Wp/blc/A7anna
Ayuts Captain Schooner s"A7anna" ka "ah-anna"-tutim wa sulutlhh wa tsitsipii, kalaalhmtim ala tk'ilhanks Naamu. "Axw putl'aw ula ats. A7anna-litaw ts - wics wa skwatstanaw wa s7ayutsaw ts. Axkuks kulhuutsamnaw ts, axtuu mnlhimutaw ala nupusm wa stntnii. Knicaynictim ts ca Nuxalkmc ts. putl'aynictilh ts c ti puts'n."[1]
Wa skwatstas[edit | edit source]
Tm-smaw ti alh7ay ti sulutlh ti tsitsipii s7alh7ayuts ca s7a7anna - tic tsk ti alh7ayutsmim ca "common murre".[2] Ayuts David Sibley skamalhhk'ms ti alh7ay t'ayc, alh7ays c ti "excited nasal moan".[3] Slaxaw lhuu wa tsitsipii s7ilaaxaycaw ulh Nuxalk ala mntanaw ts - ii7axw csuutsaw ssunsuptaw s7alhtsimaw, ika tmnucstimutaw ala ts'ktanaw ts. Aynaw wa acwlh ts s"yip yip"litaw - samwiis tsk ti k'cicw ti tsitsipii alh ti alhqulhuus t'ayc s7alh7ayuts c ti s7alats'itumulhs Captain Schooner.[2]
s7alh7ayuulhliwanaw ts[edit | edit source]
Sk'c wa spuxulhiks ti tsitstsipii t'ayc, was ts'xws wa spuxulhanks. Sk'c tuu wa spuxutsaks, n wa acwlh wa spuxalakts tc - ts'xw kuks tuu ala qnkanks wa kw'pwalhts tc. ts'xwapsms tc kamalh7imalus tc sutkams - sk'capsms kuks s7amlhams. Alh7ays ti slhkw'aw tc c ti ut'pi.[3]
ti s7alh7aynaw ala ts'ktanaw ts[edit | edit source]
kalaaqw'smtim wa a7anna ts ala sulutilh ts alh Nuxalk ala amlh ts, aytutimk'utuu ala sutk ts. tutu7imantanaw ts ala qnqnklstii ts ala asiknalus wa sulutilh ts. Nuctsimutaw ts kamalh7ixwamaw ts ala alsqa ts, a7anna-litaw kuks kamalh7alhinaw ala amataw ts sqwlculhtsutaw si7asimltaw.
alhpsaw ts ca smsmlhkii. Mulmulminaw ts ula ts'icwams wa mawlxskw'p ts (180m, 600ft). Nu7usqnamkit ti smawulh ti q'panaw ts ala kulhulmc ts. Smawiilhams s7asimlts tsi cnaaslh tsc alh tc. Way, nitsms ti qiqti tc, mawlxsaaxams s7ays tc, walis wa amats snu7usqnamkim, ayalhs ula sulut ts, naycalhim c tu mans tx. Axw ts'n sicsiqw'aylaycs ti qiqti tc - mulmaylaycs kuks.
Ala aluux snitsms ti qiqtinaw - limliitsaw wa amatalaaxt ts ca spuxaw ts - klhs wa spuxaw ts alhts. Lhwaasiilhams s7axw sicsiqw'aylaycaw ts - icyaasnmnaw ca snknic ka ntl's.
wa susqwimtmacwaw ts[edit | edit source]
Alh7ayuulhliwanaw wa a7anna ts ala spyu ts. kalaalhmtim tuu wa lhnus wa alh7ay wa tsitsipii, ts'xmaycs s7alh7aynaw c ti a7anna tc, sunsuptaw kuks. Alhnapilh skalaaqw'mtim ts ala kulhulmcilh ts - axw tski qwlculhtsutaw si7asimltaw ts ala awcwa. Wic ats wa alh7ayutsmtim wa "Pigeon Guillemot" n ti "Marbled Murrelet" tc. Alh7ays ti slhkw'aw tc c ti spyu - qiqtinaw alh ti a7anna tc.