Wp/bew/Twice
Twice (urup Hangel: 트와이스; tuker urup: Tewaise; urup Arab Gundul: توايس) entu paguyuban gending wadon deri Koréa Kidul nyang dikeja JYP Entertainment. Enni paguyuban ada punya anggota 9 orang, ya'entu: Nayòn, Jòngyòn, Momo, Sana, Jihyó, Mina, Dahyòn, Chéyòng, èn Ziyu. Twice dikeja liwat atu acara tipi nyang judulnya Sixteen èn debut tanggal 20 Oktober 2015.
Twice jadi bekèn di taon 2016 lantaran gending "Cheer Up" nyang naèk jadi rèngking nomor wahid di Gaon Digital Chart èn jadi gending paling laku di entu taon. Selaèn entu, entu gending juga menaning "Song of the Year" di acara Melon Music Awards èn Mnet Asian Music Awards. Dia punya gending lanjutannya, "TT", deri album cilik ketiga nyang judulnya Twicecoaster: Lane 1 juga jadi nomor wahid di Gaon selama 4 minggu terus-terusan. Enni album cilik entu album paguyuban gending wadon Koréa paling laku di taon 2016. Dalem wayah 19 bulan abis debut, Twice uda ngejual lebih deri cetiaw lebih salinan deri empat album cilik èn satu album istiméwanya. Di taon 2019, dia jadi paguyuban gending wadon Koréa paling laku kalo diliat deri sejarah pergendingan Koréa. Mulain bulan Juli 2020, enni paguyuban gending wadon uda ngejual album lebih deri 9 tiaw di Koréa Kidul èn Nipong. Di taon 2020, Twice nandatanganin kerja sama ama Republic Records bakal promosi di Amrik Serèkat sebagé bagéan deri kerja sama dia ama JYP Entertainment.