Wp/isv/Kraftwerk
Kraftwerk (s němečskogo — «elektrostancija») jest němečska muzikalna grupa iz Düsseldorfa, ktora vnesla značny vklad v razvivanje elektroničnoj muziky. Grupa byla osnovana v 1968 godu Florianom Schneiderom i Ralfom Hütterom, ale široku znamenitost nabyla, kogda stala kvartetom, do ktorogo prilučili se takože Wolfgang Flür i Karl Bartos. Prvym objedinjejem tyh muzikantov byl kvintet, ktory nazyval se Organisation.
Muzika
[edit | edit source]V rannjih rabotah Organisation i Kraftwerk (do albuma «Autobahn», 1974) muzyka byla eksperimentalnoju i prěvažno ne elektronnoju. Prěvažajučimi stiljami byli krautrock i avangarda. Togda Kraftwerk surabotali s vplyvnym zvukoinženjerom Conny Plankom (on takože surabotal s Can, Neu!, Eurythmics), a takože eksperimentovali s različnymi muzikantami. Srěd učestnikov Kraftwerk byli Michael Rother, Klaus Dinger, ktory poslě osnovali grupu Neu!.
Album «Autobahn» (1974) stal prělomnym momentom ne samo jedino dlja grupy, ale i dlja vsej sovrěmennoj muziky, on pokazal možlivost sintezatorov i elektroniky togo časa. Tema kompozicije Autobahn, ktora dala ime albumu, jest jezda na avto po němečskym avtomagistraljem. Trvanje tej kompozicije jest vyše 22 minut, ona zajmala cělu stranu vinilovoj plastinky.
Počinaja s 1974 goda muzika stala menje eksperimentalnoj. Slědujuče tri albuma sut «Radio-Activity» (1975), «Trans-Europe Express» (1977) i «The Man-Machine» (1978). Oni takože značno vplyvli na razvivanje elektroničnoj i sovrěmennoj muziky. Na tyh albumah sut take hity, kako «Das Model», «The Robots», «Trans-Europe Express», «Radioactivity», «Neon Lights», «Showroom Dummies».
Kraftwerk sut sozdateljami stilja elektro, često grupě Kraftwerk pripisyvaje se sozdanje stilja tehno. Oni byli jednoju iz najprvejših pop-grup, stvorivših (ne avangardnuju) muzikalnu kompoziciju toliko za pomočju elektronnyh instrumentov. Navet glas poněkogda sozdaval se s pomočju generatora ili propuščal črěz vokoder, stavajuči robotopodobnym.
Vněšnje linky
[edit | edit source]- Tutoj članok imaje prěvod iz članka «Kraftwerk» v Vikipediji na russkom (spis avtorov; dozvoljeńje CC BY-SA 4.0).
- Oficialny sajt Kraftwerk
- Russkojezyčny sajt grupy