Wp/blc/T'as

Wic t'as wa skwatstas ti k'cicw ti tsitstsipii alh ti alhqulhuus t'ayc. Alh7ayuulhliwas tc c ti qiqti ti kasmlhkmi. Sk'cuulhliwas wa spuxliits - ts'xw kuks wa tsaatsi ala spuxlxsnks n wa kulhlxs wa kw'pwalhts tc. maliixwaycs wa spuxulhanks ca ts'xw.

Wa skwatstas tc

Ayutsaw wa acwlh ts stics ti t'as tc ti alh7ayutsmim ca s"Bush-tit".^[1] Axkuks k'caynictim wa bushtit-tutim wa tsitstsiipi ts alh Nuxalk, k'caynictim kuks wa qw'las wa tsitstsipii, alh7ayusliwas c tc - ts'ulitaw ts, was ktl'ltl'lxsinaw.

Ayuts Captain Schooner skamalhlik'uulhms ti tsitstsipii t'ayc, ka acwsnicicw alh7ays snupq'ts tc. Axkuks alh7ays spiixlas tc. Nutsutiks tc swics wa kw'pwalhts ti tsitstsipii ti aytcw tc.^[2] Axw qwlculhtsutaw ts - tmsmaw ka lhnus wa tsitstsipii ala matl'ap. Qulhas Harlan Smith stics tsk ti alh7ayutsmim ca s"Nighthawk".^[3] Nutsutikts swics "common nighthawk" wa itts'xlhiixw wa skwatstas ti tsitstsipii t'ayc.

ti s7alh7ays ala ts'ktas

ic7ntl'alhaw wa tsitstsipii ats. tl'uk'timutaw ssicsiqw'aw, s7icyaasnicit wa mamis. alhinaw ala awcwa ala amlh ts. Si7is7amlhs sputl'aw ts ula kulhulmcilh ats - waltulht suts' ssilhcwms. sutkamnaw su ts alh "South America". Nu7usqnamkit wa q'panaw ts ala sqts' ts. asimlts tsi cna7s tsc. smawiilhams ala aluux snitmnaw wa lhnusulh wa q'panaw ts, nacliwanaw wa qiqipi ts ska tsnlhakmitsutaw. lhwaasiilhams kuks, nacliwanaw ts'n ts ska ixwamnaw ulh ta ats'aaxlh t'axw.

References

[1] Ross Saunders

[2] Captain Schooner

[3] Harlan Smith

[1]

[2]

[3]