალაში გეჩინადუს მეწკომილერი საფრანბოლუ-ბართინიში გზაში ოკიდალე დირექტორი დიყუ. 1969 წანას დიჩილუ. 1975 წანაშენ ქარაბუკიში რკინა-ფულანდიში ოხვენონი სისტემას ოკიდუში დო გოშაგორუ-ოპლანუში დეპარტამენტიში დირექტოროთ 20 წანა უმეჭკვიდუ იჩალიშუ. 1995 წანას ფაბრიკაში პრივატიზაცია იხვენუში, ავჯიქ პენსიაშა მენდახთუ დო ჩილი დო ჟურ ბერეკალა იზმითის ქოდიხორუ.

მთინიში ამ ორაშენ გეიჭკენ ჲილმაზ ავჯიში ომჭარალონი არენაშა გამახთიმუ. მუში ლექსეფეშენ დიდოთი ამ წანაშკულე ინჭარელენ.

მაართანი ქარტალეფე ავჯიქ 1993 წანას გამახთიმერი სვარულის “ოგნი ნენა სკანი” გამოჩქუ. ოკულე, იზმითის ნა სქიდუნ მუკოთხანი ლაზიკალა ჲილმაზ ავჯიქ ჲულვარი ზოღაუჩარეფეში ფონდი “სიმა” დოთეშქილუ. ითქვასუნონ-ქი, ჩქვადოჩქვა სებებეფეს მეწკომილერი “ჲულვარი ზოღაუჩარეფეთე” აქ ეთნონიმი “ლაზი” იშინეტუ. ოთქვალუში რენ-ქი, ამ ფონდი იზმითის დო მუში მურგვალის ნა სქიდუტუ ლაზეფეში ოკობღალუში, კულტურული აქციაფე ოხვენუში მამჯღუნალე დიყუ. 2001 წ. “სიმა”-ქ არკაელი ჯოხოთენ სუმთუთალური ხაჩქაში, ხელუანობაში დო მჭარალობაში ობეშტონი ორგანიში გამოჩქუმალუს ქოგჲოჭკუ. სვარულიქ “სიმა” მჩირე სვა ქონუჩქინუ ლაზეფეში სქიდალაში, ლაზონაში ისტორია დო ხაჩქაში გამონთანუს, ლაზური ლექსეფეში, პაშურაფეში დო პარამითეფეში ობეშტუს. ამ სვარულის ჲილმაზ ავჯიქ მუკოთხანი ლექსი, პაშურა დო მუში ჩინაფერი პიესა, “გოლაქთეი მეჩეთი” ქოგამოფინუ, ნამუ-თი მანიშა ჩქვა სვარა დიყვენ დო ნდღაში თეშა ქოგამულუნ. ჲილმაზ ავჯიქ სვარულიშ გედგინუში ნდღაშენ “სიმა”-შ ომჭარალონი დულჲაფეში ნენაგემქთირუ ედიტოროთ ქონიჩქინუ.

1999 წანაშ სტაროშინას ჲილმაზ ავჯიქ პოლის, “ქურჲე”-შ გამომჩქუმალუში ოხორის ლექსეფე მუშიში კორობული “შურიმშინე” ქოგამოჩქუ. სვარას მეშაჭარელი რენ ავჯიში ლაზური ლექსეფე თურქული ქთირათენ დო მუკოთხანი თურქული ლექსი ლაზური ქთირათენ. კორობულის ლექსეფეკალა მუკოთხანი ლაზური იუმორისტული პაშურათი იძირენ. “შურიმშინე”-შკულე ჲილმაზ ავჯიქ ნენამჩქინაჯალასთი დოცადუ თი მუში დო ჩქარ უმაანეთი ვარ. 2002 წანას ემუქ 4 წანაში ხანდაში ნეტიჯე “ლაზური ნენაჩქინა” ქოგამოჩქუ. ხანდაში მჩქინაჯებური ღირალა ჩქინ ვარ მაცხუნენან, მუშენი-ქი, ეჲა კომპეტენტური ხალკიში ოხვენონი რენ, მარა იჲა დომათქვენან-ქი, ავჯიქ ამ სვარაში გამოჩქუმალუთენ ოთურქეს(დო ხვალა ოთურქეს ვარ) ლაზურიში მჩქინაჯებური ოგურუში დულჲას მუში წილი ქომეშადუ.

ემუშენ მციქა ბეჯითალა ვარ უღუნ 2005 წანას ხოლო პოლის გამოჩქუმალერი სვარას “ლაზური პარამეთეფე”. სვარას დოლოდვერი რენ 62 ლაზური პარამითი, ნამუ-თი ავჯიქ ჩქვადოჩქვა წკართოლიშენ კორობელენ დო ონწურანელენ. პარამითეფეს თურქული ქთირათი ნოყუფს. ოთქვალუში რენ-ქი, ჲილმაზ ავჯი ოთურქეს ამკათა კორობული ნა გამოჩქუ მაართანი კოჩი რენ.

მუჭო-თი-ნა გეჭკაფურეს ითქუ, ჲილმაზ ავჯიქ ხოფური რენ დო აშო-ქი, ხოფური დიალექტითენ ჭარუფს. ირიკელე იჩქინენ-ქი, ხოფური ირიშენ კაი შინახერენ დო ვა უკუინტალერენ, ედო ჩქვა დიალექტეფეს მეწკომილერი ხოფურის ლაზურიში წოხლენი სტრუქტურა კაიხეშა ჩუმალერი რენ, ამუშენი ეჲა ირიშენ ხოლოს დგინ მარგალურიკალა. ხოფურის ირიშენ კაი ნოსქიდერენ მსქვაელა გამოთქუფე, ნენა დაა მოქიმინერი დო ელასტიური რენ, დიდო უღუნ გამოხატუში გზაფე, გრამატიკული ნორმაფეთი ეშო-აშო ვა რენ პატი ხალის. მთელი ანთეფეს მეწკომილერი ავჯიში პოეზია უმეზიმუ რენ, მემსქვანერი რითიმეფე, გოდადალერი ლექსიკა დო ავჯიში გოშაცხუნერი პოეტური ხეშჭარა ართოთ ოკოდგინუფს ემ ღირაუგედვალუ არმონის, მუთენ ნამუგინონ დიდი ნაციათი დიქისკანეტუ.

ავჯიქ მუში სქიდალაში მციქა ნოწილე დოყუ ოფუტე მუშის, ამუშენი აზლაღაში, ხოფაში გონჭელუს მუში პოეზიას დიდი დო გოშაგორელი სვა ოქაჩუნ. მუში კორობულითი აზლაღაშენ ლექსითენ გეიჭკენ, ნამუთი მაქითხალექ იკითხაში, აჩქინენ-ქი, აჲა ოფუტე მუშენი ჩინაფერი რენ, იჲა ღალეფე დო რაკანეფე, ნამუ-თი ავტორიქ ჲეჭარუფს ემუქ ართუქ იჩინოფს. ავჯი ლექსითენ გოწამიდგიფან ტიპიური ლაზური ოფუტეში სურეთი, მურგვალის ზოღა დო რაკანეფე მოდგინერი, სო-ნა პანტა თოფურიში შურა გულუნ დო წკარითი ეკო ყინი რენ, შვაში კიბირეფე ქოდოგობღაფაფს. ემუქ გოწამიდგიფან ოფუტე, სო-ნა ლაზი ოხორჯალეფე კაპულას დიშქამოკიდერი დულჲას ვარ ნაწკენან, პანტა ონტულეს იქთენან, კოჩეფეს ხოლო დოხუნუთენ ჯღუბეფე ჲუხთეფან. ინტერესონი რენ ლაზი ბიჭეფე დო კულანეფეში ჲეჭარუ, მუნდეს-თი ავჯიქ ენთეფე ჲეტკვაცინერი ფაშატეფეს ნუნგაფინაფს, დო ბადეფესთი ნენა ოღოდაფს, ირო ოხორჯალეფეკელე თოლი ნა ამტენანშენი. ედო ჲილმაზ ავჯიქ დიდო დერდი ზდიფს-ქი აჲა ჯერნეთი, ზოღაპიჯის აღნენისასთერი ელადგინერი აზლაღა მენდრა ნა დოსქიდუ. ემუსთი ვარ ალენ ექ, მარა პანტა გოიშინაფს დო გურითენ გოიმერს. დიდი დო ბეჯითი სვა ოქაჩუნ ავჯიში პოეზიას დობადონაში თემას. ემუში ლექსის “ლაზონა” ფერფუ იჩქინენ ლაზი კოჩიში თაბიატი, მუში ყოროფა ლაზონაშა ედო კაიხეშა მჩქუნ იჲა უძირამუ ნოკეფე, ნამუთენ-ნა ლაზი კოჩი იროთეშა მეკიდერი რენ ლაზონას, ამ დიხალური ჯერნეთის. ლექსის ჲილმაზ ავჯიქ ლაზონაში ირი კუნწულის ნუალერსაფს დო დიდიშენ დიდი გნაფათენ მეკოჩაფს ემუში ფერეფეში ბრეულობა დო გრანდიოზულობა, ეჲა ღორმოთიშენ მეჩამერი ხამფობა, ნამუქ-ნა ლაზონა მთელი ქიანაში კაპულას ართეღი წიფხუფს. მჭარალექ დაა მენდრა ულუნ დო კოლხური მითოლოგიას შინახერი არ ეჶსანეთენ ღაფუფს ლექსი, ნამუს-ნა “კოლხეთიში დესტანი” ჯოხონს. აჲა რენ ჩინაფერი ეჶსანე ღორმოთიქ კოჩეფეს დიხაფე ნა ოკურთუშენი, მუნდეს-თი ჯენგის(ჩქვა ვერსიათენ ქეიფის) მოშაქაჩერი ლაზეფეს აჲანენან. ღორმოთიქ-თი ენთეფეს მუშიშენი შინახერი ჯერნეთი, კოლხეთი მეჩაფს. ამ ეჶსანეთენ გეიჭკენ ლექსი დო ოკულე ავჯიშებური სტილი გოიმფინენ: ზოღაფეში დო რაკანეფეში, ღალეფეში დო მტკაფეში, კულანი-ბიჭეფეში დო ბადი-ხჩინეფეში უემსალონი ჲეჭარუთენ დო ომცქუთენ. ოთქვალონი რენ-ქი, ლექსი ჭარელი რენ 2005 წანაში 20 სტაროშინას, ნანჭინეროთ ჲილმაზ ავჯიქ კოლხობაში ჩინაფერი ფესტივალიშა, სარფიშა ნა მოხთუ დო ოკულე სამარგალო დო ჩქვა რეგიონეფე ნა გოილუშენ არ თუთაშკულე.