Wp/blc/Spyu
Tic ti spyu ti qiqti ti tsitstsipii, alhitimuts ala nut's.[1] Axw mas mnlhimut ts ala kulhuuts ts, axw tuu mtiis alh ti ka stntni - ixq'lms mas tc.[1] samwiitimuts tc ala matl'ap - aynaw kwtuu slhnuustimutawk'u.[1] Axw knictilh ts, axw tuu yustamkilh wa tsapaw ts.[1] Kalaalhmtim tsk ts ula alsqniwli ts.[1]
ti qiqti ti spyu tc[edit | edit source]
Lhnus wa alh7ay wa spyu-tutim wa tsitstsipii - ti qiqti tc n ti lhkw' tc. Alh7ays ti lhkw's ti qiqti tc c ti slhkw's ti t'iclhala tc. Wics "Cassin's Auklet" wa itts'xlhiixw wa skwatstas tc. ts'uliits tc stsitstsipiis. Qwlculhtsutaw ts stutu7imantanaw ts. Axw xilhs s7alh7alhtsimnaw s7ixwamaw ala sulut ts. Kalaalhmim mas tc ala nut's alh Nuxalk.
wic wa "plankton" wa sininitsaw ts. Mulmaw ula musams wa ts'klaktkw'p (170ft) snup'aats - yustamkit wa kw'pwalhtaw ts ska "sicsiqw'aw" ts ala qnks wa qla ts. Nu7usqnamkis ti smawulh ti q'pa, alhkaltcwmis tc alh ti tsakw ti nutsq' -
ti lhkw' ti spyu tc[edit | edit source]
Qwlqwliliits ti maaxsas ti lhkw' ti spyu tc - antsnsaqw'slxs kuks ka imalus tc. Alh7ays tc witl'axaycs tc ala kulhnks ti maaxsas. Alh7ays tc c ti qiqti ti qw'litq slhkw's tc. Tic tsk ti spyu t'ayc ti kalaalhmim tc c lhikw'lcaaxtalh txw ala sulut ts. kalaalhmim mas tc ala nut's alh Nuxalk. Tsiixanaw ula lhwaaskw'p s7aytut wa umatstustti q'panaw tc.
alhpsaw ca smlhk ts n wa sts'masii. wic tuu wa "plankton" wa sininitsaw ts. Mulmaw ula s7asmusams wa ts'klaktkw'p (150ft) snup'aats, lhnusanmaakii s7axw lhunlhuptaw ts ala qnks wa qla ts.
ti ahuu tc[edit | edit source]
.jpg)
Ayutss Godfrey Tallio s7alhitimutaw wa alh7ayutsmtim ca "Puffin" alh Nuxalk, alh Silht'mtimut, was yustamkim wa maaxsanaw ts ala pnaaxtalh ts.[2] Ayuts Captain Schooner swics wa maaxsanaw wa alh7ayutsmim ca ahuu ssxpilh ula pnaaxtalh ts.[3] Kalaalhmim ma tc ala awcwa s7amlhams. Tsuts s"ts'xwliwas" ti maaxsas ti ahuu tc - tsutilh kuks s"antsnsaqw's" alh ti suncwt.
Smsmas Captain Schooner alh tu s7alh7aynaw wa Lqw'lasmc ts skalh7ahuunaw ts alh tu ayk' txw. is7issutaw ts ulh ti qnklst tc ala alsqa ts ala apsulhaw ts. Tamniixwaw c tu lhkw'alus - was sp'iixwit wa sicsiqw' wa ahuu. Ayuts tuu tc snuqaq'lstxutsmilh wa ahuu ts - nukwtl'ikilh ula nupapnt wa qla ts ula s7alhliclicaw ts.[3]
wa smsmalh ts[edit | edit source]
Kamalh-alh7alhtsims ti spyu tc, ts'xmaycs ka asuk'mtinilh. [1]