Wp/blc/Kasmlhkm

1 - ti kalhsmlhkm tc

Wic wa kasmlhkm wa acwlh wa tl'kukwtsm wa tsitsipii. Ts'icw ma wa s7alh7ay wa tsitsipii ts, wa alh7ay c ti tcncni alh Nuxalk. Alhpsaw wa acwlh ts ca tsitstsipii, aynaw kw' wa acwlh ts ca smlhk, was s7aynakw'tuu wa acwlh ca ank'pts n wa alh7ay.

wa skwatstas tc

2 - ti kasmlhkm, alhps alh ti laakts

Tsuts Charles Snow s"kasmlhkm"-tum wa alh7ay wa tsitsipii. Ayuts kw' Tsayliwa (Felicity Walkus) "kalhsmqw'm" n "kalhtsmqw'm". Tsuts kuks David Moody "kalhtsmq'm". Ayutsa-kwtuu ti wal s"kalhsmlhkm"-tum tc.

Alhinaw tuu wa stsicts'ix ts n wa kalhsmlhkmi ts.

ti kasmlhkm

Tic ti k'cicw alh ti 1-tum ti alhqulhuus ti kasmlhkm. Tics tc ti lhkw' tc ala tsay wa kasmlhkm ts - samwiis t'ayc ti issmlhk ti kasmlhkm - kalhnmnmk'iinaw wa acwlh ts. Tam7imantas tc ala atma wa alh7ilhm wa stn ts, iklhi ala qla ts. Sunsupts tc. alh7ays ti slhkw'aw tc c ti qiqti ti xaxaq'. Wics "osprey" wa itts'xlhiixw wa skwatstas ti tsitstsipii t'ayc.

ti qw'las ti kasmlhkm

Kasmlhkm-tum ti k'cicw ti tsitsipii alh ti 2-tum ti alhqulhuus tc. Axw alhps tc ca smlhk - anusyamis kuks wa ank'pts n wa tsitstsipii. tutu7imantas ala tsakwaax wa stn ts ala amats wa slawsikalh. Ts'xulhank tx, was sk'culhiks. mukulhankaw wa acwlh ts. Axw walis Nuxalk. Wics "red-tailed hawk" wa itts'xlhiixw wa skwatstas tc.

ti kasmlhkmi

ti kasmlhkmi

Kasmlhkmi-tutim wa qiqti wa kasmlhkm - alh7ays ti slhkw'aw tc c ti t'iclhala. tam7imantanaw ts ala nutsq ala stn. k'caynictim ts ala awcwa alh Siqalxm. Wic "Falco Sparverius" wa itruummciixw wa skwatstas tc. Wics "Kestrel" wa itts'xlhiixw wa skwatstas ti kasmlhkmi t'ayc.

ti kiwkiwlit ti kasmlhkmi

ti kiwkiwlit ti kasmlhkmi

inic-maw ti s7alhay i kasmlhkmi - ti kiwkiwlit tc. Axw alhnapilh kamalh-clh-skwatstas ti kalhsmlhkmi t'ayc ala slhk'mstalh ts. Tutu7imantas tc ala stntn ts. Yanicis ska iputsuts kamalh-lhxanms. kiwkiwlits tc. axw walis Nuxalk.

ti stsicts'ix

ti stsicts'ix

Tsuts Franz Boas stsicts'ix-tum ti smaw ala kalhsmlhk ts. Samwiis ti k'cicw ti tsitstsipii alh ti alhqulhuus t'ay ti alh7ayuts tc - tsictsiclits tc. wics "northern harrier" wa itts'xlhiixw wa skwatstas. alhk'cim kw' tx alh Nuxalk. Tutu7imantanaw ts ala kulhulmc ts. Kalhtsitstsipiinaw ts. Ts'xws wa spuxulhankaw ts. sk'cliwa kuks wa spuxulhikaw ts.