Wp/arq/جانت

تيكوباوين

نسى تع التاسيلي - وان درباون - تسيلي ناجر

جانت (ولا ڨانت) (بالتيفيناغ ⵊⴰⵏⴻⵜ) هي بلدية تاع ولاية اليزي في الجزاير. هي تتمثل في 3 واحات (أدجاهيل، الميهان، أزلواز) , وهي المدينة الرئيسية تاع الجنوب-الشرقي تاع الصحرا الجزايرية. جاية على بعد 2300 كم ملعاصمة ألجي , مشي بعيدة على حدود ليبيا وقريبة من لواحة اليبية تاع غات. هاد البلدية مسكونة خصوصا بالتوارق اجار ولا (ازجار) و التعداد تاع السكان تاعها يقارب 10000ساكن .

جانت هي عاصمة تاع المنطقة الجغرافية ألي سموها تاسيلي ناجر.

كانت معروفة بإسم حصن شارليه (Fort Charlet) في وقت كي كانت لجزاير تحت الاستعمار الفرنسي .

جيوغرافيا

جانت جاية تحت جبل التاسيلي ناجر, و في إرتفاع تع 1050 م. اجوز عليها واد إيجريو (معناها واد كبير و عريض بالتماشق-تمازيغت) ولي إوفر الماء للواحات, ليوم إعيطولوا "واد جانت".

تاريخ

جانت كانت مسكونة من وقت ما قبل التاريخ, على خاطر من بكري فيها الماء. في هاد المرحلة التاريخية، الانسان كان غير إصيد و إلڨط الماكلة تاعو.

ومبعد، جا النيوليثي (8000 سنة قبل الميلاد) وين الانسان بدا إربي الماشية و إيدر الزراعة.

في هاد الوقت ,الصحراء كانت خضرة، على بيها نلقاو رسوم و نقوش صخرية في المنطقة تمثل عدة حيوانات كيما الفيل والزرافة و البقرة، ألي كانوا عايشين لتم بكري. المعروفين لكثر فيهم هما رسومات سفار و جبارن. نلقاو تاني رسومات تع عربات و كتيبات أمازيغية (قريبة مل التيفيناغ). و بقاو تاني بزاف القبور تع النيوليثي، المعروفين فيهم هما تع تين تاوسيت و تين أمالي.

في القرن 10م، إبن حوقل هدر على سكان المنطقة ولي كانوا واسمهم بنوا أجر-فزان. كانوا أمازيغيين (بربر)، هوارة و اباضيٍين مخلطين.

في القرن 12م, الادريسي زاد حكى على سكان المنطقة، وصفهم ب: "الأزجر، قبيلة بربرية (أمازيغية)". هداك هو الوقت وين جانت تطورت بدخولها في التجارة الصحراوية، و رتابطت مع واحت غات بش يتعاونوا إقتصادياً.

في القرن 14م, ابن بطوطة حكى على واحد ستضيفوا فالمنطقة ، كان قاضي اسمو أبو إسحاق الجانيتي.

و على حساب الحكايات الثوراتية الشفهية، اقلوا بلي فالقرن 16, جانت كانت محكومة من طرف ملوك التُبو (القُرعان), على راسهم الملك "غاون" (Ghaoun).

فالقرن 17م, ولاو قبيلة "امنان" هما لي حاكمين المنطقة, على راسهم الأمنوكل (سلطان) " ڨوم" (Goma), في جوايه عام 1660.

فالقرن 20م, واحد من قبيلة "امنان"، المدعو أمود اڨ المختار، حارب الاستعمار الفرنسي من 1905 حتى 1920.

الادارة

أحياء جانت: تين خاتمة - زلواز / بني وسكن /الميهان /أغوم / اجاهيل /ان أبربر / الحي الحضري افري

الاقتصاد

جانت غنية بالماء على بها طورو فيها الزراعة ولي تكفي بش توكل كل ناس المنطقة. عندها تاني 000 30 نخلة.

جنات تاني منطقة سياحية مقصودة ، بصح جاية مع حدود ليبيا وين الاوضاع السياسية ماشي ملاح، هدى وش نقص السياحة، وخاصة السياح الاوروبيين ما ولاوش اجيو بزاف.

المنطقة معروفة تاني بخدمة الجلود والصياغة بالفضة.

الديمغرافيا (تطور عدد السكان)

في 1935, كانوا كينين 1200 سكان في جانت، و 3000 رحالة في التاسيلي نجر.

في 1954, 1850 سكان.

في 1958, 2030 سكان.

في 1965, 3400 سكان, و 8000 رحالة في التاسيلي نجر.

في 1977, 5318 سكان.

في 1987, 9923 سكان.

في 1993, 905 10 سكان.

الثقافة

حفلة السبيبة

سكان المنطقة يتكلمون العربية، والجزائرية و الامازيغية (البربرية) ألي اسموها "تماشق" (تارقية).

عندهم ألة موسيقية قديمة و معروفة تسمى الإمزاد (مشتركة عند كل قبايل الطوارق) ولي تصنفت كتراث عالمي لليونسكو.

عندهم حفلة معروفة بإسم"السبيبة" لي تطيح يوم عاشورة، ولي تصنفت تاني كتراث عالمي لليونسكو.

الشخصيات المرتبطة بالمدينة

• أمود اڨ المختار
• عثمان بالي
• نبيل بالي

عثمان بالي

مصادر و مراجع

• توزيع السكان المقيمين من الأسر العادية والجماعية حسب بلدية الإقامة والتشتت, http://www.ons.dz/collections/w33_p2.pdf
• الانسيكلوبيديا البربرية، "جانت"، مارسيل غست و مليكة حشيد، 1995, إصدار إديسود (Edisud)، آكس أون بروفانس، فرانسا, https://journals.openedition.org/encyclopedieberbere/2171#tocto2n1