Wp/frs/Ulricianum

Gümnóósium Ulricianum
Skaulföörm	Gümnóósium
Grünnen	1646
Adräes	Von-Jhering-Str. 15
Stad	Auerk
Land	Leeğsaksen
Stóót	Düütskland
Dróóger	Landkrais Auerk
Skaulers	r.w. 2200
Mesters	r.w. 165
Bóós	Rüdiger Musolf
Websiid	www.ulricianum-aurich.de

Dat Gymnasium Ulricianum is äin mäinbildend gümnóósium in Auerk, Oostfräisland. Dat gümnóósium het upstünd (2020) ruuğweğ 1.800 skaulers un is d'r mit dat grôotst gümnóósium fan Leeğsaksen. Nóómsgeever fan däi 1646 grünt skaul is Uulerk II. (1606 – 1648), däi fan 1628 of an Gróóf fan Oostfräisland was.

Histoorje/Fandóóeğ

Grünt wur dat Gymnasium Ulricianum 1646 fan Gróóf Uulerk II. Däi 350-joer-fier wur 1996 ofhollen. 2008 firde man mit 'n grôot umtrek döör däi binnenstad fan Auerk un mit 'n meer as hunnertmeeterlâang girlâan um däi häiel baau umtau dat äinhunnertjoriğ bestóón fan däi olbau as ook dat uutgeeven fan däi litteróótürnoobelpriis an däi bekent Uulrisióóner Rudolf Eucken. Däi föördrağ oover Eucken wur fan däi filosoof Hermann Lübbe hollen, däi sülst móól Uulrisióóner west het. Siit dat skauljoer 2004/2005 word't döör de skaulreeföörm in Leeğsaksen ook däi fîift un säest jorgaang unnerricht't. Unnertüsken (2016) besöykent 1830 skaulers fan däi jorgaang fîiv bit twalm däi skaul, däi fan ruuğweğ 160 mesters (un angóónd mesters) unnerricht't wordent. Siit dat skauljoer 2015/2016 is däi buutenstee fan dat gümnóósium in Maurhuusen uplöest. In däi allerbäest tiiden, besöchent 2000 skaulers däi skaul. Dat Ulricianum is 'n unnerrichtsskaul föör däi stuudienseminaaren Läär un Wilmshóóven.

Skauldróóger

Wiilst däi twalf grundskaulen un däi middelskaul in Auerk in stadsk hâan bünt, is föör dat Ulricianum däi Landkrais Auerk skauldróóger. Net soo staajt däi IGS Auerk (bit jorgaang 13) in däi dróógerskup fan däi Landkrais.

Profiil fan däi Skaul

Unnerrichtstsiilen

Däi skaul het 'n groot fakkenanbod, ook in 't kursniwo. In 't middelniwo word't fan klâas sööem an tweitóóliğ unnerricht anbooden. Buutendeem gift dat siit dat skauljoer 2001/2002 blóóserklassen, däi musikunnerricht anwendent, man ook teoreetsk, anbäident. Dat Ulricianum was as grôotst skaul fan Leeğsaksen lid fan däi landswîid “Modelfersöyk tau 't kwalitäitsundwikkeln” (“Modellversuch zur Qualitätsentwicklung”).

Wäitenskupsdóógen

Elk joer in d' haarst is dat gümnóósium mituutrichter fan däi Auerker Wäitenskupsdóógen. In disser weeken wordent beraumt wäitenskuppers, d'r bii al meer as 20 noobelpriisdróógers, tau föördróógen in däi kóómers fan däi skaul of fan anner organisóósjoonen, däi 't stöönent, nöyğt. Skaulers fan däi hoogerder klassen kooment soo in d’ genäit fan stiipendien an föörskernsinstituuten in häiel Düütskland un Europó of köönent an föörskernsprojekten in d' häiel weerld däilneemen, soo as ekspedisjoonen nóó d' Antarktis un Jakuutsien. Siit 2001 söölent döör däi „Junioor-Wäitenskupsdóógen“ ook jungerder skaulers in t'sóómenaarbaid mit wäitenskuppers fan meerder düütsk föörskernsinrichtens an natürwäitenskuppelk fróógen un eksperimentäären brocht wordent.

Tóólen

Fan klâas fîiv an is Engelsk däi êerst frömdtóól. As twäied frömdtóól wordent fan klâas säes an Letiin, Spóónsk un Fransk anbooden. Fan klâas sööem an (twäied halfjoer) is ‘n dâard frömdtóól möögelk: Letiin, Gräiksk, Fransk of Spóónsk. Buutendeem is fan klâas tâajn an Spóónsk möögelk, bii nauğ nóófróóeğ wordent ook Letiin un Fransk anbooden. In 't rebäit fan aarbaidsmäinskupen (AM, Düütsk: Arbeitsgemeinschaften (AGs)) wordent, ofhangend d'r fan, woo fööl skaulers sük mellent, Itóójeensk, Jóópóónsk un Oostfräisk anbooden. Föör däi jorgaangen säes un sööem gift dat däi Letiin-Leerspöölen-AM. Ook gift 't fan klâas sööem an äin tweitóóliğ bod in däi fakken eerdküen, histoorje un politik. Siit 2003 is dat Ulricianum ferantwoordelk föör dat ergensensprüüfen Letiin (grôot Letiinum, lütjet Letiinum) un, wen 't bruukt word't (läest móól in d' haarst 2011), ook föör Hebreesk. Dit ferantwoorden telt föör d' häiel noordelk däil fan dat gewest Wäiser-Äiems (Ollenbörğ inslooten).

Projekten

Däi skaul is lid fan dat Cornelius-Program, dat dat uuttuuskerns fan skaulen stöönen daajt.

Internóósjoonóól Ulricianum

Up d' häiel weerld is dat Ulricianum mit menniğ anner skaulen an 't t'sóómenaarbaiden. Hir mautent f'rdan däi ferbinnens nöymt worden, däi döör 'n stâark uuttuusk fan skaulers an 't leevend hollen wordent, tau 'n biispil däi ferbinnens mit d’ Guajome Park Academy in Wista/Kalifornien as ook däi mit d’ Westhills High School as däil fan dat GAPP-program, mit ‘t Lycée in Luneville (Frankriik) un mit ‘t Liceum Ogolnoksztalcaçe in Kepno/Poolen. Anner skaulen, mit däi dat Ulricianum t'sóómenaarbaiden daajt, bünt:

• Walther-Rathenau-Gymnasium Bitterfeld
• Vollen Ungsdomsskole – Asker/Nörweegen
• XIII. Liceum – Wrocław/Poolen
• Gimnazium Pribram/Tsjechien
• Liceo Scientifico Orazio Grassi, Savona/Itóóljen
• Läiwarden/Neerland
• Torre del Mar/Spóónjen

Litteróótüer

• Programm des Königlichen Gymnasiums zu Aurich. Tapper, Auerk 1861–1892 (Digitalisat)
• Ulricianum in Aurich 1646 - 1955. Friedrich van Senden, 1967
• Festschrift 350 Jahre Ulricianum – Gymnasium Ulricianum Aurich 1646-1996. Hans-Jürgen Westermayer, 1996

Weblinks

• Webstee fan dat Ulricianum (Düütsk)