Wp/arq/زمزم
حاسي زمزم: جاي ف الحرم المكي بعيد على الكعبة ب 20 ميترا, و المسلمين يْعدُّو هاد الما حاجة مبارَكَة. عنده سْمِيّات وحدوخرين كيما: "بير زمزم, ما زمزم"...
بير زمزم | |
شكون بناه : النبي ابراهيم و ولدو اسماعيل | |
وين جاي: مكة, السعودية | |
النوع تاعه: بلاصة مُقدّسة |
زمزم[1] هو حاسي تاع الما جاي في مكة فالسعودية. هاد المعجزة على حساب الإسلام جات بقدرة ربي مين الملَك جبريل ڤعد يحفر بكرعيه ولا ب جناحتيه فالصحرا باش تبان ديك العين باش يسَلَّك هاجر (الخدّامة تاع النبي ابراهيم) و ولدو اسماعيل مالموت. و مازال كاين حتى لضروك و ما نَشْفَتْش ڤاع من بكري عاداك جاية فالصحرا و الناس يستهلكوها بزاف على خاطر هاد المصدر هو الحاسي تاع الكعبة.
الأصل تاع هاد الاسم[edit | edit source]
كاين اسم وحداخر لهاد الحاسي لي هو " الحاسي تاع اسماعيل" لي جاي من أصل سامي. و الساميون يسميو المنابع العين ولا البير ( معناتو الكنز المدفون) و هاد التسمية وصلت حتى للبلاد تاع الفُرس.
وحدة مالتفسيرات التقليدية تاع الاسم تاع هاد الحاسي جاية من كلمة (زَمْ زَمْ) معناتها (حبّس).
و على حساب الهدرة, هاجر ڤعدت تعاود ف هاد الكلمات باش تصيب الما . و يڤولو بلي وحد القبيلة تاع "الجورهوم", سكنت تمّاك و وَعدت باش تتهلّا في الأم و ولدها. أيا و على الرواية تاع الإسلام اسماعيل عندو خوه من باباه (إسحاق) مَّه مَصرية و باباه بَابِلي لي هو ابراهيم, كْبَر في مكة و تزوج فيها م مْرا أصلها عربي و حفادهم غادي يكونوا مالقبائِل تاع العرب يعيطولهم " المعرّبين".
التاريخ تاعه[edit | edit source]
النبي ابراهيم جاه أمر باش يولي لمكة معا هاجر و ولده اسماعيل. و على حساب الرواية ربي أمرَهْ باش يخلي مرته الزاوجة وولده في واد خاوي ما فيه والو. و جبريل خرَّج زمزم ماللرض بإذن الله لهاجر وولدْها اسماعيل مين كانوا وحدهم في ديك الصحرا, لقوله تعالى: «رَبَّنَا إِنِّي أَسْكَنْتُ مِنْ ذُرِّيَّتِي بِوَادٍ غَيْرِ ذِي زَرْعٍ عِنْدَ بَيْتِكَ الْمُحَرَّمِ رَبَّنَا لِيُقِيمُوا الصَّلَاةَ فَاجْعَلْ أَفْئِدَةً مِنَ النَّاسِ تَهْوِي إِلَيْهِمْ وَارْزُقْهُمْ مِنَ الثَّمَرَاتِ لَعَلَّهُمْ يَشْكُرُونَ» [2] .
عبد المطلب جد الرسول محمد هو اللي زاد كبَّر الحاسي و سَڤْمَه. والرواية تڤول بلي النبي محمد مين كان ف عمره خمس سنين الملك جبريل غْسَلَّه ڤلبه ب ما زمزم.
معلومات تقنية[edit | edit source]
الهيدرولوجيا[edit | edit source]
الجيهة الفوڤانية تاع الحاسي تفُوت على الرملة و الجيهة التحتانية يحفرولها ف الحجر تحت اللّرض باش يخلّي شوية منو تروح مع المياه الجوفية. الأصل تاع هاد الما جاي من النُّو لي طِّيح في داك الواد و تاني م الما اللي يجي م التّلال اللي في دوك الجْوايَهْ. و راه ينقص بسبّة السكان و البَنيان اللي راه يزيد في ديك البْلاصة.
المركز اللي يدير الأبحاث و الدراسات على ما زمزم[3] اللي تابع ل السعودية يْحَلَّل الخصائص التقنية تاع هاد الما و كل خطرة يْحُطْ المعلومات جديدة ف لانتارنات . و الحسيان لوخْرين اللي جايين في ديك البْلاصة تاني يراقبوهم على جال السيستام تاع المياه الجوفية اللي تمّا.
الما[edit | edit source]
الما فيه بزاف الأزوت, والكالسيوم والكلور, و جاي تقيل و البنّة تاعو شوية قاسحة. الجغرافي العربي اليعقوبي" (ميَّت في 897) ڤال بلي «هاد الما ما نطيڤوش نستعملوه لوقت طويل». و على الكاليتي تاع الما, النبي محمد عليه الصلاة و السلام عطانا رايَه, في وَحْد الحديث النبوي :《يجي وَحْد الوقت وين البنّة تاع ما زمزم تولي خير مالبنة تاع الما تاع نهر النّيل والفُرات》. و باش يأكدو على هاد الحديث راح "محمد علي" -اللي هو أول نائب ملك في مصر (1805-1848)- للحج و دار إمدادات تاع لْما مَ النيل حتا المكة ڤاع المُدة اللي ڤْعَدها تمّا.
ماش يتكون ما زمزم[edit | edit source]
لباحثون تاع جامعة الملك سعود لقاو بلي ما زمزم فيه بزاف تركيزات معدنية, كيما : الصوديوم 133 مجم / لتر ، الكالسيوم 96 مجم / لتر ، المغنيسيوم 38.88 مجم / لتر ، البوتاسيوم 43.3 مجم / لتر ، بيكربونات 195.4 مجم / لتر ، كلوريد 163.3 مجم / لتر ، فلورايد 0.72 مجم / لتر. لتر ، نترات 124.8 ملجم / لتر ، كبريتات 124.0 ملجم / لتر ، ودرجة الحموضة 8.
البَنيان[edit | edit source]
نصيبو الدّخلة تاع الحاسي كي ندَوْرُو ظهورنا للكعبة. و دايرين دخلة للرجال و دخلة للنسا. والمصدر تاع الحاسي جاي حْدا محطّة ابراهيم ( هي دْرُجْ تاع حْجر اللي طْلع فوڤها النبي ابراهيم عليه السّلام باش يْركَّب الحجر الأسود و ديك الحجرة فيها لاطراس تاع كرعين متلاصقين). و السعوديين عاودو بناو الحاسي في بيوت تاع المياه الجوفية باش يْنقُّو الطّواف. و كاين سبابيل توزع هاد الما المُقدّس و تْعقّمه و تڤلاصيه و دايرين سواريج كبار للحجاج باش ما يأتّرش عليه الحمان. والمسَّلمين يشربوه باش يرْواو و تاني يدَوْشو بيه. و ف ديك الصالة اللي جاية كبيرة وفيها الكارلاج كاين كولوار صغير مبلع بالزداج فيه موتور و تييُّووات اللي يفَوْتو الما بانتظام.و ديك هي البلاصة القديمة تاع الحاسي تاع زمزم و دايرين عليها عسّاس. هاد الحاسي محفور باليد و العمق تاعو قريب 30 ميترا و القطر تاعو من 1,08 حتى 2,66. و يجي الما م الترسبات تاع نهر الوادي والقاع الصخري, فالبَدْية كانو يخرجوالما بالحبيلة و البوادا و ضروك ولَّاو يخرجوه بالپومپات تاع التريسينتي و راه متْوفَّر ف ڤاع المسجد الحرام و حدا منطقة الطواف[4].
المراجع[edit | edit source]
- ↑ [1] باجة تاع ويكيبيديا زمزم بالفرونسي
- ↑ «رَبَّنَا إِنِّي أَسْكَنْتُ مِنْ ذُرِّيَّتِي بِوَادٍ غَيْرِ ذِي زَرْعٍ عِنْدَ بَيْتِكَ الْمُحَرَّمِ رَبَّنَا لِيُقِيمُوا الصَّلَاةَ فَاجْعَلْ أَفْئِدَةً مِنَ النَّاسِ تَهْوِي إِلَيْهِمْ وَارْزُقْهُمْ مِنَ الثَّمَرَاتِ لَعَلَّهُمْ يَشْكُرُونَ» سورة ابراهيم الآية -37-
- ↑ [2]هيئة المساحة الجيولوجيةالسعودية
- ↑ مركز زمزم تاع دراسات والبحوث, هيئة المساحة الجيولوجية السعودية. مؤرشفة من لوريجينال في 5 فبراير 2005. استرجْعوه في 5 جوان 2005.