Wp/lus/Rusiaram

Rusiaram puanzar

Rusiaram (Rusia ṭawngin: Россия, rossiya) dànchàwi hminga Rusia tih emaw Rusia Inlungrualna (Российская Федерация, rossiyskaya federatsiya) tia koh hi Iurasia hmar lama ram pakhat a ni. Km 17,075,400 biala zau niin khawvêla ram zau ber a ni a, khawvêla mihring chèn theihna hmun hmun riata ṭhena hmun khat aia zau a awh a ni. Mipui vbct. 1.43 zet chengin khawvêla mipui chen tamna ber pariatna a ni bawk a ni. Asia khawmualpui hmar lam zawng zawng deuhthaw khuhin Iurâwp khawmualpui hmun zaa 40 zet a luah bawk a, hunbial 8 zetah ṭhen niin ram pianphung leh sik leh saah pawh ziarang a fàn kim hlë.

Rusiaram hian khawvêlah ngawbawn a ngah ber a, a dïlte'n khawvêla tui thianghlim hmun 4-a ṭhena hmun khat zet an päi bawk.

Rambungte

Rusiaram hi rambung, Khua leh tui inlungrual (субъект федерации, subyekt federatsii) tia an koh, 83-ah ṭhen a ni a, chû'ng rambungte chuan Rusiaram rorèlna, Inràwnkhâwmna ṭhutkhâwm tia an kohvah aiawh pahnih ṭheuh an nei a ni. Aiawh inzât neiin ram pum rorèlnaah thuneihna intluk nei mah sé hê'ng Khua leh tui inlungrualte hian zalenna an neih phung leh sànzawng a inang lo va ni. Khua leh tui inlungrual chi hrang hrangte chu hê'ngte hi an ni:

• Rambial (Область, oblast) 46: hei hi khua leh tui inlungrual chi zakhua rawi ber a ni a, rampum thutlûknaa thlan roreltu leh rambial bîk din dàn an nei a ni.
• Inmalrèl 21: hei hi ahminga mahnia rorèlna hranpa nei a ni a, ram dànpui te, roreltu te leh rorèlhmun hranpa te ram zalèn ang maiin an nei vè a ni. Hê'ng inmalrèlte hi mahni puala rusia ṭawng bâkah rambial ṭawng bîk neih phalsak an ni a, mahsé ram indàwrtawnna thilah erawh chuan rusia ram sawrkar laipuiin an ai a awh ṭhin thung a ni. Hê'ngte hi abîk takin hnam tlém deuh ṭawng hrang neite chenna bialah siam a ni.
• Ramhmun (Край, krai) 9: hê'ngte hi rambial (oblast) te nen a inang thuak. Ramri bulhnaiah siam a ni bîk.
• Maldinbial (Автономный округ, avtonomniy okrug) 4: Atirah chuan maldinbialho hi rambial (oblast) leh ramhmun chhunga hnam tlém zâwkte tana inkulh bingna hmun a ni ṭhin a, kum 1990 chho khan khua leh tui inlungrual dinhmunah hlankai a ni. Chukotka maldinbial tih loh maldinbial dang chu an awmna oblast leh ramhmun rorèlnain a la thunun a ni.
• Oblast-maldin 1 (Juda inrëlbawlna rambial (Евре́йская автоно́мная о́бласть, Yevreyskaya avtonomnaya oblast)). Rambial (oblast) dang zawng zawng inmalrèl dinhmuna hlankai an nih tawh hnua ramhmun (krai) rorèlna hnuaia la awm chhun a ni.
• Khawpui inlungrual 2: Mawskaw leh St. Petersburg. Hê'ng khaw pahnihte hian rambung hrang angin ro an inrèl.

Thulâkna

• Solovyov, S. (2001). History of Russia from the Earliest Times. 7. AST. pp. 461–568. ISBN 5170021429.