Jump to content

Wp/arq/زواج فل جازاير

From Wikimedia Incubator
< Wp‎ | arq
Wp > arq > زواج فل جازاير

[1][2]الزواج فل جازاير هوّا عقد بين راجل و مرا يوالم القانون تاع الجازاير٠زّواج يلزمو زوج صوالح : ورقا[3] رسميا تفوت عل لجوج ولا عل نّوتار .

لعرس ف دزاير هو عقد يكون فيه راجل و لمرة راضين على هاذا زواج على حساب لقانون تاع دزاير ، وعلى حساب لمذهب تاع الإسلام، وهاذا لعرس عندو زوج (2) حفلات ،مدنية (رسمية) إللي يسجلوه فالقاعة اللي جايا ف لمدينة معناها ف البلدية، ولازم عليهم يكونو قاعدين قدام لقاضي و كاتب لعدل؛و كاين فاني اتقليدية و دينية. لقانون تاع دزيرين، و بموجب لقانون تاع لمسلمين، لممتلكات لمنفصلة هييا لقاعدة

دّستور تاع لجازاير

[edit | edit source]

فل 1984 دارو قانون الاسرة[4] (قانون رقم 84-11 جوان 1984;[5] كتبو قانون خاص للاسرة يخصص البارتي لولى من القانون للاسرة [4] و اعتامدو على لقانون لاسلامي لّي يعطيهم حقهم شّرعي ; لپارتي لرلا تاعو داروها لزّواج .

شتاو هو زّواج

[edit | edit source]

زّواج هووا عقد بين رّاجل ولْ مرِّا فلْ حلال.[2] لحدود شّرعيا تاعو هي : -كي تكون قادر على لزواج -تكون قادر على مهر للمرا -لازم يحضر لكفيل تاعها -وفاني لازم زوج شهود -يكون معفي من العوائق الي دايرها لقانون لجزايري.

شروط تاعو

[edit | edit source]

سّن شّرعي تاع زّواج لمسموح بيه لراجل ولا للمرا يكون لازم 19[4] سْنا , بصح لْجوج يقدر يعقدلهم الاضْطرو وكانو تحت لاج, بصح بشرط , لازم لمرا تكون واعة بواش راهي تدير , وعارفة كلش . وباه رّاجل يزّوج كثر ممْرا , لازم يْجيب تصريح مل محكما بلي مرتو سمحتولو باش يزّوج . من جيهة وحداخرة لقانون لجزايري مايسمحش للمرا لجازايريا لمسلما باه تزّوج براجل ماشي مسلمة على حساب شريعة تاع لاسلام .

لفاتحا تاع لبلديا

[edit | edit source]

لفاتحا تاع لبلديا تكون ڨدام لقاضي و لا جوج خاص بليزافار تاع زّواج , يْسجلوهم في وحد لغوجيستخ تاع لحالا لمدنيا تاع لبلديا لي تابعين ليها . نْهار لْفاتحا , لْمرا لازم يكون معاها لوالي تاعحا( وهاذا لازم فل ٳسلام )يا باباها يا واحد مل لافامي تاعحا تخيرو هيا في حال كان باباها متوفي,

مالازمش يفرضو عليها زواج بسّيف و ماتكونش تحت ظغط , هزّْواج يسجلوه في روجيستغ تاع لحالة لمدنية و روجيستر تاع لْمزوجين ,وزيادة على هذاالشي فل جازاير, كانو يديروا لعرس بلا ما يعقدو , يعني حتى يعرسو باش يعقدوا و ليوم تبدلت الحالة ولاو لازم يفتّْحو لفاتحا تاع لبلديا قبل , باه يديرو لْعرس ,لخطرش السلطات الجزايرية فرضت الزواج لمدني قبل الزواج الديني( الفاتحة )هكا باش يظمنوا حق لمرا,ولازمعلى كل وحيد يبغو يتزوجو يجيبو شهادة طبية وهذاالشي لازم من وقت الي عدلوا في قانون الاسرة في عام 2005.

نهار لعرس

[edit | edit source]

زٌْواج يدخلو فيه ثلثْ صوالح , دّين لاسلم , لحالا لمدنيا , و لعادات وتقاليد تاع بكري ( لعرس , تصديرة لعروسة , رفود , ولجفنة نتاع لعروس غدوة من ذاك ).

لخطوبة

[edit | edit source]

لخطبة ماشي واجبة فل خطوبة[6]٬ بصّح ينص عليها القانون لجزايري[4] .على هذاك"لمخطوبة هي وعد بين المخطوبين يشكلو عهد لزواج،قادر اي واحد فيهم يبطّل" [7] على هكا لخطبة ما عندها حتى دخل مع لقانون, جماعة من عايلة تاع العريس الي هوما ( العريس ,والديه الاب و الام , عموم وخوال لعريس , خاوتو وخواتاتو ), يتقدم لعيلة لعروسة باش يطلبها منهم .

سجل زواج 1894

تّوجاد للفاتحة

[edit | edit source]

لفاتحة هي سّورة لّولى فل لقرآن و لمهمة بزّاف فيه .وف دّين لاسلامي يقراوها تكون ف نهاية وعليها سماوها الفتاحة تاع لعرس [3],وغير رجال لّي يحّضرو فيها وفي ݕلاصة لْعروسة يحضر لوالي تاعها.كاين شي عادات وين تكون قراية لفاتحة ف تّالي تاع لخطوبة[8] ،معنتها يكونو عايلة لعريس و لعروسة قابلين و متفاهمين على كلشي . فل خطوبة،عايلة لخْطيب تجيب معاها لإمام عند عايلة لعروسة لايمام يقابل بين والي لعروسة و والي لعريس , و لازم لإمام يطلب رضاية لعروسة ،باش يكون زواج حلال و مشروع .و من بعد يڤول كلام مْهم على لمحبة و شروط زْوّاج [8]نّاجح في وسط جماعة العريس و العروسة .

زواج

[edit | edit source]

ف دين لاسلامي نحتافلو بلفاتحة مرة وحدة برْك،و نعتابروالعرسان هذوا رجل ومَرتو بلا ما يديروا لعرس ،بصّح لمجتمع ما يشفهومش هكداك ومايعتبرهمش متزوجين حتى بعدما يعرسو ويديرو لعوايد ،كما يقولولها ف وحد لبلايس رْفود،ولي يدو لعروسة لدار راجلها بصّح عل لعموم لعرس و لمدة تاعوا تتبدل من بلاصة لوحدَاخرى, فل جزاير كاين ناس يديروه في ثلث يّام ولاّ ربع يّام وكاين الي حتى سمانة [8],(و العادة عند لغرب ولقبايل يديروه في نهار واحد)و لمراحل نتاوعو هما هادو:

نهار سبيسيال للعروسة تروح فيه للحمام مْع نسّا تاع فاميلتها[8]،و تدي معاها قش حمام لعرايس  : فوطة و كومبينيزو مخدومة "بلمنسوج" تتلبس من الصْدر حتي لرْكابيها،وكي تدخل للحمام يستقبلوها نسّا بزغاريت و يتهلاو فيها يحموها على التقاليد تاع هذيك لمنطقة و يحطولها لماسْك عل وجْها)٠وف ليلة زاوجة يديرولها لحنّة ف التبق الي جابوهلها اهل لعريس و الي هو ( حنو شموع عنبر قطن ماء زهر مرايات باش يحطو عليهم شموع وحاشية العرايس الي تنحط فوق حنة لعروس[8] و برنوس الستر وحلوى )٠بصّح ف هاد سهرة غي نسّا لي يحضرو،لعروسة تقدر تلبس لبسات تقليديةوتروح عند لْمشّاطة ونسّا تابعِنها بلغنا تاع باكري،وعايلة لعروسة يمدو لحنّة لمرا كبيرة يقولو للبركة باه ديرهالها دويرة ف يدها مع حبة لويزة تاع ذهب فل لوسط باه يجيها رَبْح و هي تدير ف لحنة و لعجايز يغنولها ،وف هاد ليلة ثاني يديرو معاها لعزبات لحنّة باش ربي سبحانو يبعثلهم عرسان حلاليين ،و منبعد يبداو يمدو فلعشا نسّا زاهيين و يشطحومع لعروسة ،و من جيهة وحْدوخرا حتى لعريس يديرولو لحنة كيف كيف مع لعروس تاعو في قصْرَا مع رْجال،لعريس و عايلتو يوجدو عَرْضا و عشا لرْجَل ل[8]قراب ليهم ،لي هما عمومهم ولاّمن عايلة لعروسة بما فيها(باباها،حوها،عمها و لاّحْبابهم)،ومور لعشا تبدا السهرة نتاع لعريس بالزهو والفرح في وسط حبابو ،يكملو رْجَال سهرتهم بشطيح.

لخطوات

[edit | edit source]

يديرو نهار واحد يروحو فيه قاع مالين لعروسة للحمام.ولازم تلبس لفوطا، وهي نوع م لكتان مخلط بذهب لمنسوخ، م صدر للركبة، و كي تدخل يبداو نسا ب زغاريت، وهاذا شي قاع يصرا ف دوش كبير ، و يديرولها طين في وجها و يقلعولها قاع شعر . و لخطوة زاوجة هييا ليلة لحنا، و هييا حفلة نصيبو فيها غي نسا برك، قادر لعروسة تلبس لبسة وحدة ولا زوج (2) من تاع بكري ،و تروح لعند لحفافة ، باه تمشط شعرها و دير لمكياج في ذيك لعشية . يديرو فيه غي لغنا تاع دزاير ،و لمرة كبيرة قاع ف لعايلة هييا للي ديرلها لحنة ،و فلعادة ديرلها دراهم تاع ذهب ف وسط لحنا ،باه تتمنالها ترفاه، و لبنات للي ماشي متزوجات تاني يجو باه يديرو الحنة ،باه ربي يرزقهم ب عريس ،و في نفس لوقت يقسمو لعشا و نسا يبقاو يرقصو. و كي يكملو نسا يحطو لعشا لرجال ، و لعريس و لعايلة تاعو تاني يجو باه يتعاشاو (بويو ، خاوتو، عمامو، و خاوتو م رضاعة) و في معظم لأحيان كي يكملو لعشا و في جو شباب يكملو رجال سهرة برقيص .

رقص تاع لعراس فلجزاير
لي ماغزا تاع الكسوة والروبات لخاصة بلمتزوجات
العرس فلجزاير الحنا
حنا تاع جزاير
تبق لعروسة

تصديرة لعروس

[edit | edit source]

غدوة من ذاك لعروس تتصد وهذي التصدير يديروها غير[8] لجزايريات و غير النسا بيناتهم باش يشوفوها الناس واهل رجلها , في هذي تصديرة تلبس لعرو على الاقل ربع لبسات تقليدية وعلى حساب لجيهة الي تسكن فيها شرق ,غرب , وحنوب , وعلى حاب اصل لعروسةل شاوية , قبايلية , ترقية , مزابية , شلحية.... وتلبس كيما قفطان, شدة, لباس ,كراكو ,منصورية ,قبايلية ,فرقاني ,غلاف , قسنطينية....و يقدمو لقاطو تقليدي , قهوة,اتاي و حاجة باردة , كي تكمل تصديرة يجي عريسها يخرجها معاه لدارو[8] , يروحو معاها قوادات ثلاثة و لا ربعة نسا كبار من فاملهتا ( عماتها و خلاتها ) وتدي معاها ثلاث انواع من لحلوى للفال [8].

لجفنة

[edit | edit source]

من العادات المناسبات ف لعوايد لجزايرية ,نهار الجفنة هو نهار لثالث تاع لعرس , لعروسة يجو فاملتها ويجيبو معاهم لفطور الي هو لجفنة وهي قصعة كبيرة معمرة بالكسكس والحم و لخظرة ,دراجي ,[9] زبيب و لبيض ولمرقة وهي تعبير عن محبة اهل العروسة لاهل العريس و الوالدة تاع العروسة هي بنفسها الي توجدها.واوا وحد ياكل منها هي العروسة وعريسها , يفطرو لعايلا في رحبا و لعروسة مع عريسها , بعدها يخيرو اكبر وحدة في عايلة العريس باه تحزم العروسة و ويقصدو بهذي العادة باش تبقى لعروسة محزمة في دار راجلها , بعدها تخرج لعروسة تقعد مع لحاظرين وتقسم عليهم الحلوى و الدقادق [8], مع الزهو و لغنا [10].

Ftour l3rousa

تعدد زواج

[edit | edit source]

ف لجزاير راجل يقدر يزيد يزوج حتى لثلث نسا على حساب دين الاسلام,[8] و لقانون يسمحلو بهذا شي , بصح حتى تقبل لمرا لولا و في حلات معينة كيما في حالت تكون لمرا لولا معوقة ,[8] ولا متكونش قادة على زيادة و تجيبلو ولاد , ولجوج هو الي يعطيه تصريح باش يعاود زواج .

المراجع

[edit | edit source]
  1. عدات وتقاليد الجزائر
  2. 2.0 2.1 لمقال رابع.
  3. 3.0 3.1 الدفتر العائلي الجزائري
  4. 4.0 4.1 4.2 4.3 دستور الجزائر
  5. Template:Lien web
  6. الخطوبة على الطريقة الجزائرية
  7. لارتيكل لخامس تاع تاع لافامي.
  8. 8.00 8.01 8.02 8.03 8.04 8.05 8.06 8.07 8.08 8.09 8.10 8.11 الزواج في الجزائر
  9. (الجفنة)من التقاليد الجزائرية الجميلة المنسية
  10. (الجفنة)من التقاليد الجزائرية الجميلة المنسية