Wp/bew/Bola tendang

Tim Switserlan ama Albani lagi maèn rangseg tahon 2003

Bola tendang (hurup Arab Gundul: بولا تندڠ) atawa putbal (hurup Arab Gundul: فوتبال) atawa maèn bola (hurup Arab Gundul: ماين بولا) atawa maèn rangseg (hurup Arab Gundul: ماين رڠسݢ) atawa cuman bola (hurup Arab Gundul: بولا) aja' entu atu gerak badan nyang dipaènin ama dua tim. Di Amrik Serèkat, Kanada, ama Ostrali, ni gerak badan digero'nya soccer, sementara di laèn-laèn negara nyang basanya Inggris entu digero'nya football. Bola tendang entu atu gerak badan nyang paling mashur di mana-mana dunia.

Maènan kaya' bola tendang udah dimaènin semprakan jaman perdiu. Ni maènan asalnya deri Inggris, di mana Football Association nulis sèt aturan pakem bakal ni maènan tahon 1863.

Adapun asal-muasalnya ni maènan sanonya deri Tiongkok, atu maènan bakal soldadunya. Sepèler maènin bola berat èn njebolin gawang nyang rada tinggi. Inggris nyomot ni ide maènan Cina èn mermak aturannya sedikit, jadinya kaya' maènan sekarang kita punya nyaho pada.

Sarang tim ngelah 11 sepèler di tegalannya. Atu deri ni sepèler ada namanya kiper, pemaèn seturu-turunya nyang bolé megang bola paké tangan. Adapun sepulu sepèler laènnya digero "sepèler luaran". Sepèler pada ngebolain njebolin lawan punya gawang. Tim nyang njebol paling banyak dia nyang menang. Saben tanding maènnya 90 menit, dengen 15 menit serahat di selingannya. Tèpan di tenga-tenga disebutnya "turun minum". Bisa aja ada perlèng wayah lagi abisnya separo waktu atawa 90 menit maèn bakal nalangin waktu nyang kebuang lantaran penglanggaran, prikik, kornèl, cidera, kartu-kartuan, ganti sepèler, èn laèn-laèn tèpan di tenga-tenga maèn. Atu tanding bisa aja buntu seri, ila di berapa pertandingan nyang atu tim poko'nya kudu menang. Kalo begitu halnya, tambahan waktu dua babak kali 15 menit bisa aja dikasi, kalo masing juga' seri, ada dus-dusan bakal nyabitin sapa nyang menang. Kadang, tambahan waktu dilongkep bé, langsung ke dus-dusan biar langsung bisa nentuin nyang menang.

Aturan

Aturan pondamèn

• Atu deri dua tim nyang njebolin paling banyak dia nyang menang. Kalo sekornya medu, hasilnya seri. Dalem pertandingan kejuaraan bèker, bisa aja ada tambahan waktu ama dus-dusan bakal nyabitin nyang menang.
• Petugas pas maèn bola ada atu liperi ama dua tukang kebut.
• Gol nyang dijebol dirèken deri jebolan nyang masup ke lawan punya gawang, kalo itu bola udah ngeliwatin setenga deri itu garis gawangnya.
  • Di turnamèn-turnamèn gedé, liperi bisa maké tustèl bakal ngiat itu bola beneran udah gol apa kaga'.
  • Dalem aturan opsèt, kudu ada paling kaga' dua sepèler nahan di antara penyerang ama gawangnya si itu nyang nahan kalo konconya si penyerang mau ngoper bola ke dia. Biasanya, nyang nahan entu atu bèk, atu kiper. (Ni aturan èmang ribet pisan èn banyak tètèk bengèknya.) Sebelonnya ni aturan ditambahin, sepèler sering pada ngendog deket lawan punya gawang biar bisa gampil njebolin gawang pas itu bola dioper ke dia.

• Sepèler perboden acan maké tangan atawa lengen (hèn), kecuali kiper nyang bolé cuman di dalem kotak 12-pas (kotak pinalti di depan gawang dua-duanya).
• Bola dianggep kuar deri maènan (aut) kalo ngeliwatin wates pal pelan.
  • Kalo sepèler ngenain bola ampé kuar samping-samping pelan, tim lawannya nyang dapet lèmpar masup.
  • Kalo sepèler ngenain bola ampé kuar ujung pelannya kendiri, tim lawannya dapet kornèl.
  • Kalo sepèler nendang bola ampé melesat ke luar pelan bagèan lawannya, kiper tim lawannya dapet tendangan gawang.
• Sekali tanding bola ada dua babak. Saban babak lamanya 45 menit punya lama. Liperi bisa aja merlèng waktu di akir-akir saban babak bakal gantinya waktu nyang ketunda lantaran cidera tawa ganti sepèler. Ada lat sepulu menitan di antara itu dua babak.
• Saban tim cuman bolé seila-ilanya cuman tiga penggantian deri bangku selamanya itu maènan jalan. Sepèler nyang udah diganti kaga' bisa balik lagi di itu maènan punya lama.

Aturan abetan

• Sepèler kaga' bolé nyandak, njorogin, atawa nyakitin laèn sepèler (penglanggaran).
• Sepèler kaga' bolé pada adu pègang-pègangan atawa ngaling-ngalingin sepèler laèn biar kaga' dapet bola (pengaling-alingan).
• Pas sepèler abis njebolin gawang, dia kaga' bolé ngluncat ke penonton. Kalo entu dilakonin juga', dapet kartu kuning – dia punya juntrungan nyang ada. Sama juga' kalo dia ngangkat atawa nglepas kaosnya pas lagi seneng-seneng.
• Sepèler kaga' bolé ngatain liperi.
• Sepèler nyang nglakonin penglanggaran jelèk dapet kartu kuning, kalo penglanggaran parah atawa dapet kartu kuning dua kali dalem itu pertandingan juga' bakal dapet kartu mèra. Sepèler nyang dapet kartu mèra digesu deri pelan èn kaga' bolé nglanjutin maènan. Dalem berapa kejuaraan (kaya' Premier League di Inggris), itu sepèler disekor di pertandingan bèsoknya kalo dapet atu kartu mèra atawa lima kartu kuning dalem itu musim.