Wp/ann/Aligọ
Aligọ ìre anam ekimalek isa isi ije me emen èwê. Ebi kè aligọ ekisa me esese esese oniin̄ igat ugwem. Ema mîkaan̄ akpa òlolobo akpọk eyi òkikput uyok me ikarek mè ikirọ inyi lek kiban̄ iyok me eririeen̄. Ike akajit ukot kiban̄ owelebe, ìkirọ inyi ikọt ibeme ulobo lek kiban̄ mgbọ ema ekije me emen okpoon̄. Mgbọ inorie mè mun̄ okupbe, aligọ môkọt irie ogbogbo mè isun̄ ema kire ọkpọn̄ me emen ekpuk ya òkup me udun̄ kan̄. Isinire mgbọ inorie ikakupge, monenikisan̄a inorie cha îsun̄be isa ikikaan̄ unye, ekpuk ya monenikisip mè imem. Ifin aligọ okine ìkikaan̄ atalek sọntitiik mun̄ gaalek me lek. Ufulek mun̄ òkije mèlek efuuk kan̄ isibi ìkigwugwu ikom ifo emen otu kan̄. Mgbugbo chieen̄ kan̄ ìwawa ìkup inyi ikachieek ibe ntitaak inin̄ ọmọ chieen̄ me mgbọ egwijo ntitaak okijibi. Ebek kan̄ ìsisip mè ijọn̄ọ inyi ikọt ire lek ujọn̄ọ uti kire kook. Akpa òkup ọmọ me irak owot mè akpatukot ìre rọba rọba inyi ikikput ema lek mgbọ ema ekitọbọ ekpe mè ìre ekilaak me emen okpoon̄ òyoyok. Akpa yi ìkitibi isibi mgbọ aligọ isimin iso acha go.
