Wp/fit/Kainulasjärvi
Kainulasjärvi on kylä Pajalan kunnassa, lännen puolela Kaihnuunväylää. Noin 180 asukasta. Kylän nimi tullee kyläläläisitten suulisesta perintheistä siittä ette ensimäinen asukas tuli Ylikainhuusta ja paikasta tuli Kainulaisen järvi. Se asui Salmijärven rannala ja vieläkin on tarinoita ette kainulaisela oli tupa kylän osassa Saajo, lähelä Salmijärven rannala. Jokkut meinaavat kuitekki ette ensiasukas tuli Suomen Kainuusta, mutta se taitaa epäselvä suulinen tieto.
Kylän oman tarinat kertovat ette Ojan-suvun ensiasukas oli Kapteeni Ruottin armeassa joka taisteli Oravaisen rintamalla 1809 ja karkasi sieltä kesken taistelua. Siittä alkoi Mäensuku.
Ensimäiset suvut on kuitekki Lampa, Hannu, Oja, Aidanpää, Juto ja Vinsa.
Sanothaan ette saamelainen Paloraukka oli kylän ensimäisiä asukhaita, ja asui Palola, kaivo hopea aartheen kylän suuriin männyn alle, Uuen koulun takana. Ei kukhaan ole kuitekhaan löytäny aarehautaa.
Kylässä puhuthiin aiemin aivan meänkieltä eli suomea niinku jokkut sanoit. Nykysin nuoremat ymmärtävät jonkin verran meänkieltä, mutta ruotti on pääkieli nuorten kesken.
Mats Sundin, jonka äiti on kylästä, on rakentanu kesätalon kylhään missä se on viettäny monta kessää ja talvisin kyläläiset ja KSK opetit Sundinia pellaamhaan iishokkya. Se onnistui aika hyvin ja hänestä tuli Toronton iishokkylaakin kapteeni moneksi vuoeksi.
Viimi aikoina on alettu tutkimhaan kylän emikranttia ja muistoja. Kylästä meni noin 25 emikrattia, suureks osaks Ameriikhaan. Noin kolmas osa tuli takashiin. Muutama Brasilihaan ja Kanathaan. Kylän ainua tie mailmale oli pieni polku ja tie tuli vasta 1930-luvula. Mettätie meni Narkauksheen Vanhaavaaran kautta, jossa on yks suuri kivi joka kututhaan jättökiveksi, koska kaikki kylän emikrantit saatethiin siihen kivele ja viimiset hyvästit otethiin lapsilta ja tuttavilta. Useasti hyvästi oli iänkaikkisesti viimi kertaa kun sai halata ommaa lasta joka lähti hakemhaan parempaa elämää Ameriikasta eli Kanatasta. Noin 30 lähti kylästä ja noin 10 tulit takashiin muutaman vuoen kuluttua.
Ingvar Oja (Karkean Unon-poika) on ollu Dagens Nyheterin ulkomaankorespondentti monessa maasa, m.m. Kiinassa, Japanissa, Intiassa ja Ameriikassa.
Kylän kirjailiat on Nisse Gramner, Sixten Lampa, Birger Winsa ja Erik Tillberg on kans kirjottanu muutaman kirjan, mutta se ei ole asunu kylässä monen vuoshiin.
Kylän kotisivussa on kuva-arkisto kylän asukhaista ja paljon histuuriata, jahista ja kalastuksesa. Kaikki on ruottiks.
Lännen puolela kyllää valoaa Narkausjoki ja iänpuolelta valoaa Kaihnuunväylä.
